قرف تدويني

معظم الناس اللى بتدون ناس مش محترفه و منهم ناس بيكتبوا فضفضه و تسليه ليس الا ,مش واخدين الموضع على اعصابهم يعني ,بس تلاقي اللى ينط و يعمل فيها ناقد و هاتك يا نقد و استئناف و تحليل و تقطيع و أحيانا شتيمه كمان

ناس كتير بتتعامل على ان المدون ده حد محترف لازم يرتبط بقواعد و اصول الكتابه مع ان الموضوع فى الاصل مش كده يعني

انا تقريبا من الناس ديه , انا كنت عامله البلوج ده للتسليه ليس الا و بعدين الموضوع تحول اني بافك بيه عن نفسي بدل ما اكلم نفسي فى المرايا ,انا باشوف مواقف كتيرة و احداث و ناس بالهبل , مشكلتي الاساسيه ان كل ده بيعلق معايا , كل حاجه باشوفها بتلزق فى دماغي و اقعد احلل و اربط و ارتب, طيب ده حصل ليه و ازاي ؟؟؟ بيبقي مولد و صاحبه غايب فى دماغي , قلت فله و الله ما اكتب الكلام ده و اهو الزحمه تخف ,بعدين موضوع اني افك عن نفسي و بس تحول اني عايزة اقول راي فى الحاجات او بمعني اصح عايزة اعرض الحاجات و اهي تعليقات الناس تساعد اني ممكن اكون رأي , ما هي ديه احد مصادر الخبرة برضه..ممكن فيه ناس شايفة اللى باكتبه ده تهريج و خلاص .. مش لازم اقول كلام تخين عشان اقول فكرة فى موقف مريت بيه فعلا ..احيانا التعليقات متخرجش عن كلمه لطيفه خفيفه او ضحكه, بجد بابقي مبسوطه جدا ان قدرت على الاقل ابسط حد فى الايام الغريبه ديه .. احيانا باكتب عن حالة مرت بيا .. بافرح اوي برضه من كلمات التدعيم و ان حد كلف نفسه و وقف يعلق بكلمه شايف انها ممكن تخفف عني, بافرح من حد علق و فهم قصدي من البوست , فيه ناس بتاخد من البوست الضحك بس , بافرح برضه , ليه لأ الناس مش ناقصه عكننه حتى لو ده كان على حساب موقف كان فى حقيقته ماسوي.. فيه ناس فعلا باحس انهم جابوا اللي بين السطور..و فيه ناس تانيه ممكن تعلق بكلمه ضخمه على بوست كنت مهيسه فيه و ماقصدش بيه اي حاجه.. اوقات كتيرة بابقي فرحانه اوييييي بموضوع التعليقات ده بابقي عامله زي العيله الصغيرة .. مش مهم التعليق بيقول ايه .. المهم يكون فى حدود الادب و الاحترام.. من يوم ما بدأت التدوين و المواضيع بتيجي معايا كده .. مش بابقي ناويه علي موضوع معين.. بس بعد ما باكتب و اقراه.. باقول الله ده البوست ده فيه حاجه ممكن تتقال فعلا, مش باحاول اعيده تاني عشان احسن اسلوبي, باسيبه زي ما هو , على علته, اكتشفت اني

كتبت عن العيال القرود اللى اهاليهم عايزين يتربوا قبليهم

كتبت عن البنات اللي بيتغيروا علشان خاطر الرجاله و عشان ترتبط لحد اما مبقتش عارفه هي مين

كتبت عن الافلام الهابله اللي بيضحكوا بيها علينا و يقول لك سينما

كتبت عن هوس الشباب و الموضات الخايبه اللى بقت عادي عادي

حتى خيابات الانتخابات
كتبت عن ممارسات غريبه بنعملها
كتبت عن الحساسيه الزايده اللي بقت موجوده بين المسلمين و المسيحيين و الخوف و الشعلله
كتبت عن ان مفيش حياء و المهم المظهر , احجبها بس معلمهاش ان فيه اخلاق و سلوكيات لازم تحترم
كتبت عن هوس الاستهلاك

كتبت عن المعامله و النظرة للموظف الجديد

كتبت عن لهفة البنات على الارتباط مع التغاضي عن حاجات فى رايي اساسيه و حدود العلاقه اللي المفروض تبقي بين الاتنين و الخصوصيه

كتبت عن الاستهتار و عدم المسئوليه و الهزار عمال على بطال
كتبت عن رعب الاهالي على اولادهم من مجرد دقن او حتى كلام عادي فى السياسه

كتبت عن نظرة و معاملة حد مهم و مش مصري لحد عادي و مصري
كتبت عن محدثي النعمه و معاملتهم اللى من فوق و التناكه و السخريه و قلة الحيله فى عدم الرد لان الزبون على حق

كتبت عن كلام بقي زي اللبانه بنقوله عمال على بطال و مش فاهمين ده ايه

كتبت عن اسعد لحظاتي و اتعسها

كتبت عن نفسي و اكتشفت اني مشرحه نفسي فى البلوج ده , على راي خالي , بأجلد نفسي

كتبت حتي عن مواقفي مع التليفونات و الشركات اللى بقت عامله زي الشفاط

هيست كتيييييييير اوي برضه

اوقات كتيره باكتب بوست لحاجه فى نفس يعقوب.. اوقات كتيرة المقصود مش بيوصل و اوقات تانيه فيه ناس فعلا بتقول راي زي الفل .. انا احيانا مش بانزل بوست الا لما اشوف تعليق ناس معينه كده و حاشوف حيقولوا ايه لأنهم ناس محترمه و ممكن يتاخد بكلامهم,هل اتصرفت صح , غلط؟؟ ..فعلا بابقي محتاجه رأي..الكتابه ديه شئ رائع فعلا .. عمري ما تخيلت اني اكتب الكلام ده كله.. عمري ما حسيت ان عندي موهبه او حتي قلت فى مرة اني باكتب .. بالرغم من ده الاقي ناس بتحكم زي ما اكون اديبه عظيمه منتظرة جايزة نوفل.. يعني انا جايه من الواقع للعالم الافتراضي عشان الاقي ناس تقرف فيا و تطلع عقدها عليا لأ و يا سلام لما حد محترم يحكم عليا و يكون رأي من خلال كلام مكتوب و حكايات ..مش يمكن حصلت لحد غيرى و انا حطيت نفسي فى نفس الموقف؟؟؟ مش يمكن عايزة اشوف نفسي بصورة غير الحقيقي ؟؟؟ مش يمكن عايزة افرغ شحنة غضب مثلا من حد بدل ما اكتم فى نفسي و يحصل لى حاجه؟؟و تكون النتيجه اني اتحول لقاتله مأجورة او اقوم بسلسلة جرايم لأي حد يبتدي اسمه بحرف اللام الف و بيحط اكس ..مش يمكن بدأت احس ان عندي بوادر موهبه و باجرب لسه؟؟؟ مرة انجح مرة لأ ,مش يمكن بالعب؟؟ مش يمكن الحاجات ديه, أصلا أصلا يعني ,من الخيال؟؟؟ مش يمكن باكتبها للذكري ؟؟؟ مش يمكن محتارة و عايزة اكون رأي ؟؟؟ مش يمكن تفريغ و تنفيس لمشاعر سلبيه و اسلم حل ليها تخرج بالكتابه؟؟؟ مش يمكن فضا و خلاص؟؟؟

انا حرة , حررررررررررررة , اكتب اللى عايزاه ,اللى اعرفه اني عمري ما شديت حد من قميصه عشان يدخل البلوج و لحد دلوقت القرايه عندي مش بالاكراه,مش فاهمه ليه واحد قايم الصبح كاره نفسه يروح يقول بق مالوش لازمه و يمشي ؟؟ ليه العكننه على خلق الله بدون داعي و الكلام بقلة ادب,مستتقل دم صاحب البلوج و شايفه بيستظرف او بيقول كلام مش و لابد, بلاه ,ليه توجع دماغك , عايز تقول رأي مخالف للي مكتوب , اهلا و سهلا بس بأدب و موضوعيه, ما هو برضه الناس فاتحه التعليقات عشان تشوف راي اللى بيقروا لهم و سهل اوي ان نقفل التعليقات

ممكن تقول رايك فى اللى مكتوب, مش نقدك, من غير ما تجرح اللى قدامك, اكيد لازم فيه اختلاف فى الرأي.. الكلام معمول للتواصل مش عشان نعور بعض بيه و اكيد اختلاف الراي فيه افاده

ساعات باشوف تعليقات عند ناس تفرس بجد, مليانه شتيمه و غتاته, ليه مش فاهمه؟؟؟ لو اللى مكتوب مضايقك اوي و حازز فى نفسيتك خسارة الوقت اللى حتضيعه فى كتابة تعليق تشتمه فيه.. لو حد مثلا علق بكلمة , انا مش عاجبني اللى انت كاتبه , ارحم كتير ما يقعد يديها اهانات و شتيمه, ايه اللى حايستفيده يعني غير انه بيعلن عن نفسه بكل اباء و شموخ , انا جوايا اسود و بني ادم أبيح

المهم اني لما جيت اختار اسم للبلوج خليته أهو كلام و السلام , على اعتبار ان الكلام ده و لا حيفرق مع حد, بس برضه اجي افكر ما فعلا الكلام اللى باكتبه ده ممكن يغير نظرة حد لحاجه او ينبهه لحاجه زي ما لقيت فى تعليقات قبل كده, بجد حاجه تلخبط, اتعامل بقي و اعيش الدور و فى هذه الحاله حيبقي دمي يلطش و لا امشيها بالبركه زي مانا كده و معقدش نفسي و زى ما تيجي ؟؟ اعتقد اني اختار الاوبشن التاني , نفسيتي اهم