فقعان تدويني

ناس عماله تكتب عن التدوين اكتر ما بتدون اصلا و اجتماعات و مناقشات و بلا ازرق و بلا هم
مش فاهمه الناس واخدين التدوين على اعصابهم و صدرهم كده ليه
و اللي يقولك التدوين ده حياتي حياتي حياتي
الا الناس لما تسيب اشغالها و حياتها و تقعد تدون و تبقي مهمتها فى الحياه انهم يدونوا انشاء الله كده حيدونوا ايه؟؟
ما هو لازم تشتغل و تتكلم و تحتك بناس , بلاش سوء النيه , عشان يبقي فيه مواقف عشان يبقي فيه مشاعر سلبيه ايجابيه اي نيله تبقي موجوده و خلاص
و بعدين قبل التدوين ما كنا عايشين و حلوين عادي يعني
خلاص التدوين ده اللى قلب الموازين؟؟؟؟
هو الهوا اللي بنتنفسه؟؟؟
هو جنة النت المفقوده؟؟
لأ و تلاقي ناس تعتذر عن تأخر و كسل فى التدوين , الا خلاص الجماهير الخفيره حيحصل لها حاجه لو بطلت؟؟؟ انت الميا و النور و ماكدونالدز؟؟ , لا و ناس جايين يدونوا على اعتبار العالم الافتراضي انه افضل من العالم الواقعي الاليم, الا اللى بيدونوا دول ملايكة مثلا و لا بهاريظ المجتمع؟؟ ماهم ناس زي باقي الناس, هما هما نفس الناس , و لو واحد عايز يبطل ينزل اعلان شبه صفحة الوفيات, يا خويا لو حتبطل بطل من سكات , لا و تلاقي الناس بقى , لألألألألألألألألألألألألألألألألألألألألألألألأ اوعي تبطل , ارجع عن قرارك, متحرمناش من انسك, انت النت كله ,انت انت و لا انتش داري
اه الواحد ممكن يعتر فى حاجه يلاقي فيها نفسه,تسليه, لعبه ,يكتشف حاجه جديده , يكتشف حتى حاجه فى نفسه مكنش شايفها قبل كده لكن مياخدهاش على صدره و يبقي تعبان و تحسه شايل المقطم على مراوحه
انا ادون لانه بيعمل لي دماغ مش اكتر و ممكن ابطل عادي عني, بافكر اعمل بانر للشعار ده و تبقي حمله, ماهي موده هى راخرة
ادون لاني بابقي مبسوط و لو زهقت حابطل
ادون لاجل المزاج العام
ادون لانه افيونه
ادون بكيفي و على راحتي
العين صابتني و التدوين لسه مجاني
الحلوه لما تدلع تخلي النت يولع