سكاكين سكاكين

داخله من الحسابات على الطرقه اللى بتوصل على مكتبي و انا بادندن باحدي اغاني المطربه اللولبيه الجباره , جيني , أمبو لأ الأمبو لأ,طبعا بمنتهي الوقار, ماسكه انفسي من التراقص على رجل و نص, و انا باحرك دراعاتي زي مكنه الفرم, كنت فايقه الحقيقه

و أوفوجأ بعزه واقفه نص واقفه كده و متسنده على الحيطه و عينيها عماله تنور و تضلم و تنور و تضلم

هه ايه مالك؟؟؟

اااااه سكاكين يا أزميرالدا سكاكين, مغص ,

لا حول و لا قوة الا بالله,انتي بترتعشي

مش قادرة, حاموت

يا شيخه بعد الشر عليكي ,طيب من ايه ده

ماعرفش, عايزة اقعد, ااااه

اكلتى حاجه من بره؟؟؟

ايوة بس دانا لسه مخلصه , ميلحقش, اااه حاسورق

انتي سخنة طيب؟؟

قعدنيييييي مش وقته

انا ارتبكت الحقيقه, مش باحب الحاجات المفاجأه ديه

ططططيب, اسندي عليا, ده اتاري البني ادم ده غلبان اوي, نفس فى قفص,

الحقيقه شكلها ما صدقت و لا ايه, فريحت مش سندت بس, كان جسمها كله بيتنفض يا حرام و وديتها مكتب كده كان فاضي , و لقيت البنات جايين

بصي انا حاقول لعم خليل يعمل لك نعناع و لا حاجه يهديكي

لأ لأ مش قادرة , و هي ماسكه بطنها من الالم, يا دي الخيبه و بعدين

لأ بس اسكتي انتي , لازم حاجه تدفيكي

و رحت مكلمه عم خليل من على الباب

لو سمحت و الله يا عم خليل, اعمل نعناع و لا ينسون , مش عارفه لسه ممكن اشرب ايه , قققصدي عزة يعني

و راحت قايمه تاني , مش قادرة اقعد يا جماعه,

ططيب بصي حاقفل الباب و حاولي تريحي,

حاولت تنام على ضهرها و فضلت ماسكه ايدي و هى بتتألم

و انا عماله اطبطب عليا و بدأت افكار سودا تتجمع فى دماغي

طيب فرضا هي رجعت دلوقت حاعمل ايه؟؟ , موضوع ان حد يرجع عليا ده طووووول عمري معنديش استعداد ليه

انتي عايزة ترجعي و لا حاجه؟؟؟

لأ

طيب الحمد لله

و فضلت تضغط على ايدي, و انا باطبطب عليها, و بعديييييييين

جات لى فكرة جننيه, على اعتبار اني حاعمل خير يعني, و قلت ادفيها, قمت جبت طرح الصلاه و بدأت الفها حوالين بطنها

انتي بتعملي ايه؟؟

يا بنتي بادفيكي, ريحي انتي بس

انتي بتكفيننيني مش بتدفيني,اااااه

الاخت نرمين تطوعت ببق غريب كده

حد يدفي حد بطرح الصلاه؟؟

طيب روحي هاتي السجاده تقيله شوية

تكنيش حامل يا عزة؟؟؟و الله برضه قلت اسأل يعني

حامل يا دي المصيبه!!!!!! ازاي, سمر اللى حاتشلنى

يا ماما هي متجوزة ,متجوزة, صحصحي

أه صحيح

يمكن حاجه من الاكل؟؟؟

أاااه لأ ما كل الناس اكلت منه

طيب بطنك وجعتك قبل كده؟؟؟ ما انا لازم اجمع شوية معلومات برضه

لأ فجأه , مانا كنت كويسه خالص, اه يا اني

تكنش ذايده؟؟؟

لأ مش مكان الذايده

و بعدين بقيييييييييييي, انا عماله اجيب الاحتمالات كلها

كل ده كان بيحصل بسرعه غريبه,كان فيه حاله من الارتباك العارم, محدش فينا عارف يعمل ايه, غير انها فضلت ماسكه ايدي و انا عماله اطبطب علياها, يوه بقي مش باحب ابين عواطشفي كده

شيرين بقي, يا جماعه لأ مش حاينفع, تعالوا نوديها المستشفي

اه فكرة برضه, بس ثواني اخلص الينسون مدام هي مشربتوش خسارة يعني

و سندناها و طلعنا الشارع, تعالوا نروح مستشفي النور,

يلا بينا و اتزنقنا فى عربية شيرين, سمر كانت عايزة تيجي معانا

فانا طبعا لا خليكي انتي هنا , مينفعش كلنا نسيب الشغل كده, الواحد برضه يظبط انفعالاته
لأ عايزة اجي معاكوا ماليش دعوه
اللهم اخزيك يا شطاااااان, المرة الجايه , يااااالاااااا يا ماما, اصلها عيله جديده لسه
و اتزنقنا فى العربيه المليانه كراكيب على كرسي ابنها, ايه ده عملاها رف مطبخ ديه
باقول لكوا ايه , الدنيا زحمه , تعالوا نروح مستشفي الرحمه اقرب
فانا و نيرمين وافقنا طبعا, الحاله تتطور و لا بتاع ننجز يعني
بعد ما مشينا و غيرنا الاتجاه و وقفنا عشر دقايق فى اشارة افتكرنا ان فيه مستشفي لازقه فى ضهر الشركة بس الحقيقه اتكتمنا , بلاش نزودها على عزة , و وصلنا و نزلنا بسرعه
عايزين دكتور بسرعه

ولاده؟؟؟؟ ديه ممرضه جات بسرعه مخضوضه
لأ مغص
أأأأه , طيب انزلوا تحت الطوارئ
و دخلنا الطوارئ ديه و قعدنا عزة على الشزلونج و استعدت للكشف, و انا فضلت معاها الحقيقه , مش على سبيل الفرجه يعني و لا حاجه, بسسسسسس هو الفضول
و دخل دكتور ذكر ابيض سكومونتوس شعره سايح نايح على الخدود يهفهف شاب طازة اخره خريج 2007, مش لابس نضارة , فيه دكاترة بالشكل ده!!!!!!!, ده انا لو مش عارفه انه دكتور كنت قلت عليه خريج كمبيوتر ساينس, اصلهم بيبقوا كده معظمهم يعني, لابس اللبس بتاع الدكاتره ده , مش بالطو لأ, اللى اسمه سكربس ده, تيشيرت نص كم و بنطلون , لونه بنفسجي, من التعقيم اظاهر و لا ايه و شكله لسه صاحي من النوم
المهم دخل , و بدأ التفعيص فى البنيه و هي بتصوت
الشاب الحليوه شويه يفعص و شويه يقف و احس انه بيحل سودوكو و احيانا كده يتهيألي انه بيكلم نفسه
هو , يعني احتمال ذايده؟؟ لألأ ما ظنش و هاتك تفعيص مع موسيقي تصويريه عبارة عن صوات, زي لعب الاطفال اللى تتكي عليها تصوصو بس ديه بتصوت
يا دي المصيبه دي لو عندها الزايده كان زمانه فجرها لها
و شويه يقيس الضغط
طيب انتي عندك قئ؟؟
لأ تقلصات بس
اممم , غريبه , متأكده ؟؟؟؟
يااااا ربببببب, دا انا فى سري
طيب ثواني
و راح عامل مكالمه كده بالانجليزي , كلها مصطلحات , اعدم الواد ميمي لو كنت فهمت منها حاجه, و راح جاي بسرعه كده عندنا, طيب فيه اسهال؟؟؟
لأ مفيش , أأه
امممم, لأ مفيش , و هو بيكلم اللى بيكلمه ده
ططيب شكرا, و خلص المكالمه و راح على المكتب
بصي يا مدام , انا حاديكي حقنه مسكنه دلوقت , و حاكتب لك حبوب مسكنه برضه, حاول تاكلي اكل خفيف بلاش المسبك عشان احتمال يبقي فيه قئ, و اعملى التحليل ده
يا حلاوة ده اتاري الطب سهل, مانا كا ممكن اقول لها البق ده
هي عندها ايه يا دكتور؟؟؟
روتا فيروس, بس مش عايزك تقلقي , هي زي النزله المعويه بالظبط, و احتمال يجي اسهال بالليل او قئ
ايه ده كله احتمال احتمال كده
روتا فيروس؟؟؟ يا دي المصيبه , انا قلت الكلمه ديه فى سري, ليا طفل قريبي دخل المستشفي اربع ايام و ربنا ستر الحمد لله و اعرف واحد تاني شرحه
بعد ما سمعت البق ده , سهمت و عينيا بدأت تدمع و رحت لها بعد ما اخدت الحقنه و حضنتها جاااااامد
نرمين و شيرين بقي , ايه روكا فيروس ده ؟؟؟ بصيت لهم باسي كده شويه , برد برد
معلش يا حبيبتي , ان شاء الله خير, مش عايزة حاجه قبل ... قبل ما تروحي
شكرا يا أزميرالدا , تعبتكوا معايا معلش
تعب ايه بس اوعي تقولي كده
لا حول و لا قوة الا بالله باقول لك ايه
أأه ايوه
هي فلوس الجمعيه فين؟؟؟
معايا فى درج المكتب ليه؟؟
لا و لا حاجه , كويس كويس
و جوزها جه جري بعد ما نرمين كلمته , كان مخضوض يا حرام
بصي ريحي بقي و خدي بكره اجازه
و الله عزة ديه كانت طيبه
تاني يوم بقي أفوجأ بيها جايه بعد الضهر و الغريبه كانت عادي يعني
الله , عامله ايه ؟؟ و التحاليل قالت ايه؟؟
لااااا ده طلع القولون , كان تعبان شويه
قولون؟؟؟؟؟ بسسسسس؟؟؟؟
يخيبك دكتور , و هاتك يا تفعيص و حترجعي حترجعي, قال و انا اللى اتوهمت
دا الطب عيل اوي يا جماعه