ملل خنيق بزهق

ملحووظه أهه
البوست ده ملياااان كابه وزهق, عشان محدش يقرا من هنا و اسمع بقي كلام نوعية " منك لله يا شيخه " او " احنا ناقصييين " , ويا ريت .. يا ريت يعنى , محدش ياخد على كلامي فى البوست ده

حاله من الملل الخنيق , يا لهوي على البدايه , ملل .. و خنيق كمان !!!, بتضغط على مراوح حياتي اليومين دول , ماليش نفس اعمل اي حاجه فى اي حاجه , الحاجه الوحيده اللى نفسي اعملها بجد اني ماعملش حاجه, باقوم من النوم مضروبه باللاموأخذه النار

يا سااااتر لسه حابتدي يوم جديد!!! شغل و بعدين أروح اكل و انام, ما افضل نايمه بقي و خلاص مدام اليوم كده كده اخره نوم
ارجع من الشغل من الساعه خمسه اكل و انام , طبعا قبلها قرارات حاسمه انه لأ مش حانام تطور ل حاريح نص بس و تستقر على النوم تلات ساعات متواصل
اظبط المنبه , افاجأ اني قفلته و انا نايمه, ابعده عن ايدي خااالص , ماعرفش باوصل له ازااي, لأ و المصيبه اقوم ابتدي رحلة البحث عنه, مرة تحت السرير, مره تحتي شخصيا, و لما اقوم , باقوم و انا بأجرجر رجل ورا التانيه
رحت معرض الكتاب مرتين السنه ديه , جبت كميه كتب محترمه , كل اللى قريتهم تلات كتب بس, امووووت و اكمل الباقي بس الرغبه فى عمل اللاشئ مسيطرة

حتي التدوين , نفسي اكتب بس مش عايزة , كذا مرة قررت اكتب و اظبط نفسي و افتح الكمبيوتر, الاقي الجو تلججججج و فيه تيار هوا مش عارفه معدي ازاى من المتاريس اللى عاملينها؟؟ ايه السقعه ديه يا اخواتي , ايديا بتبقي متلجه , فألم نفسي كده بالرااااحه و انا باقفل الكمبيوتر بكل أسي و اروح انااااااااام

ممكن موضوع النوم ده سببه الملل اللي باشوفه و الافكار اللي ما يعلم بيها الا ربنا اللى بترفرف فوق نافوخى و انا صاحيه, مش عارفه ليه فبراير عندي شكله كده, حتي بدأت اسميه اكتراير, اكئتاب على فبراير
حتي فى الشغل, الفكرة المسيطرة عليا هي امتي حاروح عشان انااااام, ممكن من الجو و الكلفته اللي انا فيها؟؟ باكرة
لبس الشتا , ناقصه كعبرة أنا!!!!, بابقي عامله زي الكرة الصوف
ممكن بانام كتير عشان مأفكرش؟؟؟ اوقات كتير لما يكون عندي مشكله جامده بيبقي عندي رغبه فى النوم جبارة, يمكن هروبا منها؟؟؟ بس مفيش مشكله محددة المعالم على حسب علمي يعني
افكار عجيبه الشكل تيجي بقي اول ما افتح عيني,

بابتي و مامتي قعدوا يحبوا بعض خمسه و عشرين سنه بعدين بابا مات و سابها, طيب يعني انا اقعد احب فى واحد و اتشحتف و فى الاخر يموت كده, و اتقهر ,او انا اللى اموت بعدين هو يتجوز على اعتبار ان الراجل مينفعش يعيش من غير ست,فادني ايه الحب كده؟؟؟؟ قلته احسن بقي, بلا خيبه ده على اعتبار ان فيه حد مثلا, الحمد لله مفيش

شويه و افتكر اغنية ايظن , المزة بتقول "ابقي تعالي بالليل و انا اوريك الويل" الويل ده حاجه وحشه و لا كويسه؟؟؟ طيب لو هى متجوزاه ده يبقي تهديد؟؟؟ ما هو كده مش حاييجي.. بس هي بتقول " ابقي " معني كده انه مش متعود يروح لها, ده معناه انهم مش متجوزين , طيب ما كده تبقي اغنيه مش ولابد و تدعوا ان كل واحد يروح لاي واحد و يوريه الويل, و ليه الويل أصلا؟؟؟
ليه بنقول عينيا فى وسط راسي؟؟؟ ما هى لو في وسط راسي , حتبقي باصه لفوق, حاشوف اززاي كده؟؟
بعد ساعتين نوم , بافتح عيني , طيب ما انا كده مش حاعرف انام بالليل و حاديها تفكير برضه , مبدهاش بقي انام التالته

اصحي , و سبحان الله , مستغربه من الصداع القاتل
بعد الساعه التالته افتح عيني تاني, ده الساعه عشرة و نص , طيب ما ممكن اكمل للصبح بقي و خلاص, مجاتش على ساعتين , بس افتكر الصلاه و انى عايشه لاسباب اخري
من الصحيان الفعلي للقيام من السرير اساسا برضه افكار ما يعلم بيها الا ربنا
بعد عشرين سنه ممكن اكون باعمل ايه؟؟؟ طيب لو انا كنت سنة 1919 كان زماني باعمل ايه؟؟؟
فى الغالب عندي خمس عيال و حامل فى السادس و بافكر فى البت اللى داخله على سن جواز و خايفه توصل للتمنتاشر و تبور و فى البت بنت خالتي اللي بناتها التلاته الكبار اتجوزا قبل ما يتموا خمستاشر و افكر فى جوزى اللى راجع من شغله هلكان و اني عايزة اروح ازور أمي
اعتقد اسمي مكانش حيبقي أزميرالدا ,ممم ممكن رتيبه ,
موضوع اني حاعمل ايه بعد عشرين سنه, فالاعمار بيد الله بقي, يحييك و يحيينا ربنا, فى ظل الاوضاع الراهنه معنديش اي خطط لسه, غير الحسبنه
شويه و أفتكر مي اللى اتلطقت و ريم برضه اللى اتطلقت بس طلعت بعيل و هند و هبه و ولاء و كتير الحقيقه, اللى قرفانين و طلعوا كانوا فاهمين الجواز غلط, و أحمد ربنا على كل اللي يجيبه, لأن كله خير
لما أتجوز نفسي فى تلات بنات اربيهم كويس و ادخل بيهم الجنه, انتهازيه
طيب اروح جيم ؟؟؟ الدنيا ساقعه
عايزة اخس عشرة كيلو, كده اموت من الجوع, هو الزبادي بيتخن؟؟؟
مرة قريت المفروض ماكلش برتقال مع لبن , عشان تفاعلات كده ممكن تحصل و يتخن, كل مرة باعمل ده باحس بتأنيب ضمير
بافكر اروح اضرب شعري اصفر او احمر , الكوافيره باعت المحل, حللني بقي
طيب احلقه و اعمل حرف الأز زي الواد زيدان ده بتاع الكورة
حيكون ايه رد فعلي لو صحيت من النوم و لقتني قارعه؟؟؟
ابن خالي يكلمني فى عز افكاري , ممكن اجي تحلي معايا شويه؟؟
ماشي يا سيدي تعالي, و عرفت انه تخليص لذنوبي بتاعة المدرسين, و دلوقت عرفت شعورهم و رد فعلهم لما يهاتوا و قلبهم يتنبح و الحصيله تكون صفر
بعد اربع سنين شرح و برضه بأعيد نفس الكلام و قربت فعلا ,بعد التهديد اكتر من مرة اني حاعملها ,أبوس ايده عشان يذاكر عشان خاطر أبوه و أمه
فكرت على سبيل التغيير أني اروح أخرم حاجبي او مناخيري او شفتي و احط حلقه بس اكتفيت بخرم وداني تاني فعليا
استكمالا لسلسلة التفكير بعبط

لو أنا شاب كنت حابقي حليوه؟؟؟ مش باحب الرجاله الحلوين اوي دول , باحسهم كده حاجه تموع النفس
طيب لو انا شاب ايه الاحاسيس اللى كنت حابقي حاسسها فى الوقت الحالي؟؟
طيب ايه الافكار اللى ممكن تخطر على بالي ؟؟؟
لو انا شاب و قابلتني كان ممكن احبني؟؟؟
قاهره نفسي عشان أخس و بعدين حاخس و ربنا يسهل و أتجوز و أحمل و أتخن و أخلف و أبتدي القهره تاني, ما أوفر الرجيم اللى باعمله ده

أقوم نص قومه من السرير و أقعد و انا باصه فى الارض و الافكار بترفرف برضه

مانا ممكن اروح اعمل عمليه و اصغر مناخير و اكبر شفايفي و اضرب لون برونزى, بس حابقي شبه شمبانزي شفته من كام سنه
طيب لو عملت الحاجات اللى فوق ديه كلها,
اضرب شعري اصفر و اخرم وشي و احلق راسي بحرف الأز و مناخيري و شفايفي و اللون البرونز, حيبقي شكلي عامل ازاي؟؟
البنات بتوع الانجيري دول اللى فى الكتالوجات او الفيديو كليبات مبيكسفوش و اساسا معندهمش أهل او على الاقل اب مش سيفين؟؟؟
ليه مش باحب ايهاب توفيق و لا مصطفي قمر و لا حماقي مع ان عمرو دياب ميفرقش كتير عن تامر حسني؟؟؟؟

نفسي فى حتة عيل و ابقي ام بقي بس بالطرق المعروفه مش بالتبني .. طيب ما انا لازم اتجوز و عشان اتجوز يبقي لازم اتخطب و الخطوبه تكمل عشان اتجوز و اديني بحاول يعني .. و اديني رجعت لنقطة الصفر

شويه و افتكر الخطوبه .. استعيذ بالله من الشيطان و ابصق على شمالي ثلاث.. و اكتفي بثلاث بس بدل ما املي الاوضه و اموت مش من الغرق بس من القرف
يوم الخميس أسعد أيام حياتي لسبب وحيد ان بعده الجمعه, بأفكر في يوم الخميس ده من يوم السبت, و أقعد أعد الايام لحد ما أوصل له, يا ريت لو الايام كلها كده شبهه مش زي السبت ده , اليوم ده غريب اوي,

النهارده لبست كحلي فى زيتي , حاجه مناسبه اوي الحقيقه ,وقفت ابص لنفسي فى المرايا , أستغفر الله العظيم , ايه المناظر الغلط ديه؟؟؟ الناس ذنبها ايه بس, مانا ماليش نفس لا للبني و لا الاسود , مشيها كحلي بقي

يا رب عدي فبراير ده على خييييير و اكفينا شر المخبي