الكامارا الديشيتال

بقى لى فترة مش قليله عايزة اشترى كاميرا و بعدين قلت مانا اشترى ديجيتال طبعا معروف مميزاتها مفيش داعى للت والعجن, المهم محصلش نصيب الا انى كنت قررت خلاص مؤخرا بس الله يخرب بيت الكسل و التردد , من كام يوم جت واحده من بتوع المبيعات

sales

جايه تسوق لعرض عاملينه لكاميرا ماركتها

digilife

بس من الواضح انها ماركه نكرة عشان كل اللى سمع عنها كانت اول مرة ليه

طيعا موضوع الديجيتال ده لقى صداه فى نفسيتي , عايزة اشترى و اهى جت لحد عندى, البنت بقي زى اى حد بتاع سايلس هاتك يا رغى و شرح لمواصفات الكاميرا , 12 ميجا بيكسل , فيديو ساعتين ممكن تصور فرح, تصوير فى اى ظرف كان حديقه كان او ارميدان, ممكن تصور مستندات فى حاله لو انا و العياذ بالله جاسوسه, ويب كام , ام بي ثري بلاير و ام بي فور بلاير و ام بي فايف , مش عارفه اظاهر ام بي فايف ده حاجه تبعهم بس, يو اس بي, اكسسوارات , جراب وشاحن و اللهم لك الحمد معاها عليقه و مش عارف ايه وبلا بلا بلا دا احنا واخدين تلاته و الله , اكل دماغ بالجامد, و الاوفر الجبار بقى ميمورى كارد واحد جيجا مجانا مع الكامارا و سعره فى العادى لوحده ربعميه و خمسين جنيه و ضمان لمده سنه ممكن تغيريها خلالها لو حصل لها حاجه و لو غيرتى رايك و عايزة ترجعيها خصم 25 % بس من المقدم و تاخدى فلوسك

سعرها كام طيب؟؟؟

الفين و خمسميه كاش

نعم!!!!!!

ممكن تقسيط من غير فوايد , تدفع مقدم 450 جنيه عند الاستلام و العقد و الباقى ان شالله على سنه

يعنى تقريبا 166 جنيه كل شهر لو سنه

طبعا كلام البت شعللنى و نور الحته بتاعه الاستهلاك و حسيت ان مش عارفه اخد نفسي من كتر الانبهار و حسيت انى كنت ضايعه من غير الكاميرا ديه ازاى كنت عايشه من غيرها, نجحت فى مهمتها بنت اللذينا

على الرغم من انى شغلى قائم على التعامل مع بتوع السايلس و واخده على كلامهم و مش بيتضحك عليا يعنى بس لأ الشغل و الأرننه حاجه و احتياجى الشخصي حاجه تانيه خاااااااااااالص

ممممم و الله مش بطاله و حلو اوى , كاميرا بالمواصفات ديه تستاهل فعلا يعنى ناقص لها موبايل بس و شكلها اصلا تحفه فى حجم الموبايل و السعر مش اشكال تقسيط يعنى مش حتعمل مشكله على الرغم من انى باكره التقسيط عمى , ده انا

طيب يا ستى ممكن تشغليها نشوفها؟؟؟؟

تحطها فى الشاحن , البتاعه منشفه دماغها و مش عايزة تشحن , بس اصلها شغاله من الصبح ,مش عارفه يمكن الفيشه و لا ايه

طيب يا ستى نفكر

لأ لازم تردوا عليا دلوقت عشان الاوفر اخره النهارده, بتاع الميمورى كارد

ماحنا لازم نشوفها شغال

طيب انا كمان حارجع الشركه بسرعه اشوف واحده تانيه و اجيب مديرتى عشان العقود على ما تفكرى

طبعا كالعاده لازم اسأل حد ثقه قبل ما اقدم على اى خطوه جبارة زى ديه فيها كع فلوس

كلمت ابن خالى المحترم و كان رايه

حتعملى ايه ب 12 ميجا كتير عليكى , و بعدين انتى اصلا عامله بدجيت كام للموضوع

و اللاااهيييييييييييييي يبدا من اتنين جنيه و نص لحد 500 و ماتقولليش قليل

لأ ممكن تلاقى حاجه كده مناسب

بسسسسسسسسسسسسسسس , هو ده البق اللى فرملنى و خلانى افكر بهدوووووء

انا احتياجى كاميرا تصور حلو و احط على الكمبيوتر عدل و بس , مش محتاجه الفرح اللى فيها ده

حاعمل ايه ب 12 ميجا بكسل صحيح؟؟؟؟؟ و يعدين ام بي ثري بلاير ايه؟؟؟ مش غاويه و عارفه ان عمرى ما حاستخدمه

الفيديو يا أزميرالدا؟؟؟؟؟؟؟ ده انا لنفسي

يعنى انا دايرة عالافراح مثلا , ماليش فى الموضوع ده , حاجيبها و اصور غيرى و بعدين ساعتين بس

و تصوير المستندات؟؟؟؟؟؟

مش ناويه انحرف و اتجسس

و عندنا اتنين ويب كام

و العليقه؟؟؟؟

تولع

اييييييييييييييييوه, كده انا اخدت نفسي و بدأ العقل يشتغل

الانسه جت تانى و معاها كاميرا شغاله و معاها مديرتها شابه برضه و الاتنين قعدونى وسطهم و بدأت الانسه فى كر الموال تانى مع شرح الكاميرا عملى , اظاهر حالفه ميت يمين انى اشترى

ديه كلمه و ديه كلمه , حسيت انى بين ريا و سكينه, فطبعا اخدت موقف عشان افلفص: لااااااااااااااااأ و رحت هووووب قايمه

بصوا الكاميرا بنت ناس و شكلها محترم و انا كان يشرفنى بس احتياجاتى اقل منها , اناعايزة حاجه مناسبه ليا و الموضوع مش موضوع كتر اوبشنز و خلاص عارفه انى مش حاستخدم و بعدين سعرها برضه مش مناسب ليا , مش حادفع فى حاجه مش حاستخدمها

ده استاذ رامى و مدام عزة و انسه شيرين حيشتروا

طبعا ازبهليت من التالات اسامى دول

ميييييييعيييين؟؟

استاذ رامى على وش ولاده قصدى مراته و مش مزنوق فى الكاميرا يعنى و مدام عزة مزنوقه فى ديون الكريديت كارد اللى السبب فيها برضه انسه زى اللى قاعده ديه و انسه شيرين واخده قرض و بتسدد فيه

طبعا رحت لهم و القيت محاضرة على مسامعهم , انا اللى من نص ساعه كنت ناويه اشترى , ان احنا مجتمع استهلاكى مش بنفكر فى احتياجتنا الفعليه و على اساسها نشترى و ان الجماعه دول وحشين , بتوع السايلس , و ان المفروض الواحد مش اى حاجه عايزها يشتريها لمجرد الرغبه بس لازم يكون محتاجها

طبعا قوبلت بهجوم شويه , مالتلاته مشجعين بعض و حسيت ان رامى بدأ يعيد التفكير تانى و بدأ الصراع بينى و بين عزة مين يقنع رامى

انتى مالك يا ستى مالكيش دعوه, ماتسمعش كلامها يا رامى

يا جماعه صوت العقل ,حتندموا , يا رامى بلاش , هات واحده عاديه حتؤدى الغرض

يا رامى مش حتفرق اوي ديه حاجه بسيطه كل شهر

و اخيرا بعد صراع رضخ رامي الجبان لعزة و شاهدت نظرة انتصار فى عينها

انا يوميها بقي و للنصيب نزلت و ربنا كرمنى و اشتريت كاميرا خمسه ميجا بكسل , و فيها فيديو مش كبير بس مش عايزاه و فيها ويب كام مش عايزاها برضه و اوبشنتها مناسبه ب خمسميت جنيه و ماشيه زى الفل

و

ايه يا بنى؟؟

بعدها بكام يوم لقيت رامى شكله غلط و بوزه مقلوب

عزة حترجع الكاميرا

طبعا بسمه انتصار جامده على بقي نياهاهاهاهاهااهااااااااااااا

و هووووووب على مكتبها عدل

خير ان شالله؟؟؟؟

مش عارفه بعد ما جبتها و مسكتها فى ايدى حسيت انى هابله اوى , وقتها كنت خلاص حاموت عليها ,انا حاكلمهم و ارجعها, مش مهم 25% من المقدم

طبعا عماله تحاول توصل لهم ولا حياه لمن يهاتى بس على مين هى ناويه لهم و قد علمت مؤخرا انهم رفضوا ترجع لهم الكاميرا بس هى مسكتتش و فضلت وراهم بس خسرت المقدم
اخونا غامى بقي حب يصور سبوع بنته بس للاسف الكامارا مشتغلتش فبالتالى كلم الانسه بتاعه الشركه طبعا جابت العيب عليه انه معرفش يستخدمها بس اكتشفوا انها بايظه
طيب ممكن اغيرها ؟؟؟؟
لأ الحقيقه مينفعش بس ممكن نصلحها
ماشي
خلاص حنبعتها تايوان عشان ملهاش قطع غيار هنا و حتتكلف 2000 جنيه تقريبا
طبعا كل عام و انتم بخير لا بعتها و لا شغلها و ادي جزاة اللى ميسمعش كلمه أزميرالدا تقولها
أحسن

باقي الخطوبه المفترجه

كلمناه و فى الطريق, بيقول انك قلتى له يجي خمسه

يخرب بيته , انا قلت حانبتدى خمسه مش يجي خمسه

فى هذه الاثناء قعدنا فى التكييف ان و أزميرالدو و كام حد كده , هى ديه ميزة ان تكون عريس او عروس

و جه الدي جاي

يلا عشان تخرجوا على الناس كلبشت فى ايده و دخلنا و الناس بتصقف و قعدنا على الكنبه, الراجل بتاع الفيديو قال انتوا قاعدين غلط فقومنا تانى

الله ابتدينا و ربنا يستر على الراجل ,بس انا متأكده اننا صح

لقيت خالى بيشاور اننا غلط و الصح انى على يمينه زى الاول , قمنا تانى, يا دي الدوخه بابص بطرف عينى الاقي انكل ممدوح مطلع اللعب و العربيات و الزحاليق و الكور للعيال حلو اوي اهو يتللهوا و يبعدوا برخامتهم , بس المهم اكون بعيده عن مرمى الكور عشان الليله تعدي و رميت ايدى جنب أزميرالدو , انه يلقفها , ابدا ,شكلى بقي زباله , مش كده يعنى ,كنت حاتهور و امسك ايده زى نيفين ما عملت فى خطوبتها بس لميت نفسي , اما اشوف اخرتها بعدين الشربات جه

يا امه ربنا يستر

و اصلا قبلها أزميرالدو موصينى اخد بالى و هددنى انه جايب تي شيرت معاه فى حاله لو وقعت عليه لقيته عصير فراوله و الله بورافو اصلي مش باحب الشربات و شربنا بعض بمنتهي الحذر و عدت الفقرة و شويه و جابوا الشبكه لقيت هلمه كده , الناس كلهم اتلموا , زى ما تكون خناقه و برضه لبست الشبكه على خير و هاتك يا بوس و الطرحه كانت خلاص زهقت و قربت تقع

, يا جماعه مش لازم بوس , ابوس ايديكوا

و كام واحده كده جم و قعدوا يظبطوها و كانت فضيحه على الملأ بس ربنا ستر

و جوووووووووووووووووووووووووون

أزميرالدو مسك ايدي يا رجاله ,اظاهر كان مستنى يلبسنى الشبكه , ظلمته , افتكرته مطنش و قعدنا و انا مستنيه البنات يقوموا و يهيصوا , مفيش ,الله !!!!اغمز و ازمجر و شويه و حاتف عليهم , مش يلا بقي لقيت توتته جايه تميل عليا

ما تقوموا ترقصوا سلو كده على خفيف

وطيت راسي زى اللى عامل عامله
قولى له

ها ايه رايك يا أزميرالدو؟؟؟

ما هي مش راضيه

يلا يلا

و رقصنا , قالوا لى بعدها انها اغنيه , استغفر الله العظيم , لمستك بتاعه عمرو مصطفي كل اللى كنت فاكراه انى معاه و بس مكنتش واخده بالى من اى حاجه تانيه ما هى اول مرة ارقص سلوخ مع حد و هييييييييييييه

البنات هيصوا و انا هيصت بس الطرحه عكننت عليا فدخلت بسرعه و فكيتها تماما و بدأنا من اول و جديد قعدت فى الموال ده يجي تلت ساعه انا جوه حاعيط و هما بيظبطوها و البنات بيهيصوا بره ,الدي جاي ده معندوش دم مش يشغل اي حاجه كده لحد ما العروسه تطلع ,طلعت الاقي أزميرالدو مستنينى بره الاوضه

ايه ده انت هنا؟؟؟

امال اسيبك اوحدك!!!!

يا لهوى على الحنيه و رحنا و هيصنا مع البنات و انا اديتها رقص و ماعملتش باول نصيحه و طبعا كان فيه زغرات و تهديدات من نوعيه حاقطع رقبتك بس و لا همنى الدي جاي الله يهده كان شغل الاغانى العدله كلها وقت تظبيط الطرحه فكل اللى اشتغل بعدها كان تعبان و طبعا يوم خطبتي لا ممكن يعدى كده من غير شويه حرقه دم على الماشي و كان الاخ بتاع الدي جاي صاحب السبق ,البيه كان مشغل اغانى للاخ ايهاب ترجيع و شويه و اغنيه الحنطور

حنطور ايه يا حمار انت الحاجات ديه مطلبتهاش خاااااالص

فكنا كل شويه نقول له على الاغنيه اللى عايزينها و برضه كان مطنش ,حد مسلطه ده؟؟؟؟؟ شويه و التورته ,نفس الحركات المعهوده, يأكلنى و ااكله ,أزميرالدو دخل الشوكه فى وشي بس ربنا ستر و لقفتها حاولت اهوشه بس هو كان انصح منى و لقفها اروبه اسم الله عليه بعدها البوفيه طبعا كان غدا بما اننا العريس و العروسه فالراجل ظبطنا و جاب الاطباق لحد عندنا و الله موضوع عريس و عروسه ده ليه مزايا كتير اوي بعدها لفينا كعب داير على كل الناس واتصورنا مع كل الفاميليا و اديناها رقص تانى

بعدها المغرب اذن فالراجل الدي جاي وقف و الناس صلوا جماعه بعدها اشتغل الدي جاي تانى و هكذا توالت فقرات الخطوبه

نرقص و نصلى و نرقص و نصلى

و محدش يجيب لى سيره الازدواجيه دلوقت محبكش يعنى

و ارتحت حبتين كده لأن صوابعي كانت اتفعصت و قمنا تانى العيال البنات كانوا ملمومين حواليا هشتهم لما أزميرالدو جه و لقيتهم بيشدونى تانى عشان نهيص

يا عاااااالم اتفرهدت , مش قادرة اقف , رجلي اتقتلت

خلاص يا شيخه قومي انتى حتتخطبي كام مرة

و قمت تانى و الدي جاي بدأ يقطع يخرب بيته اتعفرت و طلبت من أزميرالدو يروح يضربه ما انا العروسه و مينفعش اقوم بحركه زى ديه بس قالى

الطيب احسن بلاش اتسجن النهار ده خليها يوم تانى

للاسف الشديد كنا نسينا نتصور انا و أزميرالدو لوحدنا فى الاول فالراجل خدنا على جنب و صورنا طبعا كان منظرنا مأسوي بعدها اتصورنا تاني مع العيلتي

يا دي الدوخه يلا عايزة اروح مش قادرة اقف

و اتعكزت عليه لحد العربيه و روحنا ,كان خالى واقف فى الشارع لما وصلنا و استنيت لما عربيه أزميرالدو اختفت عن الانظار و بسرعه

ثانيه واحده يا أنكل

و رحت سانده عليه و فاكه الجزمه

يا بنتى حتى خشي العمارة مش فى الشارع كده كنت قلعت فرده و فضلت انط لحد ما دخلت العمارة و قلعت التانيه و طلعت طبعا ساعه على ما اشيل المكياج بقي والصلاه و رجعت لأصلى تانى تي شيرت و منطلون جينس و طبعا النضارة و قعدنا شويه فى البلكونه طبعا شبعونى تريقه من نوعيه

سبحان الله ايه ده العروسه ام نضارة؟؟؟؟ و طلع الاختلاف

طبعا كنت مهدوده ,حظهم و فرصتهم

بس بجد كان يوم رائع و مختلف عن الخطوبات المعتاده , كل الناس كانوا مستمتعين و اتبسطوا , حتى العيال الصغيرة كانوا فرحانين اوي , طبعا هيصوا و لعبوا و اتزحلقوا, مخلتش نفسهم فى حاجه و محدش زعل انه مجاش لسبب بسيط جدا ان الناس اللى كنت خايفه يزعلوا حصلت لهم ظروف و اعتذروا

بس هما الخسرانين