تطورات التصورات فى الجواز عند البنات

اعتقد ان اغلبية البنات بيبقي ليها تصورات عن موضوع الجواز , فى الغالب التصورات ديه بتبقي منحرفه حبيت يا ورديه اوي او سودا اوي برضه, و ده على حسب البني ادمه مننا اذا كانت بتلبس نضاره الحياه البمبي بمبي و ديه فى الغالب بعد الجواز بتلبس خازوق معتبر , او اذا كانت بتلبس نضاره شبه قرن الخروب و ديه بتبقي مهيأه نفسيا لاي صدمات
انا بقي و اعوذ بالله من كلمة بقي , مكنش عندي اي تصورات من اي نوع , كنت باحاول ارسم صوره واقعيه , احتياطي يعني مش عايزين خوازيق , بس معرفتش و ده لييييييييييييه ؟؟؟ عشان مكنتش عارفه مين سعيد الحظ اللي حيقع فى شر اعماله , حتي مكنتش عارفه ارسم صوره للبني ادم ده , اممممممم شايفه انه مينفعش , مينفعش مثلا اقول عايزاه كريم بنسبة تسعين فى الميه , الموضوع مش بالمسطره و القلم
ايام الفضا بتاع الثانويه كانوا يا عيني لابسين النضاره البمبي , عايزه مش عارف ايه و ايه و ايه بمنتهي الهيام ,فى عز ايام فيلم تايتنك ,و دول اتخزوقوا اتتخزوقوا يعني
حتي زوجي العزيز مره سالني ايام الخطوبه ايام الخروج و العربده, اييييييييييييييه كانت ايام
كنت باضرب الميلك شيك شوكلاطه و انفخ و اعمل بقاليل و منسجمه,
و هو بيبص لي , بصة الناس المخطوبين ,
مش خايفه من الجواز يا ازميرالدا؟؟
اذ فجاة توقفت عن البقلله و بصت له بفزع
يا دي المصيبه هو ايه اللي حيحصل بعد الجواز ؟؟ انت ناوي على ايه !!
لا عادي يعني , قصدي المسئوليه و البيت
يا عم خضتني و مسكت الشاليموه تاني و رجعت ضهري و اتجعصت
و بمنتهي الثقه , اصغر مني و كانوا خيبه لا بيعرفوا يشيلوا مسئوليه و لا نيله و عايشين عادي يعني , هو انا اول واحده !!
اليويمن دول بقي بادور فى دفاتري القديمه و اكلم صاحبتي
ساره , كانت اتفرجت على افريكانوا كل المرات اللي اتعرض فيها فى اى حته و ده عشان تشوف سي احمد السقا , مش عارفه استحملت مني زكي ازاي كل ده !! , كانت معجبه معجبه بفزع برضه بالنحنوح مصطفي قمر, وقتها يا جماعه مكنش فيه تامر حسني و لا حماقي , بتتمني تتجوز واحد شبهه , رومانسيه بهطل و كل ما تشوف مشهد رومانسي تيجي و شويه و هى بتتشحتف, شفتي يا بنتي امبارح حبيبي دائما ؟؟ يا خرابي, شفتى اما كانوا عالبحر , نفسي اتجوز واحد كده
و كنت انا العضوه الغتيته دائما , بمنتهي الاستخفاف يا بنتي انتي بتصدقي الكلام ده , ده تمثيل, لو كانت استنت شويه بعد طلاق نور و بوسي , اكيد كانت حتغير رايها
طبعا كانت تبص لي بقرف من فوق لتحت , اصلك واحده معدومه المشاعر
يا بنتي هما يقعدوا يحبوا فى بعض شويه كده و بعدين بالجزم
زي ما اكون تنبات لها باللي حيحصل لها , يا لهوييييييييييي, كللمتها من فتره , طبعا التون مختلف تماما
ايه يا بنتي مالك ؟؟
انا عند ماما اليومين دول, الشحتفة المره ديه مختلفه عن ايام حبيبي دائما , مش بيتحمل المسئوليه خالص, و اهلوا هما اللي بيصرفوا علينا و طبعا ده مديهم الحق يتدخلوا فى خصوصيتنا
يا دي الخيبه ؟؟ ليه يا بنتي دانتوا كنتوا بتحبوا بعض و كنتي مبسوطه
ايوه و كنا مقضينها خروجات و تنطيط و حب , مكنتش حاطه فى دماغي موضوع انه مسئول ولا اهله بيصرفوا عليه , كان كل اللي هاممني الخروج و الهدايا
دينا : انا نفسي فى واحد يحبني و ميشفش غيري , يجيب لي الفطار لحد السرير , و اصحي الصبح الاقي ورده تحت المخدا , ديه كانت مجنونه كاظم بقي و حاطه صوره مع صور عيلتها

جت زارتني من كام يوم هي و اطفالها

ها يا ازميرالدا, عامله ايه فى الجواز ؟؟
كويس حتي الان , ماهو محدش عارف ايه اللي حيحصل مستقبلا
بعد شويه من الكششان مني و الكلبشه فى امهم تم التعود عالمكان من الطفلين , حطيناهم فى الارض عشان نعرف نتساير على رواقه و عيني عليهم طبعا , العفش جديد و مش عايزه امهم تزعل مني , العيال اندمجوا فى اللعب اللي امتد لشد الشعر و العض
يا ولد انت سيب اختك , يا لهوي كان مستخبي لي فين ده , و راحت مصوته , اوعي باقولك و راحت شايله البت اللي بتتشحتف على دراعها
معلش يا ازميرالدا اسفه , شفتي اللي جرا لي يا اختي , اااااااااه , فين ايام زمان , زمان ده من خمس سنين يا اخوانا ,كنت انزل اتمشي و لا اروح الجيم وقت ما نا عايزه و لا نروح اسكندريه

هو دلوقتي انتي بتعملي ايه يا دينا ؟؟

مش شايفاني ,بارضع

قصدي فى الحياه

مفيش , لا عارفه نخرج و لا نروح فى حته, العيال مقيدنا

امممم

و انتي ؟؟ نظام اسئلة جس النبض ديه ,

بمنتهي الشفافيه والبراءه مني

عادي من البيت للشغل و العكس

البت زي ما تكون اتكهربت

ايه !!! بس!!

ساعات كده الواحد بيمر بلحظات ميبقاش عارف يعمل فيها رد فعل

امممم , طيب ايه !!

نصيحه يا ازميرالدا , اخرجي و اتفسحي , بعد كده مفيش الكلام , و راحت مصوته تاني

يا ابنييييييي , حتخرب الموبايل, استغفر الله العظيم و بعدين بقييييييي , ده موبايلي مش موبايلها
سيبك من قعدة البيت ديه , بكره تندمي , اتفسحوا و اخرجوا على اد ما تقدروا

ما هي متعرفش لما تصحي من الساعه 6 و شغل لحد 5 , منظرنا مبيبقاش جايب على بني ادمين خالص , بيبقي قالب على اشباح

باقولك ايه يا دينا ,انتي يا بنتي مش كنتي مبسوطه و فرحانه ؟؟ يا بابا الموبايل , دانا مش هي و رحت واخده مخبياه

ده كان فى الاول , كنا بنخرج , و كنا نقعد نرغي و يحب فيا , و المفاجات بتاعته, ده غير الهديا اللي كانت بتجي لي عمال على بطال و ده ايام الخطوبه و شهرين من الجواز , بعد كده خلاص, يا عيني عالحلو لما تبهدله الايام و بدات تبرطم بكلام مش باين زي كان يوم اغبر و كنت هابله و استعجلت و انا اللي استاهل

استغفر الله العظيم , يعني انا بادردش مع البنات و اتسلي عليهم , اكئبهم , طيب ايه اللي حصل ؟؟؟ مانا برضه المفروض اتودك و اعرف يا بنتي مبيشلش كباية المياه من مكانها , مبيحبش الاكل البايت, لازم اطبخ له كل يوم , مش بيساعدني و لا حاسس بيا , معتبر ده العادي , يا بنتي ده يجي من الشغل يرمي هدومه و اقعد الملم وراه بقي , ده غير العيال , انا تعبت يا ازميرالدا
الا انتي لم يدر بخلدك تماما مثلا ان ايام السهوكه و الهدايا اللي مالهاش وقت ديه حتخلص ؟؟
النحنوحه معجبهاش كلامي اظاهر , عوجت لي ربع شفه مع بصة ممزوجه بالقرف
و انا حافكر فى الكلام ده و احنا مخطوبين ليه اصلا !!! طيب و انتي عامله ايه ؟؟ جوزك متغيرش

لا عادي يعني

ايه ده لسه بيقولك كلام حب ؟؟

و هو كان بيقوله ايام الخطوبه عشان يقوله دلوقتي ,على فكره انا متغيرتش , تفتكري حيكون رد فعلي ايه لو قعد يسب لي - عيونه مش الدين طبعا- اي نعم الواحده مننا بتبقي عايزه كلمه كده كلمه كده بس مش لدرجة السهوكه

انتي لسه زي مانتي ؟؟, البت بتقولها باتامه غريبه ,

مش احسن ماخد على دماغي بعد الجواز و بعدين اعققد يعني ان الموضوع مش موضوع تغير و لا نيله
مفيش رد فعل لانها مشغوله بتكريع النوننه. اومال ايه ؟؟
قلت اديها خمسه فلفسه و فزلكه بقي , اممممم طبيعة العلاقه اتغيرت فاكيد لازم تتغيروا انتوا كمان, بمعني , دلوقتي انتوا عايشين مع بعض فمش حتخرجوا عشان تتقابلوا فى كافيه ,المهم موضوع الطبيخ كل يوم و انه مش بيساعد فده مش عشان هو اتغير بس عشان ده مرتبط بالجواز مش بالخطوبه , يا امي ده لو قام من مكانه وقتها عشان يحط الكوبايه كنتي حتفطي من مكانك تاخديها منه, هما مش بيتغيروا بس بيبقوا على طبيعتهم خلاص, و بعدين موضوع االهدايا ده , خلي عندك دم فيه , اما يبقي ياكلكوا ابقي دوري عالهدايا
ولاء بقي يا عيني كان عندها طول الوقت امل تتجوز الشاب الروش اللي يفسحها و يغديها بره عمال على بطال و نظام هئ و مئ , اي نعم الراجل ماثرش لحد اول كام شهر جواز , بعدها اتدهس فى شغله بقي , من تسعه الصبح لحد تمانيه,و احيانا الجمعات كمان
ديه بقي بعيد عن السامعين العفريته بتاعتها بقت دائمة الظهور من يوم ما اتجوزت وعلى طول شايطه
مبشوفوش خاااااااااالص , يجي من الشغل ياكل و يستلم الكمبيوطر بعدها يخش ينام , , انا زهقت مفيش اي كلام بيننا خالص, مبسمعش صوته الا عشان يتكرع, ايه ده ليه كده ؟؟ كل حاجه شغل شغل شغل
و الله عندك حق , بس اعتقد شغل لمدةاحداشر ساعه كفيله انها تخلص بطاريه اي بني ادم
زي ما فيه بنات نفسياتهم تعبت من احداث ما بعد الجواز , فيه تانيات تاقلموا عالوضع و عادي بقي و ضربوها طبنجه
مي بقي بدات تشرب سجاير من بعد سنه من الجواز , مش عارفه ايه الناس اللي بتسجر من الجواز ديه
بصي هو الاول بس بتبقي المواضيع لطيفه بعدها خلاص بقي , الناس بتمل , كل واحد فى شغله طول النهار بعدها نروح نتغدي , هو عالكمبيوتر او بيتفرج على كوره و انا مع البنت او يخرج يقابل صحابه و انا كمان اخرج , اروح لاهلي او اتقابل مع صحباتي , فى الاول اتخنقت من قلة كلامه و العيشه الممله اللي عايشنها بعدها قلت خلاص بقي لا يخنق عليا و لا اخنق عليه و كل واحد يعمل اللي عايزه
الحقيقه الحاله ديه المتني كثيرا كثيرا
و انتي بسلامتك مبسوطه كده ؟؟ايه القرف ده!
مش موضوع مبسوطه و لا لأ , موضوع ان ده العادي بتاع كل الناس , خلاص بقي ادينا عايشين

الدرس المستفاد مما سبق انه ربنا يستر