أل انجلش أل زا تايم

موضوع ان حد يحشر كلام انجليزي عمال على بطال ده لاحظت انه بدأ يظهر ايام الجامعه اخر سنه فى التسعينيات تقريبا , قبلها الموضوع كان واقف على اوكي اونلي, مش عارفه ده كان مواكبة للموباين و النت و لا ايه بالظبط , المهز , كنت عامله فيها شريفه و مش باحب احشر الكلام من غير اي لازمه يعني على اعتبار اني متواضعه و كده يعني
ابن عمتي اما ربنا كرمه كده و دخل طب , فى نص الكلام لقيته بيقول لى مش عارف ايه باك كده فطبعا بما ان مود الغتاته هو اللى كان حاطط عليا اياميها فكان رد فعلي عباره عن تتنيحه خفيفه مع رفع بسيط للحاجب الايمن, فالشاب الغر فهم قصدي ماحنا هارشين بعض
ببصي يا ازميرالدا و الله ما هى الاطه بس من المذاكرة و المصطلحات فباقول كلام انجليزي من غير قصد
فى الجامعه بقي ماتفهمش ليه البنات غاويين يعملوا فى نفسهم كده و يضحكوا علينا الرجاله
بما ان دراستنا كانت لغه فرنصاوي فتلاقيهم غاويين يزقوا الكلام كده من غير لازمه, زي بيان, اوريفوار, الكور يعني محاضرة يعني , جي بينص يعني اى ثينك, طبعا هو ده اخرهم يعني عشان محدش يفهم اني بافتري و لا هم جهابذه يعني , يا اختي انتي عايده السنه بسبب مادة محادثه ,استخبي بقي , لأ و طلعوا فى كلمه شيميز , شيميز ديه يا اخوانا للي ميعرفش هو القميص ,زي القميص الابيض اللى الرجاله بيلبسوه تحت البدل, مش عايزه لبس و الله,
انا اشتريت الشيميز ده من مش عارف فين , لييييييييييه ؟؟؟ افهم ليه , مالها كلمه قميص, انا لفترة فضلت مصممه على قميص هى كانت غتاته مش اكتر ,بس بعدها حسيت الكلمه بقت عيب اني اقولها فربنا تاب عليا و شفاني و باقول شيميز ناو
البت مايسه اللى كانت معايا فى الثانوي قابلتها من فترة كده , و ديه مفيش على بقها الا كلمه جست جست
just
انا لو مكنتش عارفه انها ساقطة انجليزي و كانت بتعدي بالحركرك كنت قلت ديه خريجة جامعه هافرهد بالسنبلاوين
منكرش ان فيه كلام الواحد بيقوله اضطراريا زي كي بورد مثلا او حتي نت او موبايل بس ده العادي لاننا عرفنا الكلام ده و هو كده , ماظنش باتكلم مع واحد و احاقول الحاسوب او الشبكه العنكبوتيه حيفتكرني زائرة فضائيه اكيد , بس لييييه الحشر بدون داعي زي
i dont know
i think
او نص الكلام عربي و يجي قالب على انجليزي تحسه بيدوخك كده و يجيب دوار لغه, اول ما اشتغلت واحد نصيح نصحني انه
حاولي تدخلى كلام انجلش فى كلامك ده بيفرق مع الناس , مش فاهمه يفرق في ايه ؟؟؟ يعرف اني باتكلم انجلش كويس !!!
و لا كوني باعرف لغه ده دليل على ثقافتي العاليه المرتفعه المحلقه فى سماء اللاوعي الانبعاجي المتحرش؟؟؟ ماظنش اللغه ليها دعوه بالمستوي الثقافي , و لا مجرد ابهار و زغلله لمخاليق ربنا و خلاص؟؟؟ و لا ينكن معقده و باطلع كلاكيعي عالناس و انه اهه انا باعرف لغات وانتوا لع , لا و المصيبه ان ممكن تلاقيه يوقف فى نص الكلام كده قال يعني مش عارف يجيب الكلمه بالعربي , فبيدور عليها فى قاموس لغات اللى خلفوه
انا نفسي بقي فيه كلام باحشره فى النص زي
حجز reservation or booking
الغاء cancellation
وقت محدد time limit
و حاجات تانيه بس اعتقد ده بسبب الشغل و التعامل بس , احيانا لما باكون باتكلم مع حد عارفه ان لغته مش اد كده و مش حيفهم الكلام البسيط باحاول اخلي بالي من كلامي , انا عن نفسي مبحبش حد يتكلم ادامى و انا ابقي قاعده طيشه كده مش فاهمه حاجه فلازم الواحد ياخد باله من اللى ادامه و استيعابه
من فترة كنت بالاعب بنت اختي و الجلاله واخداني فقلت لها هاللووووووووووو
فاختي عوجت بقها على جنب دليل النقورة
!!!!!!!!!اظاهر اللى باعمله عالبيبول حيطلع عليا و لا ايييييييه