المثقف الصايع

مش فاهمه ليه دايما الفكرة المتاخده عن الشخص المثقف انه شخص ثقيل و رزيل و معفن و دم اهله يلطش و ريحته وحشه, فاكرين احمد راتب فى فيلم مبروك جالك ولد؟؟ اما فريد شوقي كل شويه يقول له روح استحمي , و بعدين اساسا يعني ايه واحد مثقف ؟؟؟ واحد قرا كتير ؟؟؟ ليا واحده قريبتي عندها 30 سنه و مدمنة ميكي ,عادي يعني , و بعدين المثقف ده لازم يبقي قاري فى جميع كل المجالات؟؟؟ , يعني سياسه و روايات و تاريخ و نقد واي انواع تانيه ؟؟؟ طيب الشخص المثقف ده لازمن و حتما و لابذ انه يكون بيحب الشعر ؟؟ انا مش باطيقه عن نفسي , و الله ديه دماغي بقي , مابحبش كاااااااافة الالوان الشعريه بس باحب لسان العصفور , جه عليا وقت كنت باتكسف اقول ده احسن اللى ادامي يبص لى من فوق لتحت و احس انه بيشتمني فى سره و اصعب عليه على اعتبار انى واحده عديمه الحس الفني تستحق الشفقه, بس و بعدين حاقعد كاتمه فى نفسي كده لحد امتي !!!!!, طيب هو برضه المثقف ده لازم يبقي بيحب الرسم و غاوي معارض مثلا ؟؟؟ و عارف اسم كل لوحه و مين اللى راسمها و راسمها و هو فرحان و لا كان قرفان من عيشته؟؟ لا و لازم يبقي فاهم اللوحه ديه بتقول ايه, الا الواحد لما بيجي يرسم بيبقي ناوي على نيه ان اللوحه ديه غرضها كذا؟؟ زي الهدف من الدرس كده او الدروس المستفاده من اللوحه , معلش يا اخوانا انا باعترف اني مش بافهم فى الكلام ده و بدي افهم, لا و تلاقيهم كلهم بيحبوا فيروز و محمد منير و ماجده الرومي و لازم يكون فى النص حد مش معروف اوي , لاحظ كده عزيزي, ماله بعرور
لا و الكلام لازم يبقي كلام مجعلص و كتير و عريض و اكيد فيه كلمه حتسأل على معناها و كل كلمه بتقع من بقه تلاقيها تغمز لك و بتقول لك خلى بالك يا معلم ده مثقف , ليا واحد صاحبتي مخطوبه لواحد شايف نفسه مثقف , فى يوم جاب لها روايه و قعد يقرا لها منها شويه بصوته اللى بيقول انه رخم, قصدها رخيم , بتقول لى كان منشكح اوي و هو بيقرا , و هى طبعا لازم تبقي منشكحه و عاصره كام لمونه , المعفننننه مكانتش بتطيق سيرة القرايه و تقول لى يا طول بالك
حتى الافلام , تلاقيه يحضر اكلكع الافلام لأ و يقول لك ايه , انت لازم تشوفه مرتين عشان تفهمه , الراجل ده دماغه جامده اوي , فيها ايه لما اقول انا مافهمتش حاجه , الجدع ده عايز يقول ايه؟؟؟ و لا كل حاجه ليها بعد مش سهل اي حد ياخد باله منه !!!!!! ماله اللنبي ؟؟؟؟ لأ كله كوم و يوسف شاهين كوم , العالم اللى عمالين يقولوا عبقري عبقري و امل حياتي يا عين اني اشتغل معاه, كل ممثلين مصر قالوها , نفسي اسال واحد منهم بس انت فهمت ايه من فيلم الاختيار ؟؟؟ اعترف اني باموت فى فيلم صلاح الدين و المصير, حاجه مفهومه شويه
ليا واحده صاحبتي كانت كل ما تشوف وشي , هاتك يا كلام على افلام و كتب كنا اتكلمنا عليها سبعتاشر مرة قبليها, يبقي نفسي اقولها ارحمي اللى خلفوني مش كده , يا ستي بنشوف افلام و بنقرا الحمد لله , بس مش كده , احيانا بتحتاج لقدر من الهيافه فى حياتك , مش معقول الحوارات كلها تبقي ناشفه كده , مالها اغنيه رزان الجديده مثلا؟؟؟ ,انت بقي اللى نفسك أ... ,شوفوها و النبي على ميلودي , ليه منقعدش نتكلم عن الفرق فى الاداء العلني بين فيفي و دينا و لوسي ؟؟؟ مش معقول كل الكلام يبقي عن اخر كتاب لمش عارف مين و الفيلم للمخرج اللى اتحرق مش عارف امتي ؟؟ فيه مواضيع كده هدفها الاوحد انها تدي شوية طراوه , هو ده انتقاص من ثقافتك لا سمح الله ؟؟؟ و لا حتصاب بنقص ثقافي فى الدم
ايه المانع ان المثقف ده ممكن يبقي واحد عادي و صايع !!!!!

اعلان أخوي

محمد كمال حسن ومصطفى الحسينى

عندما أسمع كلمة مدونه

مدونات مصرية

الأربـعـاء 21 مــايــو

مع مجموعة من الأدباء والمدونين المتميزين

أحمد فؤاد نجم

خالد الصاوى

غادة عبد العال - عايزه أتجوز

أشرف توفيق - أخف دم

ميمو

أزميرالدا - أهو كلام والسلام .... اسم الله عليا

محمد أحمد - الديليكون

طارق إمام

نائل الطوخى

نهى محمود - كراكيب نهى محمود

محمد صلاح العزب

أيمن فاروق - راسبوتين

سلمى صلاح - متغيره شويه

أفندينا

أحمد شقير - حكاوى آخر الليل

ملكة حسين - مملكة واحدة من الشعب

هنوده

شيماء زاهر - دردشه

أحمد الفخرانى - تياترو صاحب السعاده

إنجى - سمراء النيل

البراء أشرف - وأنا مالى

إبراهيم عادل - أنا وأنا

أمينة زكى - أحلامى المبعثرة

محمود عزت - كوبرى إمبابه

skylight - ياسمين

عندما أسمع كلمة مدونة

مدونات مصرية

جمع وتعليق

محمد كمال حسن ومصطفى الحسينى

الأربعاء 21 مايو

دار العين و دار مزيد