الشبشب و القبقاب

سبحان العاطي الوهاب بعد الشبشب و القبقاب
هذا استهلال لااااااااابد منه و ده برضه اليق مثل ممكن يضرب فى وش العميل ضيف هذا البوست
الشغل كان مريح فى هذا اليوم اللى مكنتش لسه عرفت ملامحه, قاعده بقي و مركزه باسمع الست اليصا و هي عماله تأوأ , الله يهدك يا شيخه احنا ناقصين شحتفه و تأوئ , طبعا ماسكه نفسي اني ابتدي أزيق و لا اسح فى حضور تمن رجاله زاحمين عليا المكتب
يلا خلي السح و الشحتفه بالليل و انا مأرنبه الرابطه و حاطه ايدي على خدي و مربعه عالسرير, و اهو الواحد يشن براحته
الاقي التليفون , اللى ان شاء الله صرعي على ايده , بيرن
أزميرالدا , فيه عميل عايزك , ادخله؟؟؟؟
و ماله يا ختي داخليه, ما هو حرام الواحد يقعد يعكنن على نفسه شويه
دخل عليا المحروس , عبارة عن راجل فى اوائل الاربيعينيات, رفيع يعني بس بكرش , سبحان الله
و لابس نضارة بحر مش نظر, ايد فيها موبايل اخر حاجه و الايد التانيه فيها شنطه كده صغيرة , اكبر من كفه بشويه و معلقها فى ايده
و جارر وراه هلف, قصدي شاب, متلغم شويه و ليه نفس الكرش تقريبا , اظاهر وراثه
اتفضل يا فندم
انااااا حسن ابو شومه, صاحب مصانع ابو شومه للبلاستيك و الملابس و المشايات ,بيقولها و هو منشكح تماما
اهلا و سهلا
انا عميل للشركه من زمان و مدام هند هى اللى كانت دايما بتحجز لي
فعلا بس هي اجازة و انا باقوم بشغلها, هند مرة قال لى انه شخص مكافح و بدأ حياته مستورد روبابيكيا على ما اتذكر
انا كنت عايز اسافر بره انا و المدام , نتفسح
تحت امرك , فيه مكان معين حضرتك عايزة؟؟
مش عارف و الله , هي مدام هند هى اللى كانت دايما تقترح, و خلي بالك انا برضه الفلوس متفرقش معايا خااااااالص
قشطه اوي اموووت انا فى العملا المريحه ديه , لا يقول لي بادجيت و لا بتاع

مممم ايه راي حضرتك فى ماليزيا مثلا او تايلاند؟؟؟؟
انتي كده حتلخبطيني, اي حاجه شوفي كده
و بدأت اعرض عليه الاماكن اللى ممكن يروحها
هي الجزيرة ديه حلوه؟؟؟ انا مش بتاع بهدله و حادفع اللي انتوا عايزينه؟؟؟
لسه حارد , رايح موبايله رانن و هو كتمني بصباعه , عشان يرد بسلامته
المكن وصل؟؟؟؟ و بلا بلا بلا, اي كلام فى الهجص
معلش الشغل بقي انتي عارف, هيهيهي
الرحمه ياااااارب, و لا يهمك
اه طبعا , ناس كتير ودتهم و مبسوطين
طيب هو السفر بياخد اد ايه؟؟؟؟
تقريبا اتناشر ساعه
اتناشر ساعه ؟؟؟ بحالها ؟؟؟؟ ههههههه
الواد الاتم بقي اللى معاه, هو انتي سفرتي بره قبل كده؟؟؟
و انت مال اهلك , لأ للاسف
أأأأه , مش فاهمه ايه اااه ديه
طيب باقول لك ايه , المحروق الكبير , انا حاقول للمدام اشوف رايها ايه, الفسحه ديه ليها اصلا
و كلم المودام بتاعته
ها ايه رايك فى ماليزيا , الانسه , و راح باصص لي, بتقول كويسه و حنتبسط
اه ماشي يا ستي , اتناشر ساعه, نتبهدل ايه بس , طيب حاشوف معاها الموضوع ده
و راح متدير لى
هما بيقدموا اكل ايه فى الطيارة؟؟؟
هي هي هي هي, كان ممكن اضحك الضحكه الهاطله ديه ادامه بس مينفعش يعني
مش عارفه الحقيقه, بس بيبقي اكل عادي يعني حلال
يا ربي على المجهود اللى باقوم بيه عشان ماقومش اللوش, ما هو جه وقت وصلة العكننه , لو كان استني شويه كنت فقت و بقيت عاااال
و الاتنين بصوا لبعض بصه غبيه و حقيرة , و ابتسموا
انا موضوع الفلوس ده ميهمنيش دا انا كنت حاجز اربعين اوضه ليا و لعيلتي كلها فى الغردقه , خمس نجوم
هو حد نطق بكلمه فلوس دلوقت , مش لما يتنيل يرسي على حاجه الاول
طيب باقول لك ايه ؟
اتفضل , ربنا يهدك
و موبايله رن تاني , معلش يا انسه هيهيهي
وشي قنفد دليل عل الابتسام
الفلوس ؟؟؟؟ ماشي مش مهم , يدفع نص مليون و الباقي حابقي اتفق عليه كنت باقول ايييييه ؟؟؟ اخد معايا لبس صيفي و لا شتوي؟؟؟
فى هذه الاثناء كان ليا زميل جديد, هاني, باعزه من يوميها لله فى لله , عمال يبص للراجل من وراه بغيظ و شويه و حيتف عليه
و بعدين فى الليله ديه بقي , هو انا المفروض اعرف اجواء الدنيا كلها عامله ازاي
بص ممكن تاخد لبس صيفي و حاجه تقيله احتياطي, عندهم الدنيا بتمطر فى الحر
احتياطي؟؟؟؟ و راح باصص للبأف اللى معاه تاني و مبتسم ابتسامه حقيرة برضه
طيب اما اكلم المدام تاني , ايوه بصي يا ستي صيفي بس حنتقل , جديده ديه يعني , هههههه
بيت ام الاستظراف
الاخ قعد معايا فيما يقرب ساعه , عادي يعني ,فاكرني اليسا عايشه له احلي سنين
الاكل؟؟؟ اظاهر الكونتيسه بتسأله يطفح ايه لما يروح
طيب حاضر و راح قافل هو احنا ممكن ناكل ايه هناك؟؟؟؟ اصل المدام بتسأل
اظاهر انا اللى حابتدي أأوأ مش اليسا
حضرتك فيه مطاعم هناك , زي اي حتي فى الدنيا يعني,
يعني مش حيأكلونا صراصير و جراد؟؟؟؟
هاني وشه احمر و اتنفخ و مسك القلم بعصبيه , لقيته بيقوم بس اتردد و اقعد تاني و راح قاطم رقبة القلم
و الله لو حضرتك غاوى الحاجات ديه ماشي يعني
لأ طبعا , انا ممكن اخلي مراتي تعمل حسابها و احنا رايحين او اكيييييييد فيه مطاعم خمس نجوم هناك, الفلوس متفرقش معايا
و كلمها تاني
لأ يا ستي حناكل كويس ان شاء الله , ههههه , متشغليش بالك بس , يا ساتر على الستات دول , عليهم خيابه
اما انت بأف صحيح
انا اول ما اخلص معاه حاكلم ماما اتأكد انها مش غضبانه عليا
يا رب , انا داخله على ساعه و شويه
البأف تاني
طيب هى العمله ايه هناك؟؟؟ و بتساوي كام ؟؟؟ و ممكن اخسر فيها لو غيرتها من هناك؟؟؟ و لا مش مهم, لو خسرت حاخسر كام يعني
, حسيت بمخي بدأ ينمل و دراعي الشمال بدأ يعصلج , يا لهوي ازمه قلبيه ديه و لا ايه و وشي ضرب طماطم كالعاده , نفسي , اه , جالي تهتك فى النفس , لساني, حاتشل ,
خلااااص بقيت عامله زي الفرخه الدايخه , ابن المهفوفه حايخلص عليا
هي مدام هند اللي كانت حتشوف لى الموضوع ده لو كانت هنا, انا بافكر استني لما تيجي من الاجازة و احجز معاها
اه يا ابن ال.......
و الله هاني ده صعبان عليا , امير هاني ده
خدي خمس الاف جنيه تحت الحساب اهه و خلصي لي الموضوع ده
و راح مطلع كبشه فلوس من الشنطه اللى معاه و رازعها على المكتب
ايه الهم ده , مش لما احجز الاول و الحجوزات تتأكد
و رحت واخده الفلوس تاني حاططاها ادامه
مش دلوقت حضرتك لما احجز و اشوف الموضوع حيتكلف كام و فيه اماكن و لا لأ و الحجز يتأكد
و راح شااااااايل الفلوس تاني رازعها ادامي
مش مهم , مش انتي حتحجزى خلاص, الفلوس مش مهم
و رحت شايلاهم تاني ادامه
الموضوع مش موضوع فلوس, لازم يكون معايا تأكيد
هو فاهم ان الحجوزات ديه بكيفي , و ان لو اداني الفلوس دلوقت حاحجز بسرعه مثلا و لا حاطلع المخبي
فرضا بقي ملقتش اماكن ..ابقي اتمسكت من لساني
بس خلي بال حضرتك ان الموضوع متوقف على امكانيه الحجز , انا نبهت اهه
و بدأت اعد الفلوس
استكيهم استكيهم , الشاب الاتم, ههيهيههييي
و نفس البصه و الابتسامه الحقيره

, الهي استك ياخد اجلك و يخلصني

اعز و اغلي امنيه كنت باتمناها فى هذه اللحظه المنيله انى ازق الورق اللى على المكتب و اجي زلقه الكمبيوتر على ورا و امسك الواد الهلف ده و اجي مطلعه عينيه الاتنين بصوابعيني و اروح العب بيهم بنك الحظ مع هاني بدل الزهرة

بس للاسف دول عملا , ميصحش اني اادوس لحد فيهم على ديل و الا انا اللى ممكن اتعلق و برررررررررررررضه حاعمل الشغل فالواحد يلم نفسه اكرم له

بجملة البخت بقي , موضوع الحجز مكانش بالساهل لانه كان موسم السياحه فى البلد ديه, فاضطريت و انا كلي قرف واشمئناط ني اطلب الراجل عشان ابلغه

يعني اييييييييييييه؟؟ انا دافع الفلوووووووووس

و حدث ما توقعته, موت يا حمار بقي على ما يفهم و بعدين هو مش قال انه سافر كتير, عالم رمه فعلا

ما انا قلت لحضرتك الموضوع مش موضوع فلوس

اتصرفى, اكتر كلمه بقيت اكرهها من يوم ما اشتغلت

هي مدام هند اللى كانت بتتصرف, الا الطيارات ديه فاكرها بمزاج اللى خلفونا مثلا

قلت اكلم هند يمكن سرها باتع

ايوه يا امي , حسن او شومه

يا سااااااااااااااتر , ده وش , انا اجازة , ماليش دعوه

تكونش اليسا هي اللى فقر

اظاهر ماما كانت راضيه عني و لا ايه , ربنا سهل و قدرت احجز له

على راي الشاعر فلما ضاقت حلقاتها فتحت باين و لا ايه

و غاااااااااار

ور جع بعد السفر يخلص شويه حسابات قديمه مع هاني

الحقيقه هاني ماستحملش تناكه المذكور , و انا كنت اسريت له بالرغبه القويه بلعب بنك الحظ

قام هابد الراجل مفك فى عينيه

ربنا يفك حبسه بقي , بس اهي جت بفايده

الراجل قلق مننا و مجاش تاني