سوسو البريئه و ابن امه الخنيقه

سمر البريئه, ايام ما كانت بريئه , من صديشقات العمر و اللى لسه على اتصال بيا, فيها الخير و ربنا و تمر فيها , سبب البراءه ان سمر ايام الثانوى كانت احيانا ليها تساؤلات عجيبه كده زي مثلا لما تعرف بخطوبة احد الناس
هما بيقولوا ايه لبعض ايام الخطوبه؟؟؟ هو عادي يعني لما اتخطب و يمسك ايدي؟؟ هو ماله حاطط ايده على ضهرها وعادي كده؟؟؟
طبعا كانت بتلاقي الصمت المطبق مننا جميعا مش تعاليا لا سمح الله بس لأننا فعلا منعرفش.. ده بالاضافه ان عمرها ما كان ليها علاقات مع حد من الناحيه التانيه, الرجاله يعني
اتخطبت سمر الحمد لله من سنه تقريبا و حضرنا انا و كام واحده من صحباتنا الخطوبه , و هيصنا و اتنططنا و بتاع و دخلت اوضتها عشان تظبط المكياج, ما هي اتفرهدت يا عيني و بقت عرقها مرقها و دخلنا معاها على اعتبار اننا صحبتها يعني و بدأنا رحله اعادة الاعمار تاني لوشها و فستانها.. لقينا واحده ست شكلها جايب نص الخمسينات كده و لابسه شيك, ماهى خطوبه يعني, و قربت من سمر و مني بتظبت لها المكياج اصلها اروبه و بدأت الست فى اعطاء بعض التوجيهات
بصي بلاش تحطي اي لاينر عشان عينيها ضيقه, لا لأ الروج ده مش حلو , حطي اللون ده
انا و مي و سارة و هبه بدأنا نبص لبعض
لأ لأ الطرحه كده مش حلوه فنكيشيها فنكيشيها شويه كمان
و بصينا لبعض تاني
انا زغت هبه
مين ديه؟؟؟
هشش أمه
أأاااااه
سارة الحمقيه بقي, ايه اللى جابها هنا ديه ماحنا بنات فى بعضينا , هي مالها اصلا
هشششششش , أمه , بلاش تخربيها من اولها ملكيش دعوه, ديه هبه الراسيه
و عدت الليله و اتفقنا اننا حنزورها فى يوم كده على رواقه عشان الصور و النم و كده يعني
طبعا اليوم ده اتمطوح لبعد كام شهر حيث ان هبه متجوزة و مشغوله بابنها و الشغل وسارة سافرت و رجعت و انا عايزة اللى يشدنى عشان اروح حيث انى من عشاق الكسل و هكذا و سمر كانت خلاص فكت فبدل ما كنا رايحين نبارك رحنا عشان نطبطب
بعد ما ربنا جبرنا و رحنا و طبطبنا و قدرنا بعد مجهود جبار خارق للعاده اننا نسكتها عشان تتكلم بالراحه بدأت سمر تحكى بقي من اول حاجه خاااااااالص الموضوع جه ازاى
انفففففففف, مرات اخويا هي السبب , كريم يبقي جار عمها و هى اللى عرفتني عليه
باباه و مامته جولى البنك الاول, و انا مكنتش اعرف و بعدين كلهم جم البيت عندنا
سارة الحمقيه : و ابوه و امه يروحوا لك ليه, هما اللى حيتجوزوكى؟؟؟, على فكرة البت ديه متجوزة احسن حد يظن انها حقوده يعنى و لاحاجه ,
هبه الراسيه , حست ان سارة بدأت تسخن فابتسمت عشان تبتدي مرحلة التلطيف
عادى ما هو برضه من حقهم يطمونا عاللى ابنهم حايتجوزها
الحمقيه: مش لما هى تشوفه و هو يشوفها الاول
الراسيه : خلاص اهمدي
انا :اهمدوا انتوا الاتنين و بعدين يا سمر؟؟؟
ابدا جالنا مره هو و مامته و قعدنا مع بعض شويه و بعدين قلنا ماشي و اتفقنا نشوف بعض كام مرة كده
مامته كانت معاه؟؟؟ ...الحمقيه
ايوه جت معاه الاربع مرات ..سمر البريئه
و بعدييييييييييييييييين؟؟؟ كملى.. الراسيه
بس يا ستي و جم عندنا و مامته اتفقت مع بابا و ماما على كل حاجه و كريم و باباه قرا الفاتحه
اهه اهه الحمد لله العريس ظهر اهه.. ده انا
و نزلنا انا و ماما اتفرجنا على الشبكات بس كريم قال لي انزل برضه اتفرج على الشبكه مع مامته تاني و انأي اللى انا عايزاه
و لازمته ايه مدام نزلتي مع مامتك مره؟؟؟ ..الحمقيه
يمكن عايزهم يعني يقربوا من بعض و ياخدوا على بعض ماهي المفروض حتبقي حماتها.. الراسيه
الرحمه يا ربببيييييي.. كملي يا بنتي .. اسم النبي حارسني و صايني انا
تم الموضوع زي مانتوا شفتوا كده , اتفقنا اننا نروح نشوف الشقه فقال لى اروح مع مامته عشان هو مش فاضي للكلام ده , قلت مااااااشي .. انفففففففففففففف
و بدأت تزيق تاني و بدأنا تاني مرحلة التهدئه
استهدي بالله بقي و كملي .. محروسه و متصانه , انا
مره مامته تعبانه , مرة عندها تنضيف , مرة مستنيه لحد ما اخوه يسافر .. ارررررربع شهور خطوبه و اتفسخت و انا لسه ما شفتش الشقه.. انفففففففففف
و هو فين ان شالله , ما ياخدك انتي و ابوكي و لا حاجه؟؟؟..الحمقيه
اللى حصل بقي .. البريئه
شويه و ابقي انزلي ان شالله مع ماما اتفرجوا على الموبيليا و العفش , اصل انا ماليش فى الكلام ده خاااالص, انتوا ستات مع بعض
فيه رجاله كده , بيبقوا عمليين حبتين مالهومش فى اللف و الشرا و الكلام ده.. الراسيه اللى حاتشلنا
بس مش كده يعني.. الحمقيه
كانت كل يومين تكلمني عشان تطمن عليا و تقعد تديني فى نصايح عجيبه كده و تقول لى عاللى يحبه و ميحبوش الست الشاطرة هى اللى تعرف تضحك على جوزها , اضحكي عليه كده و اوعي يبص بره , ادلعي على اد ما تقدري , اوعي تدخلوا حد بينكوا , انا طوووول عمري فى حالي و مش باتدخل فى خصوصيات حد , و النبي يا سمر غيري من طريقة لبسك, البسي له ضيق , اصله بيحب اللبس المحزق, مش شايفة البنات بتعمل ايه , دلعيه كده زي البنات ما بتعمل.. كوكو و توتو , ابقي كده غيري لون شعرك كل فترة عشان ميزهقش , الرجاله بتمل بسرعه, الرجاله دول عقلهم صغير اوي اقل حاجه تضحكي عليهم بيها, عندك عمك ممدوح عمره ما يبص بره مع اني مش حلوه اهه بس عارفه ازاي ابلفه و اضحك عليه, اضحكي له الضحكه ام ديل , حسسيه برجولته على طول كده , اوعي ترفضي له اي طلب , دانا سألت الشيخ و قالي الست لازم تعمل اللى جوزها يطلبه منها لو ايه حتي مدام مش حرام, متنسيش طبعا اللبس الشفتشي
سارة الحمقيه هبدت على صدرها.. يا نهار اسود
هبه الراسيه .. تنحت
و انا استمريت فى الكتابه بانفعال
انتي بتكتبي اييييييييه ؟؟؟
اهدي اهدي ..يا بنتي انا داخله على خطوبه , كنت اياميها لسه داخله بس انتوا عارفين النهايه, فلازم يبقي عندي خبره برضه و اعرف المواضيع بتمشي ازاي , كملي بس ملكيش دعوه بيا
شويه و تكلمني
و النبي يا سمر بلاش تتكلمي معاه على الاربع خطوبات اللى قبلك اصله بيزعل سمر , بلاش البلوزه الخضرا , مش بيحب الالوان الفاتحه ديه السابوه الواطي ده بلاشه , بينرفزه انتي بتكلميه على شغلك لييييه ؟؟؟؟ بصي البسي الطقم الاحمر , بيمووووت فيه
و هى عرفت الكلام ده ازاي ؟؟؟؟.. انا
هو طبعا بيقول لها حتكون بتشم على ضهر ايدها.. الراسيه اللى انفعلت مؤخرا
و شويه تانيه , انا بقي عندي رجيم تحفه و حاوديكي جيم عشان تخسي شويه, اخلص بس اللى ورايا و حافضي لك
الحمقيه .. تخسي؟؟؟؟؟ تخسي ايه دا انتي طبقتي و بعدين ما تبص لنفسها الاول و لا ابنها اللى شبه بوابة الاستاد
انتي ماقلتيش لحد على الكلام ده؟؟..... الراسيه
انففففففف , لأ خالص مكنتش بارضي اقول لا لبابا و لا ماما عشان ميحصلش مشاكل, انتي عارفه بابا ميعجبوش الحال المايل
انا .. سؤال برئ يفرض نفسه, الااااا هو العريس راح فين؟؟؟
يعني حيكون كلته القطه!!!!.. الحمقيه
كنت باشوفه كل اسبوع مرة و برضه كل حاجه ماما ماما, خسي زي ماما, ماما حتوديكي مش عارف فين , دا حتى الهديه اليتيمه اللى جات لى امه هى اللى باعتاها
بصي يا سمر .. ديه الراسيه .. انتي لما بتتجوزي ما تفتكريش انك بتاخديه لوحده, انتي بتاخديه بامه و ابوه و عيلته و ممكن اللى يتشدد له كمان
راحت سارة الحمقيه هاببه فيها
للللللللللللأ مش للدرجه ديه , ده كتير و مش طبيعي , مش تشوفها الاول حاتحافظ على بيته و حتعرف تربي ولاده و لا لأ و لا حتتحمل مسئوليه و لا لأ بدل ما تكلمها على السابوه اللى مش عاجبه و الدلع اللى مش وقته
هبه الراسيه تراجعت شويه لورا بدل ما سارة تتهور و تلوشها
أأه عندك حق بس ديه امه يعني
اه ما انتي اصلك حماتك طيبه مش مفتريه , مش كل الناس زييها كده
طيب امال ايه اللى حصل ؟؟؟... انا انا
استمرت برضه فى موضوع النصايح ده انتي مش بتحطي مكياج كتير ليه؟؟؟ ده متضايق اوي, هو انا مش قلت لك عاللى بيحبه ؟؟ و برضه مصره على البلوزه الخضرا!!!! هو انتي كل شويه تتكلميه معاه على الشغل , و بعدين لنش ايه اللى بتحلمي انك تركبيه, انا باقول لك ادلعي و اضحكي عليه, اعملي زي باقى البنات ما بتعمل
انا بقي حاولت افهمها انه احنا لسه فى فترة الخطوبه و اللى ليها حدود برضه و الكلام ده كله بعد الجواز و ان انا باتكسف شويه و اصلا ملحقناش ناخد على بعض راحت هابه فيا حدود ايييييييه؟؟؟ مش شايفه قريبتك كانت بتعمل ايه ايام الخطوبه, ديه كانت بتقابله بالشورت و ياما راح عندهم و كان بيزورهم و لا كان فيه خطوبه و لا بتاع لسه, مش شايفة البنات, انتي اللى مش عارفه تجذبيه ناحيتك, دا البنت اللى قبليكي كانت لاوحاه بس هو اللى لقاها خيخه كده مش بتاعة مسئوليه
ااستغفر الله العظيم ... دا انا بدل ما اشتم
هبه الراسيه .. الست ديه عندها بنات؟؟؟ لا يمكن
سارة الحمقيه .. ستات عايزين ضرب النار
طيب و الموضوع خلص ازاى؟؟
ابدا بعدها اضطريت اقول لماما و اللى قالت لبابا و اللى كلمه على الحاجات ديه كلها و برضه بسلامته كلم امه
يعنى امه اللى شافت له العروسه و هى اللى خطبت له العروسه و هى اللى بتنهى كمان؟؟ ده بيعمل ايه فى حياته ده غير انه بيكلم امه .. انا اصلي اتحمأت
بس و راح بابا باعت له الشبكه و خلص كل حاجه.. انفففففف
شايف انه بني ادم مش مسئول و مالوش شخصيه , و مش حايحافظ على خصوصيتي , اذا كان بيعمل كده ايام الخطوبه امال بعد الجواز ممكن يقول لهم ايه و قاللى انه مش حيبقي امين عليا
طيب و انتي قاهرة نفسك ليه ؟؟؟ فى داهيه... الحمقيه
عشان الحاجات خلصت كده و بابا برضه ماخدش رايي فى الموضوع ده
بصي يا سوسو .. اللى عايزاكي تتأكدي منه ان ابوكي عايز مصلحتك, و بعدين هو اتصرف صح , ممكن الموضوع يكون صعب فى اوله بس احسن ما تدبسي و بعدين نقول يا ريت اللى جرا ما كان .. الراسيه
انا بقي برضه قلت اقول بقين جامدين
يا بنتي ده كان حيعيشك فى بيت ازاز , كل الناس عارفين ايه اللى بيحصل بينكوا و خصوصا امه , اللى ميحافظش على خصوصية مراته و كل حاجه تتحكى كده ميبقاش راجل و بعدين الكبار اوقات كتيرة بيشوفوا اللى احنا مش شايفينه و ابوكي عنده حق فعلا, ده بني ادم مش مسئول بالمرة و امه لاغيه شخصيته و شكلها مسيطرة عليه , بس سؤال و الله ايه الضحكه ام ديل ديه!!!!