ده حرنكش

بما اني عامليه ريجيم اليومين دول, الله يقطع صاحب الاختراع المنيل ده, فاكلي لا يخرج عن الفاكهه و بس
موضوع الخصم عشان الاكل على المكاتب ده خف شويه, ده اللى لاحظته يعني , اظاهر قوة ملاحظتي خفت بقي و لا ايه
فى يوم ما كده قلت اكل بقي زي مخاليق ربنا و العيال قعدوا يتحيلوا عليا اكل بما ان وشي بقي زي اللمونه و بما اني لسه قابضه .. فنتيجه لهذه الضغوط الجباره و احتفالا بالمرتب ..طلبت برجر و بطاطس و شيبسي تاني و هيييييييييصه
و قعدت فى المكتب و ظبت الحاجات, البرجر بايد و الشيبسى بالكاتشب فى درج المكتب
باقولك ايه يا ضياء, هو لو مستر طارق قفشني فيها مشكله؟؟؟؟
لا عادي ما كل الناس بتاكل دلوقت , ما هو شاف مستر وفيق و هو بياكل قبل كده و انا برضه
مممممم ماشي
و سمعت كلامه و خلصت على الساندوتش ..كنت خلاص فاضل قطمتين و دخل طارق
هااااااا , تلات ايام , بيقولها و هو بيشاور بايده و بيحرك صوابعه التلاته, خصم
انتي ؟؟؟ انتي يا ازميرالدا تعملي كده؟؟؟؟؟
انا افتكرته بيهرج و الله فقعدت اضحك, كنت جريئه اوي ساعتها
و بعدين لما لقيته بيطول سكت و بدأ التزييق
ما كل الناس بتاكل على المكتب ؟؟ اشمعني انا بقي الله
انتي وضعك مختلف, اتفضلي فى البوفيه و راح مشاور على الباب
و مسك مستر وفيق و ضياء ظبتهم, على اعتبار انهم قدوة يعني و انا العيله الصغننه المفروض اتعلم , و ده اللى عرفته من ردود افعلهم معايا بعدها , مانا السبب
طبعا كانت فرجه برضه
نفس الناس اللى تسوي و اللى متسواش اللى كانوا من اربع سنين
و جه ورايا فى البوفيه تاني و الله العظيم يا أزميرالدا لو كررتيها تاني مانا ساكت لك
يا دي المصيبه , ده قفشني مع ساندوتش مش مع واحد, امال بقي لو كنا قفشني مع ميمي كان عمل ايه, من الواضح لازم اشيل موضوع ميمي ده من خيالي خاااااالص
طبعا قعدت انفخ شويه مع البنات , يوه بقي ما كل الناس بتاكل على مكاتبها
يا بنتي لما بيقفشنا ساعات بيطنش و احنا بنلم نفسنا برضه, لكن انتي مالمتيش نفسك حتى و قعدتي تضحكي
اديني بانهنه اهه يا اختي , مانا فاكراه بيهزر و العيال الجداد كل ما يشوفوني يضحكوا , ده حلق كرامتي و برستيجي حلني بقي على ما ينبتوا تاني
و طلبني المستر و انا الحقيقه ماسكه نفسي اني اضحك تاني
و قفلت الباب منعا للاحراج ان الوصله التالته توصل لمسامع الناس
هو ايه بقي؟؟؟؟ مانت و كل الناس بتاكل على المكاتب
انتي لما كنتي بتاكلي فاكهه قلت لك حاجه ؟؟
لأ
انما برجر على المكتب, سوري يعني و بعدين انتي لأ , لو شفتي حد بيعمل كده تقولي و بعدين البوفيه كان زحمه , كان ممكن تشيلي الساندوتش ده و تكمليه بعدين
لاأأأأأأأأأأأأأ , كله الا اني اقطع وصله الاكل, ابتديت حاجه اخلصها
انتي اخر واحده كنت اتوقع منها ده, انت وضعك مختلف ..الا انتي
يا دي المصيبه , ده شويه و ممكن يقيم عليا الحد
طيب زود لى المرتب, قلتها و جريت و سمعت صوت رزع ورايا , الله اعلم بقي دباسه خرامه حاجه كده معدنيه
و رجعت تاني بالراحه و انا مطرطأه دماغي من الباب
هو انا فى الخصم مدعيه و فى الذياده منسيه
طبعا مستر وفيق يومها قفش عليا
مستر طارق قال الفاكهه ممكن, ممكن بقي اكل حرنكش؟؟؟
أزميغالدا لو سامحتي كفايه الكلام اللى قاله , لأ مفيش اكل هنا
و الله العظيم قال اوكي على الحرنكش
خلاص يطلبني و يقول لى بنفسه
يا لهوي ده حرنكش
اللذيذ بقي, ضياء
يعني ممكن نجيب بطيخه و ناكلها هنا مدام الفاكهه بس مسموح بيها؟؟؟
بصت له بصه مش اللى هيا و برضه كل ما الاقي مستر وفيق مدير وشه اجى مطلعه شويه حرنكش و شويه ابو فروة و القطهم
هما اللى اضطروني لكده
وعلي الباغي تغول الغواغل