الخطوبه المفترجه

ادي لى خمسه و عشرين سنه و حبه كده عايشه و عمرى ما فكرت فى يوم الخطوبه المفترجه ده , عيله كئيبه على راى أمى , لا عمرى فكرت ان فيه رحله بحث عن فستان و اكسسواراته و لا ان فيه شبكه حتتجاب و حتى على طول اتريق على الحركات الخايبه بتاعه الافراح زي موضوع الشربات الاهبل ده و موضوع التورته و اكتر حاجه كانت بتفقعنى الراجل المتر اللى بيعمل حركات بالشوكه و يغلس على العروسه , دايما كنت باحدف تفكيرى على سنه بعد الجواز, من الاخر فترة الخطوبه من اولها لأخرها كانت واقعه من خيالى تامامان
اتفقنا ان الخطوبه حتكون على الضيق الضيق , بمعنى الاقارب من الدرجه الاولى بس , الاخوال و اولادهم بس و الموضوع حيكون فى البيت و طبعا بما انى ماليش فى الدوشه و الزحمه و الهيصه, خدوا بالكوا و النبى من الحته ديه , و أزأوزى حبيب قلبى , احم معلش ساعات الغومانسيه بتطفح كده, كمان طلع زيي , فانا قلت هى نص ساعه و اقلب , اتلايم على الشبكه و نتعشي و بعدين بخ كل واحد على خنه طبعا فى هذه الاثناء قرايبنا اللى من الدرجه الخامسة كانوا بيسألوا هااااا امتى الخطوبه ؟؟؟؟؟ فيا حرام الكل كان متعشم , ماهو اصلنا موضوع على الضيق ده احنا فاشلين فيه و دايما الكل معزوم فكنت بافلفص من السؤال ده بان لسه ماتفقناش على ميعاد و كنت شايله هم الناس ديه و بعيييييييييييز؟؟؟
هايدى مرات ابن بنت خال ماما كل شويه تتصل ها يا أزأز امتى الخطوبه؟؟؟؟ فقلت حاعمل عبيط و خلاص , يعنى اعمل ايه يعنى البيت مش حينفع يلم كل دول و بعديز بقي المفروض الناس تعذر و تقدر
كان ابن خالتى بيتكلم مع انكل ممدوح , من معارفنا ,عن الموضوع ده و ترتيباته فالراجل قاله ما تعملوها فى الجنينه عندى ايه رايكوااااا؟ مكان واسع و جميل و خضرة وانتوا واخدين عليه
و اللاهيييييييييي اعرض عليهم الموضوع ده
الموضوع لقي صدى ابن لذينا عندنا لأن المكان تحفه بحق و اهو نعزم العالم الامماصه و باقي العصابه و اتفقنا على الميعاد و التوقيت حيكون بعد العصر طبعا بما ان التوقيت غريب فكتير كنت بتسأل السؤال ده
ها يا أزميرالدا حنلبس ايه؟؟؟؟؟
عادى يعنى بدل

ما نقضيها تيشرتات و خلاص الدنيا حر حرام عليكى ,
طبعا شبعونى تريقه و اللى يقوللى نمشيها شورتات و لا كوتشيات
لأ منك له كله بدل و جرافيتات
, و الستات كمان قرفونى , يا جماعه مش لازم فساتين سواريخ , بس الرجاله بدل و اتفقنا حنصلى العصر هناك و نبتدى الخطوبه على خمسه طبعا بما اننا كشعب مواعيدنا هباب , فكنا بنقول اننا حنتحرك الساعه تلاته و مش حنستنى حد على اعتبار تلاته ديه حتبقي اربعه و حصل ما توقعناه و طبعا ارتحت لموضوع تلاته ده اوى لما أزميرالدو وصل تلاته و نص

تلاته بالظبط كلمت أزميرالدو بالرغم من الزغرات اللى خدتها من اللى حواليا انه ميصحش اطلبه فى التليفون
ليه يا عااااالم؟؟

كده اتقلى شويه
هو ايه يا خويا ده ؟؟؟ باشوفه فين
المهم ايو ه يا أزميرالدو انت فين؟؟؟؟
عشر دقايق و حاكون عندك , حارن لك و تنزلى
نعم !!!!!!! طبعا فطيت من مكانى ترن!!!!!!!! احنا رايحين النادى
طبعا حواليا يجى عشر ستات كلهم مطرطأين ودانهم للمحادثه التاريخيه ديه

يا أزميرالدا الدنيا حر لسه حانزل من العربيه
لأ تاخدنى من الشقه و قمت على جنب كده و انا باكلمه يا أزميرالدو شكلى وحش ادام اهلى , معلش استحمل اهي كلها حركات
طيب دلوقت لو مكانش فيه موبايل كان صفر لى!!!!!!!
منورة يا خالتشي
و طلع أزميرالدو
يا لهوي
باحاول ابطل موضوع الضرب على الصدر ده من يوم ما عرفته بس لأ , المرة ديه لأ
ايه ده ؟؟؟؟؟ فين الجرافته؟؟؟؟
جرافته ايه بس يا شيخه فى الحر ده , يلا يلا
يا دي المصيبه حاقول ايه للرجاله ,
ربنا يستر يدوب طلع و نزلنا فى السانسير و ركبنا العربيه كنا بقينا مبلولين من الحر و طوال الطريق للجنينه و انا متوترة و عماله اهوي بالمروحه لحد ما دراعي وجعنى فهمدت
يا أزميرالدا بطلى القلق ده
, من يوم ما عرفنا بعض اقلق و هو يطمنى , الصراحه باتلكك , اصله بيبقي حونين اوي ,موضوع الشربات ده كان موترنى و بعديز لو دلقته عليه حيبقي شكلى ازاى مش باحب المفاجعات و لو الفستان اتقطع حاعمل ايه؟؟؟ و المتر الرخم بتاع الشوك لو غلس عليا, اللويش له و لا اطنش و الطرحه اساسا بدأت تاخد طريقها بعيدا عن راسي , حار و نار فى جته الكوافير
على فكرة يا أزميرالدو مش حانرقص سلو ,ماهو اصلها خطوبه بس ,ميصحش
خلاص يا حبيبتى زى ما تحبي
رده فزعنى الحقيقه
زي ما احب!!!!!! طيب
و نزلنا من العربيه و سبق الاخ أزميرالدو بكام خطوه كده , و لقيت زغد فى كتفى و انا عماله اجرجر فى الفستان , الله ابتدينا المحروسه بنت خالتى نعم يا ستى
مش المفروض ياخد ايدك؟؟؟؟
الله هو انا كسيحه مانا فل اهه
يا بنتى ده العادي , المفروض يمسك ايدك و لا يأنججك
يعنى اروح اقول له خد بايدى , ده ايه الهم ده يا ربي , خلصونى عايزة اقعد
كنت مفرهده من الحر و هو كمان باين عليه الفرهده كنت باحاول انفذ نصايح مامتى و خالاتى و كل ستات العيله
بصي يا أزميرالدا اوعي حد يدوس على فستانك تتنرفزى عليه
اوعي عيل بيجرى و لا حاجه و يخبط فيكى تشوطيه
حاولى تبتسمي طول الوقت
مفيش داعي تشربي الشربات كله و متنسيش تشربي أزميرالدو
بلاش ترقصي اوي , خدي بالك انتى العروسه
المهم يدوب وصلنا من هنا و العصر اذن من هنا فدخلت الفيلا اصلى والرجاله صلوا جماعه كنت متوضيه من قبل الضهر كانت ماساه و جت خمسه نبتدى بقي
الدي جاي لسه مجاش
اييييععه ؟؟؟؟ ليه؟؟؟ كلموه

يتبع لسه ماخلصتش

اللهم تقبل منا رمضان

http://emanhussein.jeeran.com/94a.gif

الفاتحه و اتفاق البلكونه

يوم الفاتحه ده كان يوم عجب بحق مش عارفه ايه الحاجات اللى باشوفها فى حياتى ديه , قبلها كان المفروض اخوالى يقعدوا مع ماما عشان يشوفوا حيتفقوا على ايه و ده طبعا المفروض العادى مع اى واحده فيه واحد جاي عشان يقرا فاتحتها , المهم بما ان ماما مش موجوده و خالى كان مسافر و ربنا ستر و جه يوم الفاتحه و خالى التانى مكانش موجود ايام ما شفت أزميرالدو فلقاء ماما مع الرجاله كان قبل ما أزميرالدو و أهله ييجوا بأقل من ساعتين و ده كان فى البلكونه , و أنا طبعا معاهم و باقوم بدورى من المقاوحه على اكمل وجه مع انى قعدت ادرب نفسي كام يوم قبلها على كلمه اللى تشوفوه بس فشلت فشل رزييييييع

أنكل :هما جايين تعارف و لا فاتحه ؟؟؟ مش المفروض ديه جلسه تعارف الاول يا بنتى ده العادى

اعتقد فاتحه , يا أنكل ما الناس كلها طالعين المصيف كمان يومين و مفيش وقت للكلام ده

يعنى ايه يا أزميرالدا الحاجات ديه متجيش كده لازم نقعد معاهم الاول

يا دي النيله , فى سري طبعا

لأ ماينفعش كده يا أزميرالدا

و فضلت أقاوح مع خالى شويه فى النقطه ديه فحد تطوع ان نخلى الموضوع كده و نشوف يمشي ازاى و اهو احنا بنقرا الفاتحه اربعه و تلاتين مرة فى اليوم

طيب انتوا اتفقتوا على ايه ؟؟

يا انكل حانتفق ازاى و حضرتك مش موجود بس احنا مشفناش بعض غير مرتين
و بدأت ابص فى الساعه , يا دى النيله المفروض ينجزوا بقي الناس زمانهم جايين طبعا الاجتماع وسع و شمل خالاتى و زوجات اخوالى و ابناء خالاتى و بنت خالى و زوجه ابن خالتى اللى أزميرالدوا قريبها و كل واحد طبعا كان يتطوع بكلمه شكل منها اللى عجبنى و منها اللى كان بيخلينى ادخن فقعدوا يتحاوروا و يتشاوروا و شويه الكلام يقف و يهزروا و ساعات ودانى تدخن من الكلام و اللكعاه و كل شويه ابص للساعه و ارجع اهدى تانى مع النصيحه الدايمه ليا مالكيش دعوه متدخليش و شويه كله تمام بطلى قلق اظاهر بيجربوا فيا و لا ايه ما كل اللى قبلى كانوا رجاله , و شويه محاولات تخمين لأخر بنت اتجوزت كان نظامها ايه فى الجهاز و كانت المحاولات تبوء بالفشل ربنا هداهم و اتفقوا على الجهاز و الشبكه و الحاجات العك التانيه ديه بمساعده توتته قريبه أزميرالدو لأنها الواسطه بيننا و بينهم نيجيييييي بقي لميعاد الخطوبه خالى الاصغر تطوع الله يكرمه , حبيبى خالى ده , بانى عايزة الخطوبه بعد اسبوع و ده لييييييييييييييه؟؟؟؟؟؟؟؟ اشرحى يا أزميرالدا و جهه نظرك لانكل

المصيف بتاعكوا لغايه نص تمانيه و بعدين فيه ناس مسافرين و راجعين اخر تمانيه معنى كده اغسطس ده شهر فقر أأأقصدى طاير فمش معقول نفضل كده فاتحه بس لمده شهر و نص

و ديه فيها ايه؟؟؟؟؟

ايييييه فيها ايه؟؟؟؟ ازاى يعنى كل اللى بينا تليفونات و طبعا مفيش خروج مش المفروض اقعد معاه كذا مرة و اشوف دماغه

مانتى حتقعدى معاه محدش قال حاجه هو انتى رايحه تتجوزيه بكرة بلاش استعجال

و الله تلاته مانا مستعجله مانا لو مستعجله ما كان زمانى معايا عيال من زمان و بعدين مبحبش الفاتحه اللى بتطول ديه بأتشائم , ايه مسمى العلاقه فى الشهر و نص ده, داخله على خطوبه و لا متكلم عليا و بعدين أزميرالدو معندوش مشاكل

فى الميعاد ده

يا أزميرالدا مينفعش , الكلام ده ميدخلش الدماغ

طبعا الدخان طلع على وشي على هيئه احمرار

خلاص يا انكل اعملوا اللى تشوفوه

الكلام يبقى بالعقل يا أزميرالدا

من الواضح انى صواميل مخى كانت فكه ما هو لو كده الشبكه حتيجى امتى و الفستان امتى ,ديه دوخه

الجماعه وصلوا الجماعه وصلوا ديه توتته

و لقيت حد مش فاكرة مين بيزقنى خشي خشي لما ننادى لك انتهزتها فرصه و دخلت الحمام ربنا ما يوريكوا

طالعه من الحمام و زأ برضه يلا يلا خشي

يا دى النيله

رحت اسلم على الناس بالراحه من ديل التايير اللى حايجبنى على وشي اللى يشوف يقول غزال رقيق شارد ضل طريقه محدش يعرف ايه اللى جابه هنا ,محدش يعرف اللى فيها ,بأبص بطرف عينى لقيت أزميرالدو لابس بدله جامده اوي لايقه على تاييري
المهم بعد السلامات و التحيات قعدت و بسس بسسسس بابص الاقى خالتى واقفه فى الطرقه و بتشاور لى اروح

ايوه نعم

خدى الصينيه يلا

يا نهار اسود البتاعه تقيله تهمه

لأ تقيله مليش دعوه

طيب حاوصلك لاخر الطرقه

اقدم لمين الاول ؟؟؟؟ وبعدين مين ؟؟

حماكى و بعدين ازميرالدو و بعدين خالك و بعدين اخواته و بعدين الباقى ( على ما اتذكر يعنى ) و شلت التهمه و عليها يجي خمشتاشر كاس عصير و عماله احفظ الترتيب و باحاول احافظ على ربطه جأشي ومتدلقش بالصينيه و اخيرا وصلت و كنت حاحمى أزميرالدو بس ربك بيستر بعدين لقيت هرج وفرج كده من الرجاله اصلى كنت نسيت اقدم لاخوه الزئرد فالكل كان بيتطوع بكاسه و اخيرا قعدت و اترستأت ,حمايا بدأ بكلمتين كده انه يشرفهم ان يخطبونى لأزميرالدو و اننا عيله بنت لذينا جامده و انهم شاريين و حاجات كده و .........خير اللهم اجعله خير كده الفاتحه اييييييه؟؟؟ فى الاحوال العاديه حأفط من مكانى و انا عينيا ضاربه لبرا و عماله ابص بهطل للكل و احتمال لسانى كان يدلدل ,ده فى الاحوال العاديه و اللى انا فيه ده مش عاديه بالمرة امال فين كلام البلكونه ؟؟؟؟ ايه يا انكل انت مش قلت تعارف و بعدين فين الاتفاقات و الحاجات

اني اسمع كلمه استنى نتفق مفيش و قرينا الفاتحه و خير اللهم اجعله خير برضه الكل جه بيسلم عليا و بيبوس و لبسنى ازميرالدو خاتم هديه تحفه كل ده حسيت انه فلاشات كاميرا هو فيه ايه؟؟؟؟ كنت فى ضياع ذهنى منبعج

اترستأنا تانى و كنت قاعده زى القطه المخضوضه مكنتش انا , احسن كده بلاش فضايح من اولها

الشاى جه و الحلويات بعدها قالوا الكبار حيطلعوا البلكونه عشان الاتفاقات لسه باقوم لقيت حد بيدوس على التايير , ابن خالتى

استنى هنا رايحه فين

رايحه معاهم

لأ اقعدى هنا معندناش بنات تقعد فى اتفاقات

ايه ده فيه ايه؟؟؟

حتى هذه اللحظه معرفش ده العادى و لا ديه حركه عشان عارفنى بادخن بسرعه , قعدنا جوه فى الساونا قصدى الانتريه ما هو يوم من ايام الاشعه البنفسجيه و القعده طولت

خييييييييييييير

طلع ابن خالتى يستطلع و ريح معاهم شكله بيتلكك عشان يقعد فى الهوا طلع التانى ركن برضه طبعا كنت حامووووووووووت و اطلع فى الهوا بس اتبطيت مكانى طلعت توتته و جابتهم ,الحمد لله كانوا اتفقوا بس القعده كانت عاجباهم فى البلكونه و اترستأنا تانى و نقرا الفاتحه يا دي الدوخه هما كااااااااام؟؟؟ و برضه نفس حوار السلامات و البوس بس من غير الخاتم ما خلاص سلموا و باركوا مرة هو فرح؟؟؟؟!!!! اتكلم حمايا فى موضوع ميعاد الخطوبه
ها ايه رايكوا فى العيد ؟؟؟؟
طبعا رد فعلى معروف فى الاحوال العاديه بس لأ مش وقته و الكلام شكله جه على هوا خالى
نخليها على اول سبتمبر يكون الكل موجود, اعتقد سبتمبر معقول
و اتفقوا خلاص على كله الحمد لله طبعا بعدها اتسحبت عشان خالى ميشفنيش و عدت مرحله الفاتحه