مفيش ساعه.. خلاص

اول علاقه ليا بالساعات كان عمري تقريبا خمس سنين لما ماما بدأ تعلمني ايه الا ربع و ايه و تلت , كنت كتير باتلخبط, لما ماما كانت بتسألني الساعه كام كنت بارد
العقرب الكبير على اتنين و الصغير بين التلاته و الاربعه لحد ما اتعلمتها
اول ساعه فى حياتي كانت هديه من خالي و كان جواها صورة ميكي , كانت دراعاته هى العقارب , كان عمري وقتها عشر سينين, مين يوميها و انا معرفش اعيش من غير ساعه, كنت باحس بتوتر طول الوقت لو حصل و ساعتي باظت , زي اللى فى مكان و تايه مش عارف هو فين, نفس الحاجه بالنسبه للوقت , كنت باحس اني تايهه و لازم اعرف انا فى انهي وقت, طول عمري باحب احترم مواعيدي و لو حد ادا لي ميعاد لازم يحترمه و لو حصل و مجاش فى ميعاده كان ده بيبقي على كرامتي , لان احترامك لوقتي من احترامك ليا
عمر ما حد ادا لي ميعاد و جه فى وقته
جه عليا وقت حسيت ان الموضوع قلب بهيستريا الوقت كنت باحب انظم مواعيدي اوي و اشوف كل فعل حياخد وقت اد ايه , الاكل فى اد ايه , اللبس فى اد ايه , النوم اد ايه , لدرجه انى مرة طولت و انا باتغدا فكنت كل شويه ابص فى الساعه, ماما اخر مازهقت قالت لى
انتي وراكي ميعاد و لا حاجه؟؟؟
موضوع هوس الوقت ده خلي رتمي سريع , باتكلم بسرعه اكل بسرعه اخلص اللى ورايا بسرعه , على اعتبار ان لو اتاخرت فى اللى باعمله ممكن يطرأ جديد او لان كل شويه فيه حاجه جديده تحصل تغير اللى باعمله
لو ورايا ميعاد قطر عادي اني اروح بدري قبلها بساعه او يمكن اكتر , على اعتبار اني اوصل بدري و استني احسن كتير من ان اني اجي متاخره و يفوتني
فعليا عمر ما حد ادا لي ميعاد و جه فى وقت
عادي اوي ان اللى مديني ميعاد يجي بعدها بساعه كامله و لو حتي بينت اني متضايقه طبعا بيتقال عليا اني محبكاها و المفروض اني احمد ربنا انه جه فى الوقت ده
كان العادي اني ابص فى الساعه كل شويه, مش عارفه ليه
من شهرين تقريبا ساعتي باظت , كانت عايزه حجاره, ركنتها و اخدت واحده تانيه , باظت برضه , و الاتنين مركونين غير اتنين تانيين هدايا
فى الاول موضوع اني ركناهم ده كان بسبب الكسل مش اكتر, بعد شويه قلت ماجرب اعيش من غير ساعه, مش فاهمه ليه ابقي حريصه على حاجه مالهاش اي قيمه, محدش بيحترم الوقت, ليه انا شاده نفسي كده, بل بالعكس باحاول ادرب نفسي على عدم احترام الوقت على سبيل العلاج يعني
اكتشفت ان الموضوع مريح بشكل , اني مابقاش عارفه انا امتى
و اعرف ليه ؟؟؟ ليه افكر نفسي ان الوقت طويل و ممل و برضه ليه اسربع نفسي لو خايفه الوقت يعدي من غير ما اخلص اللى باعمله
لو انا نازله من البيت قبل القطر بساعه , ليه كل شويه ابص فى الساعه؟؟؟ هو مراقبة العقارب حتوصلني فى ميعادي؟؟ و لا حاتأجله لو مش حالحقه!!!!!!
بس للاسف الموبايل فيه ساعه
من فترة قصيرة كان فيه ميعاد مع شخص فلقيته بيقول لى
خلي بالك انا مواعيدي مظبوطه
استغربت اوي من الكلمه ديه و استغربت اكتر من استغرابي
يمكن عشان شاب ؟؟؟ لو حد كبير فى السن قال لى الكلمه ديه كنت حاقول
اصله من الجماعه القدام بقي و الموضوع مهم عندهم
اعتقد الشخص ده حيكون السبب انى ارجع البس ساعه من تاني
لسه فيه ناس بيحترموا الوقت و لسه اكيد فيه ناس بيحترموا حاجات كتير تانيه