اذاعه القران و البيت الكبير و المكرونة

زمان اما كان حد من الناس الكبار يحكي عن ذكرياته عن حاجه او حد معين ,كنت باستغرب اوي من بالاشتياق للحاجه ديه و الاستمتاع و هما بيفتكروها , زي بيت ما مثلا او شخصيه كانوا بيحبوها او احداث عاشوها, كنت باحب اوي اسمع جدتي و جدي وهما بيحكوا , طول عمري باحب اسمع , لكن عمري ما تخيلت اني يوما ما حاحس نفس الاحساس
, البيت الكبير
زمان مكنتش باقول عليه كده , كانت كلمه
انا رايحه لتيته كفايه لمعرفه انا رايحه فين
احنا تقريبا اتربينا هناك , رايحين جايين نفوت هناك, حنتقابل , يبقي هناك , كنت بابقي مبسوطه اوي اما كنت ابات مع بنات خالتي
افضل وقت لينا كان قرب المغرب لما نقعد فى البلكونه لحد بالليل, و احنا صغيرين كنا بنلعب فى الجنينه
بيت واسع , سقوفه عاليه , زي بيوت زمان , دايما ابص لسقفه و اضحك و اقول
دول ممكن يعملوا دور فى النص
جوا جنينه مش كبيرة اوي , حواليها سور كان زمان اوي سور خشب , كنا بنشوف الناس و احنا جوه, بعدها عملوه سور عادي بالطوب , ليه بوابه كبيرة عشان العربيات , وفوق البوباه ديه هلال , او بقايا هلال ,
و باب صغير تاني عشان الناس , و فيه ملحق زي مكتب , دايما جدي كان بيقعد فيه , يقابل الناس الصبح و كان ياخد قهوته فيه الضهر و جنب المكتب فيه جراج
زمان كان فيه شجرة توت كبيرة , كنا بنبقي مبسوطين اوي لما ناكل التوت بتاعها
و كان فيه شجرة لمون , ياما اخدنا منها لمون هى و تكعيبه عنب, و النخله اللى لسه موجوده لغايه دلوقت
بعدها جددوا الجنينه و شالوا الشجر ده , بس مش عارفه ليه لسه فاكراه
دلوقت فيه شجرة فيه ورد احمر شكه حلو بس مالوش ريحه , مغطيه الباب الصغير و شجر اخضر كاسي على السور
النخله لسه زي ما هى و لسه بناكل من بلحها
جنب البيت فيه قهوة , دايما كانوا يشغلوا الراديو على القران الصبح , و جدى برضه دايما كان بيسمعها , ماما طبعا زي اي حد لازم الصبح تشغلها
ارتباطي با ذاعه القران كان سببها البيت
دايما لما باسمعها بافتكر هناك , مش عارف ليه الربط ده
لأ و مش بافتكر اي وقت, بافتكر الساعه تلاته مثلا بعد الضهر
او احداشر الصبح و جدي فى مكتبه و مستني قهوته و هو بيقرا الجرنال
و برضه مش اي شيخ
بالذات مصطفي اسماعيل
احساس غريب بجد
ايه علاقه الصوت بالمكان؟؟؟؟
دايما بافتكر لما نفوت عالسريع و تيته تتحايل علينا عشان نقعد و نتغدي
او لما نروح , لازم تعزم علينا بالاكل, انا كمان كنت بجحه
على راي ماما , على التلاجه عدل
لحد دلوقت ماكلتش مكرونه زي بتاعه تيته
اوقات كتيرة كنا بننسي نفسنا فى البلكونه, فكانت تخبط لناعلى الشباك اللى فوقينا عشان ندخل
دلوقت البيت محدش فيه
الله يرحم الجميع
بس لسه بنتجمع كلنا فى المناسبات
بس اكيد فيه حاجه ناقصه
اوقات باقصد اشغل اذاعه القران عشان احس بهناك