الهرشه الكبري

اتعزمت فى فرح صديقه من فتره ليست ببعيده الموضوع كان فى مزرعه على حدود القاهره, كان فيه ايشي شجر رمان و ايشي نخل بلح و ايشي مانجه و اللى و المصحف و المصحف ما مديت ايدي عليها و لا عليت صوتي حتي عشان تبقي السبب فى اللي جرا لي, المكان حلو اوي بجد
تجولنا فى الحديقه و اتفرجنا على الكائنات الاخضره
عارف يا ربيع , المفروض الواحد ميشمش اي حاجه كده و خلاص لان ممكن فيه ناس يبقي عندهم حساسيه من النباتات او بعض الاعشاب , زي كده الاكل , فيه ناس عندهم حساسيه من اكلات معينه , طبعا قلتها و انا بالف على كل شجرة اطولها و اشمها , لا و افرك الورق بتعاها و اشمه بعنف , عايزه ابطل الخصله المهببه ديه , كل حاجه اشمها لحد ما يوما ما حافقد حاسة الشم و ابقي صاحبة عاهه
ممكن
المهم رحنا و قعدنا عشان نريح يعني من السفر , كان فيه شمعه رائعه رائعه , حاجه كده اسطوانيه و مجعلصه شويه و لونها زي قمر الدين و برضه هاتك يا شم
يا حاجه خلي بالك ده بيطرد الناموس , مش للشم ده
استغفر الله العظيم , بدأت اضيق زرعا من تصرفاتي
فى اخر الليله بدات اهرش فى دراعي اليمين , عادي يعني المكان مفتوح و ناموس و بتاع
فى اخر اخر الليل , بدات اهرش فى رجلي الشمال
الله !! , مانا مغطيه كله اهه , ده ناموس خارق بقي
و بدأت وصلة الهرش
تاني يوم , الموضوع توغل و انتشر و تشعب , بطش بطش بطش حمرا
يا نهار اسود ايه ده ؟؟؟
طبعا كان يوم هيصه , قاعده فى الشغل و كل شويه افط تحت المكتب , على اساس الهرش برضه ليه خصوصيته , و الموضوع اتطور و حسيت بسخونه , يا دي المصيبه هو فيه ايه؟؟؟ طبعا ده اثر عليا نفسيا و عقليا , الحسابات و الكلام كله دخل على بعضه و وشي كله كرمش على رد فعل واحد , الاسي على نفسي
مالك ؟؟ يا ازميرالدا , انتي تعبانه؟؟
ايوه شويه
مش عارفه هى هلاوس و لا ايه اللي بدأت تورد على ذهني وقتها , طول الوقت بافكر فى سلك المواعين و تاثيره على هذه البطش و كل شويه السكينه المشرشره تيجي على بالي و انا ماسكاها و باقطع البطش ديه بمنتهي التلذذ و احس براحه عمياء بعدها , و شويه ابص لازازة البيبسي عالمكتب و هه حأمد ايدي على رقبتها و اجي هابداها على المكتب و هاتك يا حك على هذه البطش القميئه
او انقط عليها بقطارة مية نار , نقطه نقطه على البطش و اسمع ريحة الشياط و اشوف الفوران , بعدها تختفي للابد , مش عارفه انا قلبت على شخصيه ماسوشيه و لا سيكوابتيتي اتغيرت و لا ايه؟؟
سمر سالت برضه , مالك يا ازميرالدا ؟؟
حساسيه
و حكيت اختصارا عشان مفيييش نفس
ممكن حاجه قرصتك ؟؟
مش عارفه مانا مستغطيه اهه
ممكن حشره عندك حساسيه منها
معرفش بقي
بصي فيه سقسقه اسمها كاراميللين هاتيها , حلوه اوي , فظيعه يا بنتي, و فيه كمان مش عارف ايه كده و كمان مش عارف ايه و رصت لي كام اسم كده, و بطلي هرش
مدام عصمت :مالك يا ازميرالدا
حساسيه
يا خبر , اصلها بتتفزع بسرعه , طيب وريني كده, مسكت ايدي تشوفها بتفحص من بعيد لبعيد , جربانه انا !!!
اكيد اكلتي حاجه عملت لك حساسيه
استغفر الله العظيم, لأ معنديش حساسيه من الاكل الحمد لله , ربنا بيلطف الا موضوع الاكل ده
وريني تاني كده و راحت منزله النضاره شويه و هى بتقلب فى ايديا و انا مرخرخه تماما
ااااه
بصي انا معايا حبوب فايكين لكل انواع الحساسيه , خدي واحده حتهديكي و متهرشيش , متطوعيش نفسك
بجد طيب هاتي , مفيش فايده مش بارحم و بابلبع اي حاجه
و البتاعه هديتني لدرجة اني كنت حانااااااااااااام فى الشغل
و عدي اليوم علي ما شفته بقي
مني صاحبتي كانت بتكلمني و عرفت
يا لهوي , لازم تروحي لدكتور , بلاش تطنشي
صمت مني مطبق
بصي فيه مرهم اسمه كيونين حلو اوي , جباااااااار , تقولش كاتشب يعني , بس خلي بالك بينيم , خديه بالليل , و ادتني اسم دكتور , انتي حد عندك عنده حساسيه؟
ايوه , فيه ناس عندهم حساسيه من الصوف
اوباااااااااا ديه ارتيكاريا
طبعا مرضتش اقولها اني كنت فاكره الارتيكاريا ديه مرض عقلي , طيب ربنا يستر بقي
بعد ما روحت حكيت لخالتي
طبعا زعقت لي , هو انتى اي حاجه على بقك كده على طول!!!!!!!!
عندنا ميونين و كاراميللين , حيهدوا الحساسيه ديه و بطلي هرش
هو ميونين و لا كيونين ؟؟؟ دانا بدات اكلم نفسي , طيب هو بينيم و لا لأ ده كان حاجه تانيه, ده شكله مشهور اوى كاراميللين ده
و بدات احط الحاجات ديه , مش مهم امتي مش مهم مين قبل مين , بس المهم اخلص من الجنان اللي حصل لي ده
الحمد لله الحمد لله ربنا جبرني و بطلت هرش و عدت لصحتي و صوتي طلع و جلجل من تاني, بس فى الخطه اني اروح للدكتور لو حصل لى ده تاني....... منتهي الغباء

طبعا مكتبتش اسامي الادويه صح عشان محدش يستنصح و يجرب

حديث الكوافير

من وقت للتاني احب اروش نفسي و اذكرها اني انثي فباقوم بزياره قصيرة للكوافير, المهم داخله فى امان الله لقيت اتنين ستات ,الاولي منتصف الخمسينات ضاربه شعرها صبغه بني و قاعده مستنيه النتيجه و التانيه منتصف التلاتينات و كانت تحت ايد الكوافيره , و راسها مليانه ورق فويل فكرتني باقرايبنا من الكائنات الفضيه اصلها كانت بتضربه هايلايت اصفر , اللى هو الخصل الصفرا فى وسط السودا ,و اللى ظهر من لهجتها بعدها انها يا متن سعوديه او للعجب تونسيه بس كانت بتتكلم مصري مشرخ
و دار الحوار التالي و اللى سمعته من نصه مش من اوله
الست المشكوك فى هويتها : احنا عندنا الوهابه اللى متشددين شويه , اللى هما عندكوا الاخوان
( اعتقد الوهابه دول هما الوهابيين )
المصريه : طبعا دول فى كل حته دلوقتي, بس التشدد مش مطلوب برضه, زمان مكنش فيه الكلام ده و الناس كانت بتلبس على راحتها
الوليه الفضيه : بس اكتر حاجه لفتت نظري هى ظاهرة الاغتصاب هنا فى مصر , زمان مكنش فيه كده و كان فيه امان, كان ليا بنت جارتنا هنا فى مصر الجديده , كانت مؤدبه و بتلبس عبايات و حجاب و برضه بتتعاكس و يضايقوها
المصريه : لا بس انتي عارفه ده مش موجود غير فى الحتت اللي مستواها مش اد كده , فى العشوائيات و الحتت ديه
من الواضح ان الاتنين عالمين ببواضن الامور و المفروض اني ارمي المبرد اللى فى الشنطه و ابدله بازازة مية نار و لا ميني كلاشينكوف و لا حاجه , احتياطي برضه
المصريه : و انتي رحتي فين تاني فى مصر ؟؟
الوليه الفضيه : رحت شرم و الغردقه ,شرم حلوه اوي و عجبتنا احنا والولاد , فى شرم نزلت حمام السباحه و الراجل كان عايز يطلعني
الوليه المصريه بفزع : ليه ؟؟؟
الفضيه : عشان كنت نازله بهدومى زي مانا كيده , بنطلون و تي شيرت , بس انا قلت له لأ انا كيده ماقلعش و نزلت برضه
المصريه : شرم جميله فعلا, رحتها مرتين
بعد شويه كام ست جم مع بعض و دار حديث من نوع اخر
تاتو ايه ده اللى بيعملوه فى حواجبهم , مش حلو
عارفه سونيا , ديه راسمه حواجبها و شفايفها تاتو, قال ايه مكياج داائم عشان لما تصحي من النوم و جوزها يشوفها يعنى شكله بيبقي عامل ازاي و هو صاحي من النوم؟؟ ما هو كمان بيبقي منفخ و كمان اصلع و بكرش
انا ايه دخلت فى الحديث الشيق ده : ده لونه بيتغير و بيخضر بعد فتره , مش جوزها انا معرفوش بس قصدي التاتو
ايوه فعلا
و تخيلت منظر الست اللى جنبي و حواجبها خضره و منبته نجيله
المفروض جه دوري , بس قبل ما اقوم بثانيه دخلت واحده فرحانه باللي خلفوها , فى اواسط التلاتينات , نظام البت الواثقه من ام اللى فكروا يخلفوها و اللى دايما ماشيتهم سريعه و مش بتبص لحد قال يعني مش مستعنيه بحد و دايما واخده الوش الجد او بمعني ادق الوش الخشب, قال يعني مهمه, ضاربه شعرها احمر و منكوش و لابسه بنتاكور و بضي, دخلت و قعدت و بعد شويه راحت هوب قاعده على كرسي الكوافيره
يلا يا منيره , انا مستعجله
فى هذه الاثناء دمي ولع , لهب بعيد عن السامعين
الست المصريه الاولانيه خالص راحت بصه لى , انه ايه قلة الذوق ديه و الانانيه بتاعتها
الحيوانه المنكوشه اللى اخدت دوري و اللى عامله فيها سوسو برم , مش فاهمه اني بعون الله اقدر اجيبها من شعرها و هاتك يا هبد فى المرايه لحد ما تخر دم و الازاز يبقي مرشق مرشق فى وشها و ارنبة مناخيرها معلقه على تكه و فيه حتة ازازه مرشوقه فى عينها الشمال و شفتها التحتانيه محتاجه كوبري
بس لولاش بس الاحاسيس المرهفه بتاعتي اللى تمنعني اعمل كده

روح ام الجماعه

اتفقوا يقسموا الموضوع عليهم , و فات شويه وقت و فضل مستني و فات شوية وقت تانيين و برضه فضل مستني, ها يا جماعه مش حنبتدي بقي فكان الرد طيب معلش مشاغل و اول ما افضي حاقسمه.. دع الزعيم بتاعهم , و فضل مستني و بعدين قال لك لأ انا حابتدي اشتغل و هم بقي يقسموا براحتهم طبعا ده معجبكش الباقي اصله اناني و مبيحبش يشتغل فى فريق و معندوش روح الجماعه و فات شهر تقريبا و هم لسه مقسموش حاجه
و من هنا نتبين ان العمل بروح الفريق من اسباب لزقتنا فى مكاننا المغري
و سلم لي على روح الجماعه