شاشه بيضا بترتر

لم يدر بخلدي بتات خالص على الاطلاق يعني من زمان ان ممكن حتة شاشه بيضا بترتر تكون سبب فى شرخ عائلي بيني و بين الناس التانيين و يبدأ الموضوع من بعد خطوبتي الاخيره و اللي مطولتش لانها الحمد لله قفلت بجواز , لما قررنا اننا موش حنعمل فرح و الموضوع حيقتصر على كتب الكتاب و ده فيلم تاني خالص مش وقته , المهم , قلت ايييييييييه ؟ لما يا بت مش حتعملي فرح يبقي مفيش داعي لفستان فرح , ده الموضوع كله ساعه , اكتشتفت بعدها انه مش ساعه بس لأ الا ربع, و بيتك بيتك انفض البتاع
ليه اجيب فستان فرح منفوش و منكوش و بيلمض و يبقي تقيل تهمه من كميات الترتر المرشقه فيه و احس اني نجفه ام بلح ديه , و امشي اجرجر ورايا ديل فى الرايحه و الجايه لأ و حيتكلف الشئ الفلاني و بجملة الموضوع مش لازم يكون ابيض و اهو اي لون حيقضي نفس الغرض,
, احيانا يا اخي العرق الاهلاوي كده بيفط , فايييييييه , حاشوف حاجه كده سواريخ بسيطه ظريطه اقضي بيها الساعه الا ربع  و اهه برضه منكن البسه لاحقا فى اي مناسبه , حاركن اللي خلفوه ليه , و بالمره ابقي خلتها جميله و ابقي وفرت للعريس مرتين
من الدوافع الفقيعه اللي دفعتني و خلتني اتقفع فيما يخص الموضوع ده لما كنت اسمع مدام حديثة تقولك بمنتهي الاشمئناط
و الله ده متكلف خمس تلاف جنيه و اهو مرمي جوه اهه
ده هي كلها تلات ساعات اللي اتلبس فيهم و فى الاخر بقي زي القتيل فى الدولاب
ده انا عاملاه مش عارف فين و اهو مركون
ده قماش مش عارف مين و مين و اخرتها اهه اتخزن
يعني اسم الله على سعادتك انتي و هي و هي مكنتيش عارفه قبل ما تعمليه انه حيتكلف الشئ الفلاني و انه حيتلبس مره واحده لمده كام ساعه بعدها حيبقي قتيل
و بدأت رحلة البحث عن الفستان اللي حيبقي صاحب النصيب و هداني جوجل بمساعدة احدي القريبات الي الشكل المبين اعلاه
مع بعض التغييرات الطفيفه اللي تناسب شخصيتي
المهم فى غمرة التجهيزات القيت القنبله و انا مش عارفه انها قنبله
انا مش حاعمل فستان فرح, ساعات الواحد كده مبيبقاش عارف نتيجة  اقواله

بسسسسسسسسس يا ختيييييييييييي و عديك بقي

ماما : ايييييه ؟؟؟ انتي عبيطه ؟؟؟ و لا يمكن متجوزه قبل كده

يا ماما ديه كلها ساعه

لألألألألأ

انا مش حاطه فى دماغي الموضوع و لا ربيع

اصلك طول عمرك غم , يمكن امك ماتت و لا حاجه

استغفر الله العظيم و ادورت على اوختي على امل انها تكون محضر خير , اهو لعل و عسي الزمان يكون غيرها

ايه الخيبه ديه ؟؟؟؟ البنات كلها بيلبسوا فساتين فرح انتي عبيطه و بعدين عشان الصور , لازم تتصوري بيه , و راحت لاويه الوش تضامنا مع ماما

يا جماعه انا لو عملت فستان فرح على نص ساعه حابقي واحده هابله , حادور على فستان و بعدين ادور على حد مضمون يعمله لي  عشان يطلع مظبوط و طبعا فى كل الاحوال حيبقي حرامي بعدين ادور عالقماش و اوروح خمشتاشر مره عشان اقيسه, انا كده حانهار و اعصابي تفلت  و ماتجوزش , انا ماستحملش كده 

و مسكت اعصابي و فردت بقي , غلوشه يعني و رحت ماسكه الورقه تاني

بصي يا ماما بصي و الله شكله حيطلع حلو, تايير كده بسيط و ظريف مش لازم منفووووووووووووووووش

تايير كمان مش فستاااااااااان !!!  

مش حاشوف حاجه و يلا روحي اعملي اللي انتي عايزاه, انتي ماشيه بدماغك و انا ماليش دعوه خلاص, قالتها و هي بتزق ايدي عشان متشفش و حمدت ربنا ان الموضوع وقف على كده و ملوشتش 

بعد كده بدأت ابلغ الناس بقي مضطره بسبب السؤال المكرر

ها بدأتي فى الفستان و لا لسه

مش حاعمل فستان فرح

ايييييييييه ؟؟ ليييييييييه؟؟ لا لالالالا لأ يا ازميرالدا ليه كده

استغفر الله العظيم , كده ,مفيش فرح يبقي مش لازم فستان فرح

أجري فستان , مش لازم يبقي بتاعك, البسيه وقتها و رجعيه تاني

 لأ مش باحب ,انا عندي مبدأ مبدأ مبدأ

يا بنتي عشان الصور 

و لو

حد يعمل كده برضه ّ!!!!

اه انا 

خالاتشي بقي, الحقيقه تضاربت ردود الافعال 

خاله 1 :انتي ليه يا بنتي بتقهري امك كده؟؟؟

الا انا اتجوزت عرفي و انا مش واخده بالي

يا بنتي حتتندمي عاللي بتعمليه ده ,

خلاص حابطل ادمان و اشوف مستقبلي 

ماما قالت لي انتي حره , اعملي اللي انتي عايزاه , كدهه من غير بقي الحوار السابق للكلمه ديه

ما هي بتقول كده من قهرتها , مش قادره عليكي , يا بنتي انتي الكبيره فرحيها

الله ؟؟ مانا حاتجوز اهه عايزين ايه تاني , ديه لوحدها بؤجة افراح انا تعبت اوي لحد ما وصلت للمرحله ديه, كفايه الجواز مش لازم التفاصيل اللي قبله, فستان و فرح و حنه و الوش ده

خاله 2 : اول ما وريتها الموديل المذكور

بصي يا طنط ايه رايك ؟؟ بمنتهي الفرحه القاتله, بس حاغير الياقه و الجيبه حتبقي مختلفه شويه  

بصت له شويه كده , و صمت 

امممم حلو

ايه ده بس كده ؟؟

ورتيه لماما ؟؟؟ 

أأه طبعا

بمنتهي الحذر و الريبه

و و افقت؟؟

أأه طبعا , قالت لي اعملي اللي انتي عايزاه

خلاص حلو اعمليه

فى تلك الاثناء حاول ربيع حقنا لدمائي و عشان الجوازه تتم على خير انه اعمل فستان , بس لألللللأ مش حاعمل  

بنت خالتي بقي لما قلت لها عالموضوع اللي طلع حيوي ده , عرضت عليا كتر خيرها انها تديني فستان فرحها

و الله يا أزميرالدا زي الفل , انا بس اللي لبسته يوم فرحي, 

لا يا بنتي لأ مش حاخد بتاع حد , المسألة مسألة مبدا , حالبس اللي يناسب الموضوع 

مانتي لااااازم تلبسي فستان فرح , الناس يقولوا ايه , متجوزه قبل كده ؟؟

مش فاهمه اللي متجوزه قبل كده مالها!!!

لا و هي لا

طيب و الصور ؟؟

بيت ام الصور , مالها ؟؟

البسي عشان الصور طيب, يبقي للذكري

الا ايه المبهج فى الكلام اللي هي بتقوله ده ؟؟؟؟ البس فستان حد لمجرد انه يطلع فى الصوره و انا جواه  مش لاني محتاجاه !! ايه الهطل ده

مش حاخد حاجه من حد , طبعا اتشاط فيا بسبب قلة ذوقي و انفلاتي , ممكن يكون عندهم حق بس انا كان فاض بيا يا عالم

يا ليت الموضوع وقف عالستات و بس , لأ اكتشفت ان الرجاله هما كمان شايفين ان ديه عامله مش و لابد و ده  كان كومبو مع موضوع عدم وجود الفرح نفسه 

مش فاهمه ايه المؤلم فى الموضوع, المؤلم بالنسبه لهم مش ليا, و المصيبه ان محدش شاف صورة الفستان

 كنت مبسوطه اي نعم اني حاعمل اللي انا عايزاه بس كان فيه شوكه فى قلبي , يا عيني عالكلام, بالرغم من سوء التفاهم الدائم اللي بيني و بين مامي , الا ان موضوع انها مش مبسوطه فى مناسبه مفترجه زي ديه كان مقرط علي مراوحي

 عملا بنصيحة احد الاصدقاء انه , ريحي الناس و فى الاخر اعملي اللي انتي عايزاه, فكلمت ماما , ايوه يا ماما خلاص يا ستي حاعمل اللي انتي عايزاه, مش انتي عايزه فستان فرح خلاص , حاسميه فستان فرح

انتي بتقولي تايير ؟؟ 

مسكت اصعابي , هو مش فستان ياسمين اختي كان قطعتين و كان فستان فرح ؟؟

ايوه

و جزيت على سناني و طرقعت صوابعي

حححححاضر يا ستي حاعمله قطعه واحده 

و يكون ابيض

هه ؟؟ حححاضر

الكلام ده كله كان قبل الجواز ب 3 شهور تقريبا و خلال التلات شهور دول نفس الحوارات من نفس الناس و كل ما الوقت يقرب كان تفكيري منصب على الفعل بقي , لما اقول اهه انا رايحه للترزي و لما الناس تشوفه

المهم جه الوقت الموعود و يلا نروح للترزي 

و رفع المقاسات و قال عالسعر المطلوب

هو لونه ايه ؟؟

اممم دهبي , شامبين , اي لون فضائي

طيب هاتي القماش و نبتدي على طول واتفقنا عالسعر

و جه اليوم الموعود تاني و احنا رايحين نشتري القماش و كان معانا توتته

ازميرالدا ,؟؟؟ خييييير

لازم تجيبيه ابيض لازم قالتها بفزع, رد الفعل هو اللي فزعني لان الكلام سمعته قبلها كتير

شيمعني ؟؟

طارق بيقول لو جيبتيه اوف وايت او اي لون تاني ده معناه وحش

اممم ازاي يعني ؟؟ حاموت !!

لأ ان العروسه مش كويسه

اييييييه, يعني ايه؟؟ اصلها ناقصه  

و مجربه

ااااااااااه ملعوب فيهاااااااااا, ماشي يا ستي حاجيبه ابيض عشان سمعتي بس , و قد كان , جبت القماش ابيض, لونه عجبني الحقيقه مش بطال

و رحت للترزي 

امممممممم, ده ابيض !!!

ايوه ايه المشكله ؟؟

بس ده ليه سعر تاني 

فعلا هي ناقصاه , مسكت اعصابي عشان مافقدش الترزي مش اكتر

ما هو هو نفس الموديل , جت عاللون يعني و كمان مفيش فرح

امال هو ايه ؟؟

تك تيك تاك 

المهم من هنا لهناك زود السعر حبه صغننين و وافقنا عشان اخلص

و رحت يجي تلات اربع مرات اقيس و اقصر و اضيق و اطول , امال لو كان فستان حق و حقيقي كنت رحت كام مره

و كانت النتيجه مرضيه ليا و العجيب انه عجبهم , و سمعت ردود من نوعية

شايفة حلو ازاي ؟؟؟ مش اللي كنتي عايزه تعمليه

ايه الحلاوه ديه 

المصيبه اللي تشل ان هو ده الموديل اللي اخترته فى الاول خاالص و ماما موفقتش عليه و اللي كل ما اوصفه لحد يتعفرت, من الواضح ان السر فى كلمة فستان الفرح مينفعش يبقي فستان بس , اي نعم هو حيتركن بس يلا ممكن اعمله مفرش ترابيزه بعدين و لا حاجه