استثمارات البنات المتفرقعه

شاءت الظروف اني اقابل نور صاحبتي فى احدي المولات المعروفه, بعد امواء امواء و النم على مخاليق ربنا و ايه الحلاوه ديه و مين اخر واحده اتنفخ فى صورتها و عملت اي انجاز يذكر فى حياتها اذا كان دبلومه و لا شغل و لا جواز, لفت نظري خاتم دهب لابساه فابديت اعجابي الشنيع
ميرسي يا أزأوزه , ديه من مخلفات الحرب التانيه
هه؟؟؟ مش واخده بالي
استني كده .. و راحت مورياني السلسله اللى هي لابساها
بصي و ديه من غنايم الحرب التالته
باقول لك ايه ؟؟؟ تعالي اغرم و اعزمك و حلى لى فوازير رمضان بتاعتك ديه
و رحنا قعدنا على احدي الكافيهات
ها يا نونوس احكي بقي
طبعا انتي عارفه اني ارتبط حتى هذه اللحظه يجي كده خمس مرات ما بين فاتحه و خطوبه و حد بيتكلم عليا
ايونننن تمام و ربنا يكفينا شر الفككان مانا مجربه و عارفه
الاولاني يا ستي كربط كلام عرض , خلي بالك من عرض ديه, ان نكتفي مبدئيا بدبلتين و خاتم هديه, و الشبكه بعدين يعني, قلنا ماااااشي المهم فات اسبوع اتنين , الشبكه حضرتك؟؟
معلش اصلي مسافر
بعد شهر,المفروض فيه شبكه و لا ايه؟؟؟
معلش اصل ماما تعبانه
فات شهر و نص الناس بتسأل على الشبكه
اييييه ؟؟؟ انتي مستعجله على اييييييه؟؟؟ انتي ايش عرفك ظروفي عامله ازاي؟؟؟
بعد شهر و نص يا عزيزتي داخل خارج طافح و
انا اسف مش قادر اكمل
اتاريه كان خاطب مرتين و فى المرتين كع الشبكه فقال لك لأ اجرب الاول و اشوف نفسي و ديه كانت اول غنيمه , خاتم و الدبله بعتها و بعض الهدايا اممممممممم , مش المفروض الحاجات ديه من حقه؟؟ لأ هو اللى سايبني , يبقي ميخدش حاجه نيجي للتاني بقي جاب الشبكه على طول و عملنا حفله فى قاعه اتكلفت الشئ الفلاني , بعد فترة البيه حن لحبه القديم فعايز نفركش و قد كان ..فركشنا بهدوووووووووء و طلعت بالشبكه, اصلي كنت اول ارتباط بشبكه فمخسرش اوي يعني و احترم نفسه و لمها
التالت بقي؟؟؟؟
التالت بقي ده هو اللى كان حرب بجد
ازاى يعني؟؟؟
يا بنتي من اول ايام و انا حاساه كده مش مبسوط و تحسي كده مزقوق على الجوازة و لا اايه؟
ها احكي يا شعر زاز
جبنا الشبكه , مااشي و بررررررضه عملنا احتفال مهيب ,و الله اهلي دول صعبانين عليا
مايكلمنيش فى التليفون و يقول لي اصلي مشغول و قال ايه كلميني انتي, اشوفه مره كل عشر ايام, مفيش اي تجاوب
و مسبتيهوش ليه
لأن مفيش سبب محدد , تخيلي رحت قلت لابويا اصله مش بيكلمني و لا بنخرج كتير و بعدين قلت اصبر شويه و مابقاش خفيفه يعني , لحد ما فى يوم الاقي امه بتكلم ماما و هاتك يا شكوي
منه ؟؟؟
مني يا ساذجه قال ايه مش بادلعه , و السابوه البني مش عاجبه و كذا مرة نصحني مالبسش الطقم الازرق عشان مش بيحبه و انا ماسمعتش الكلام و ده كله مش صحيح طبعا و كلام اهبل كتير كده
و كل ده ليه؟؟
عشان قال يعني ان انا السبب فى فشل الخطوبه , لأ و البجاحه بقي عايزين الشبكه على اعتبار انها شقي عمره اللى عايز يتقصف طبعا ماخدش حاجه و كذلك اللى بعديه و اللى بعديه
مممممممم دا انتي كومتي ثروه على كده
و الله ابدا لسه ماجبتش تمن العربيه و اديني اتخطبت لسادس مرة اهه و اما اشوف اخرتها يا بنتي دخول البيوت بقي سهل و الرجاله شامين نفسهم, بيتعاملوا على ان البنات على قفا مين يشيل, اخطب ديه و اسيب ديه ما التالته موجوده, صدقيني ده احسن عقاب لأي واحد داخل بيوت الناس عشان يلعب و لا يتسلي
طيب فرضا فرضا يعني انتي اللى زهقانه و مش عايزه تكملي ؟؟؟ ما انتي حتخسري الشبكه كده
أزميرالدا اصحي انا مش باتخطب عشان افك , هي بتيجي كده , و بعدين بقي لو على كلامك مانا ممكن اقعد اقرف فيه لحد ما يبخ هو
و صدقيني هى حاجات معينه اللى بتحرق دمهم
زي اييييييه يا موسوعه؟؟؟؟
لو هو متدين البسي محزق و قولي هو ده لبسي , لو فرفوش قفليها فى وش اللي خلفوه.. ماتمسكش ايدي.. مينفعش نخرج لوحدنا.. تكلمني فى التليفون و بابا بيسمع من الناحيه التانيه احكي لاهلك على كل حاجه و عرفيه ده , حاولي تتحكمي فيه.. غير تسريحه شعرك .. لبسك مش ستايل.. غير الشقه ( ديه لوحدها كفايه اوي ) .. لأ و كله كوم و امه كوم تاني .. حاسسيه انها ست خنيقه.. اتخني و كلي زي الخنزير ادامه.. تقلي فى دمك على اد ما تقدري .. لا تتكلمي و لا تهرجي.. ان شالله حتي تلعبي فى صوابع رجليكي و تشميها ادامه
يا لهوي على الشر, انتي مكنتيش كده, دا انتي كنا مسميينك الحسيسه
و هو اللى الواحد بيشوفه ده مش كفايه انه يغيرني
طيب فرضا بقي فرضا هو فضل لازق و مامشيش؟؟؟
بصي يا ستي يا امتن تتنازلي بقي و عوضك على ربنا و تسيبيه انتي
أو يا خبرة؟؟؟
يا امتن تعيدي النظر تاني فيه لأنه ممكن يبقي شخص تقيل و صبور و حيستحمل و شكله شاريكي, الرجاله بقت خفيفه اليومين دول, صدقيني, تصحي الصبح تلاقيه مطلقك بدل صباح الخير, و انتي بقي ترجعي لطبيعتك معاه و يبقي اتنين فى واحد .. العريس بالشبكه
و الله ديه استثمارت كويسه
البنت من دول تتخطب تتفرقع تاخد الشبكه او تتخطب تقرف فى عيشة اللى خلفوه و برضه تاخد الشبكه
ابقوا قابلونى لو فيه دهب اتباع الفترة الجايه
تفتكري العربيه تيجي بعد كام خطوبه؟؟؟