ان يكون ابن خالتك هو هو مديرك

طارق ابن خالتي كان بالنسبه لي هو ذلك القادم من عالم الكبار , البق ده قريته فى حته كده مش فاكرة فين, عشان الحقوق الفكريه و كده يعني,دا انا حتى كنت باقوله يا أبيه
بما انه كان عايش فى كندا معظم فترات حياته فكان بيجي فى الاجازات بس فكانت كل علاقتي بيه لما يسلم عليا بطريقه العالم الكبار لما يسلموا على العيال الصغيرين بطريقه غريبه كده
ازيك؟؟
هي ديه بسسسسسسسس كانت حدود معرفتي بيه, لحد ما فى يوم كده بعد ما اتخرجت على طول جات لى مكالمه غيرت مجاري حياتي
أزميرالدا تعالي عيشي معانا, طارق عايز تشتغلي معاه فى شركته
ابيه طارق ؟؟؟؟ بجد
طبعا كنت حاموت من الفرحه مش اتشل بس .. دانا كنت شويه و حادهن وشي و اجيب علم مصر و الف بيه فى الشقه , خيريجه جديده بلا ادني خبرة فى الحياه و معرفه تقريبا باللاشئ تضاهي زيرو
بس اكيد طبعا يعني هو شاف فيا ان يجي مني و الا مكانش شغلني معاه, انا مش ميح اوي يعني برضه
اول حاجه طبعا اتقالت فى الشغل , يا بخت مين كان النايب خاله , اموووووووت و اعرف مين الاب الشرعي للبق القمئ ده
الكل كان بيتعامل معايا على ان ابيه طارق ده بقي حيفوت لييييييي و حيعاملني معامله خاصه , هي فعلا خاصه اوي مش خاصه بس, مانا بنت خالته بقي
بس بما اننا عندنا حته تربيه ذياده حبتين فطارق الحقيقه عاملني بمنتهي الشرف و الامانه
و لاااااااا يعرفني
متفتكريش انك عشان قريبتي خلاص يعني
و الشهاده لله هذه المعامله ساهمت اني احط صباعي فى عين اتخن واحد فيهم لو جاب سيرة موضوع القرابه ده
في اوائل الايام سألت بحسن نيه و بلاهه
هو ابيه طارق فين؟؟؟
طبعا اللى موجودين هبوا فيا انه ابيه ديه فى البيييييييت مش هنا
موضوع انه يكون ابن خالتي هو مديري فى نفس الوقت ليه ماثر و ماسي برضه الحقيقه
لما كنت صغيرة و عايزة افك من المدرسه و اتحجج , بابا مكانش يرضي ابدااااااا, مفيش حاجه اسمها اقعد من المدرسه و بلاش دلع
طبعا الواحد لما بيكبر بيبقي خلاص بقي كبر يعني , صاحي الصبح قرفان و مكسل و لا حتي تعبان من سهرة فممكن تضرب اليوم و تبلغ الشغل بتليفون صغنن
انا مش جاي النهارده
من يوم ما اشتغلت و انا امووووووووت ونفسي اقول الكلمه ديه
طارق , اصلي بقيت اقوله طارق بس مانا كبرت بقي, عامل زي ابويا بالظبط , السبب الوحيد اللى ممكن مروحش الشغل فيه اني تكون عيانه عيي يقترب من الغيبوبه
الوووووو , باقولها و انا مستموته
منزلتيش ليه ؟؟؟ بيقولها و هو متحفز
عيانه
ما احنا كلنا تعبانين , انتي مش عندك شغل؟؟؟
و الله عيانه , و حابتدي انهنه فيا حرام يصدق قصدي قلبه يحن
طيب خلاص معلش
موضوع اني اخد اذن مثلا كده فى نص اليوم و اروح اصيع زي بقيه مخاليق ربنا ما بيعملوا ده مستحيل من المستحيلات اللى حتبقي كتيرة فى البوست ده
طبعا حتسئل
رايحه فين؟
حاقول ايه عندي ظروف عائليه؟؟؟ ما هو ابن خالتي و فاقس المواضيع
فرضا عايزة اروح اقابل الواد ميمي , اقول له ايه ده؟؟؟
فى يوم كنت عايزة اذن عشان اروح مشوار مع سمر
على فين؟؟
حاجه خاصه, قلتها باتامه
يعني ايه حاجه خاصه انا باسألك بصفتي ابن خالتك دلوقت
استغفر الله العظيم يعني اقول له رايحه مع سمر للدكتور عشان عندها البواسير
الواحد لازم يحترم خصوصيه الناس برضه و ديه موظفه معانا ,بس بعد الحاح اضطريت اقوله, اعمل ايه يعني
موضوع الاكل على المكاتب ممنوع منع يقترب من الخصم, فى يوم فى بدايات الشغل , طلعت موزايه و اكلتها لا من شاف و لا من دري , خارجه من المكتب فى امان الله الاقيه فى وشي
فطبعا ضحكت من الخضه, فى الغالب ضحكه هابله متقطعه اهي اهي اهي, و بص لقي قشر الموزة فى ايدي, و طبعا ريحتي موز
يا نهار اسود, كانت مدبحه
هااااااااااااااا, بتكلي على المكتب, مخصوم منك تلات ايام
مانا كلتها خلاص , قلتها و انا بدأت ازيق
و ده كان على مرأي و مسمع من اللي يسوي و اللى ميسواش
هو فيه ايه؟؟؟
و الشركه كلهااااااا لقتهم عندى فى المكتب , طبعا جايين يتفرجوا على بنت خاله المدير اللى خصم لها ديه
كان فيه جروب طالع شرم و انا كنت اموووووووووووت و اروح معاهم
معندناش بنات تسافر و تبات بره , ده طبعا فى البيت و ده كلام الاسرة الكريمه
فى هذه الحاله بقي لا ينفع اقول حاجة العمل و لا نيله و لا ان المدير غاصب عليا اروح
لأن المدير بذاتيه نفسه موجود فى القعده
طبعا اسبوع عشان اقنعهم و رحت
طبعا فى بدايات الشغل كان فيه مضايقات و غلاسات عديده بس عمري ما اشتكيت و باكتم فى نفسي زي نفس السوجارة
لحد ما طارق عرف من شخص ما
و نده لي
انتي مش بتقولي ليه ؟؟؟
كده, قلتها و انا غلباااااانه, يا لهوييييي دانا شفت ايام فى الاول, عشان محدش يقول بتروح لقريبها و بعدين مش باحب المشاكل مع حد
لو حد ضايقك قولي , زيك زيهم
طبعا وشي قلب فجأه بفرحه
ايه ده يعني ممكن ارد؟؟؟؟؟؟
ايوه
قشطه
و عديك بقي, فكيت و مبقتش عامله زي الفرخه الكاشه
كونت شخصيه مش بطاله الحقيقه و كله بالادب و الذوووووووووق و الا كنت طووووووول عمري حاخد على قفايا و الفضل يرجع لاصحاب الغلاسات و معامله طارق , اي نعم هي مش و لا بد بس يلا
طبعا احيانا واحد نفسه فى حاجه فعقله و سذاجته يصوروا له اني ممكن ادخل و اطلبها من طارق لأ و الاكاده ان ممكن طارق ينفذها له
بص لو عايز الموضوه ده ينقضي بلاش انا ادخله
ليه دانتي قريبته
ما هو عشان كده
ماعتقدش ان االعادي ان واحده تطلب مديرها و تقول له
الحق ,انا جاي لي عريس
طبعا الاخ طارق هو اول حد يبلغ بمثل هذه الاخبار
لأ كمان بقي اروح له المكتب و اقعد احكي و هيييييصه
طارق بالفعل اخويا دلوقت مش حاقول زي, بس هى كانت تجربه غريبه شوية , بما اني اكبر اخواتي فطبعا كنت باتعامل على اني الكبيرة , وضع مختلف لما اتعامل على انى صغيرة و عيله, احيانا كرامتي بتنأح يعني
طبعا اوقات كتيره باحس انه بيفضلني على باقي الناس
أزأز , تعالي لي المكتب
خييييير ده بيقول أزأز , خير خير
خدي الملفات ده خلصيها
طبعا باروح و انا بابص له شذرا
حاضر بصوت يقترب من النهنهه
بتقولي ايييييه؟؟
باستغفر ربنا فيها حاجه ديه
باحسب
المفروض اللبس بتاعنا يبقي فورمال , رسمي يعني , طبعا معظم الشركه مش شافين ان ده المفروض , فتلاقي الوان الطيف مترصصه جنب بعض , ايشي اورانج و ايشي فسفورى , و الله نيرمين ديه جبارة فى الوانها , و ايشي بمبي
مييييين بقي اكتر حد لازم يلتزم و الا يتلب, اكيد صاحبة البلوج
انتي ليه مش بتلبسي الوان مناسبه لسنك ؟؟؟ ديه الفتكه نرمين
طبعا ماهو ببدل الشغل و الوانها بابقي عامله زى ست الناظرة
عشان كرامتي بتنأح عليا و باحك فى مناخيري
فى يوم قلت اغير و لبست كاجوال , المفروض انه عادي يعني
ايه ده ؟؟ انتي رايحه النادي؟؟؟
و لا فى يوم تاني لبست فاتح شويه
انتي رايحه فرح؟؟؟
بس مانكرش برضه ان الموضوع زي كرانشي , ليه كذا ميزة, زي مثلا تعسف بعض الناس يعني زي الحسابات و الحسابات برضه و غيره و غيره, يلاقيني داخله
شايف العمايل؟؟؟
ايه فيه ايه؟؟
و احكي له و امشي ,اي نعم مش حيروح يلوش لحد بس برضه بافك بكلمتين بدل ما يجري لي حاجه
و لا لو فيه مصيبه من مصايب الشغل, يلاقيني ناطه عنده فى مكتبه و انا باتشحتف زى الضفدعه المتكهربه
الحق, مش عارفه اتصرف
طيب اهدي بس , بالراحه, هاتي الملف , و يقعد يفر بالراحه و هدوووووء و اخيرا اكتشف ان المشكله بسبب سهو برئ , مش مهم من مين يعني
و كثيرا من كتر الحسابات مخي بيزرجن و برضه ممكن ازيأ و برضه يطلب الملفات و يظبطها لى , و الله طيب برضه , احتياطي يعني فى حالة شاف البوست ده
احيانا موده بيبقي مش و لابد فبيطلع نقص المود ده عليا
بسسسسسس و هى مكالمه
ايوه يا داليا , ابوكي موده متعكر النهارده و باقي العكرة اكاد اجزم انها حتطلع عليكي, تيك كير
انا مش فاهمه واخد مني موقف ليه؟؟؟ انا لما رميت له السحلفه بتاعته من الدور الرابع كنت لسه تلات سنين , مكنتش فاهمه حاجه لسه
يكنش لسه شايل منى؟؟؟