النهارده خطوبتى

فيلم بورنو فى الشغل

قاعده فى امان الله وشي مدفوس فى كام فايل و فى نفس الوقت مكالمه على الموباين و مكالمه تانيه على التليفون العادى بالاضافه للكمبيوتر اللى فى وشي , عامله زى موظفين الحكومه بتوع زمان المطحونين اللى ناقصنى بس كيسين المخده السودا اللى بيلبسوها فى دراعهم و فجأه
رحت فاططه من مكانى
لأ كفايه كده تعبت اما اروح امشي رجلى عند العيال على الكاونتر
كل واحد مشغول يا اماتن مع عميل او تليفون او واحده بترغى مع خطيبها و عماله تكتب ايه بي سي على الكمبيوتر قال يعنى بتشتغل
الله يحرقك
لقيت عزة بتدلق البق ده فجأه و هى شايطه
ايه يا زوززة مالك؟؟؟
اصل السيستم داون
طبعا لو أنا مش أزميرالدا كنت صدقت البق ده , بس لأ , ساعه وقوع السيستم ده بيبقي عيد
على طول تلاقى شاشات الشغل بخ و شاشات سوليتير فتحت او شاشات الشاتنج او تنزيل الاغانى و أهو السيستم واقع و مينفعش نشتغل
على طول رحت فى اخر الكاونتر و طلباها على تليفونها اكيد الموضوع فيه اننا و هذه الطريقه الجهنميه نلجأ ليها لما نكون عايزين نكلم بعض و مش عايزين حد ياخد باله على الرغم من ان المسافه بتبقي اقل من نص متر
فيه ايه يا قطه؟؟؟ طبعا بصوت هامس
مش شايفه جوز الجزمه, اتنين عملاء , اللى قاعدين ادام وائل دول من صباحيه ربنا مش ساكتين
ما تسيبيهم يتكلموا , مركزه اوي يعنى!!!!
يا بنتى افهمى يا ريت بيتكلموا
امال ايييييييييييييييييه؟؟؟؟
تعالى شوفى بنفسك
لقيت واحد كده شاب اسمر البشرة ولابس بدله كامله و ادامه على الكرسي اللى قصاده مزأه بيضا بياض كالح يموع النفس , خمنت انها روسيه و لا مجريه اى نوعيه من النوعيات الساقعه ديه اللى بييجوا يلقطوا رزقهم من الشباب المصرى و يتجوزوهم و خصوصا اصحاب البشرة السمراء و كانت محجبه و لابسه لبس محترم و الاتنين لابسين دبل
بسم الله ما شاء الله ربنا يكتر من امثالك يا أخت , فى سرى
طبعا مخى اشتغل بسرعه حله توشيبا مش عارفه كام لفه فى الساعه
اكيد الواد من اللى بيشتغلوا فى شرم و لا الغردقه و البت لفته و اتجوزته , شكله ميجبش اكتر من كده
المهم عملت نفسي باشوف حاجه على كمبيوتر عزة بس بابص من تحت لتحت بالكشافات بتاعتى
لقيت الاخت كل شويه تمسك ايد الجدع و هو فرحان
ماشي
شويه و تفطس فى الكرسي بتاعها و تفرد رجليها لحد ما توصل لكرسي الاخ
رجلها طويله اظاهر

ماشي
شويه تانيه و الاخ يميل بكل جسمه عليها و يميل ويميل لحد ما يدفس وشه فى حضنها و هو بيكلمها
و الاخ برضه مش ساكت
قال يوطى فى الارض و يزغزغها فى رجلها

مش ماشي خااااااااااااالص
شويه تانيه تحط رجل على رجل و تخبط الجدع و هو برضه فرحان
يا دي النيله
الاخت عزة بان عليها تضررها من الافعال المنيله ديه فالاخ اخيرا اخد باله اننا فى مصر مش هولندا و قال للست
خلاص بقي
طبعا قالها برضه بمنتهى الانبساط و الانبعاج و يا ريته ما قالها اصلا
كانوا بيتكلموا انجليزى و تخمينى طلع صح انها اجنبيه
طبعا كل اللى فى المكتب انقسموا حوالين اللى بيحصل
اللى عجبه و بيتفرج و اللى استنكر و بيتفرج برضه و اللى ماسمحتش ظروف شغله و كان حيموووووووت و يتفرج
جالى تليفون فاضطريت ادخل مكتبى و انا باحسبن على التليفون اللى من غير اوان ده
و انشغلت شويه تانى
و تليفون تانى , طلع الاخ وائل اللى معاه جوز العملاء
أزميرالدا تعالى عايزينك تعملى انشيورانس
ايه ده للواد و البت المعفنين دول ؟؟؟ ده شكله من بتوع شرم صح ؟؟؟ قلتها و انا متأكده من تخمينى
تعالى بس ,انتى مش فاهمه , ده مستشار, قالها بصوت واطى زى الجوز اللى ادامه
ههاااااااااااا بطل الحركات المفئوسه ديه, اصله غاوى مقالب
تعالى بس
رحت على مكتبه بره و عرفنى عليهم
سياده المستشار عايز حجز لوارسو و انشيورانس
ايه نعم مين مش مشتشار!!!! ده طلع بجد و هى طلعت بولنديه
غرييييييبه شكله مش جايب خااااااااااالص
اللى اعرفه عن الفئه ديه انهم المفروض فئه محترمه و ليها هيبتها و بعدين ده عيل اوى على موضوع مستشار ده
أأهلا يا فندم و قعدت ادامه هو و المزأه بتاعته و فتحت السيستم عشان اشوف له حجز بسرعه عشان يغور, انا دمى حامى اصلى
بابص بطرف عينى الاقى الاخ الزميل رامى فكه واقع و عينه باظظه لأدام من الفيلم اللى على عالهوا ده
و بدأت اعمل له الحجز , النت الله يقطعه كان بطئ شويه
الجوز برضه مبطلش
و بدأوا تانى
اللهم طولك يا رووووووووووووووح
الوليه مسكت ايده و برضه شويه و تخبط رجلها فيه و الحمار مبسوط و لا عامل احترام للعالم اللى حواليه
و انا ماسكه نفسي من الضحك بالعافيه
الا الحركه الجايه ديه كمان
راحت واخده الكرافته بتاعته و شداها
اظاهر الحركه ديه غاظته فقالها بابتسامه هابله و انشراح صدر
شكلك كده عايزاها ,خلاص بقي
الله يخرب بيت الظروف اللى حاطتنى فى الفيلم ده
الله يهدك يا شيخه
كل ده ادامى
طبعا باقى الزملا كانوا بيبدلوا على كمبيوتر عزة عشان يتابعوا الموقف عن قرب عشان يبدوا استنكارهم
و طلبت باسبوره
فعلا طلع الاخ مستشار و رئيس محكمه و عمره تلاته و تلاتين سنه
طيب الست محجبه و انت مشتشار المفروض محترم
فاهمها يا أخي اننا ناس محافظين و التعبير عن المشاعر ميكونش كده و لا فالح بس عامل راجل و محجبها ,ما يفهمها الاول ان كل مكان و ليه قوانينه و اعرافه

بعد ما غاروا لقيت زميلتنا هدى جايه بتجرى بلهفه و شوق و غرام اظاهر جايه تستنكر هى كمان

هما فين هما فين؟؟؟؟

مشيوا

اخصصصصصصصص

ردت منى متقلقيش ممكن تشوفيه مسجل على الموبايلات
الله يخرب بيت الكبت و الاستنكار و ربنا يستر على ولايانا

يوم الهععان

يوم شم النسيم داه زى اى يوم اجازة عندى بقضيه فى البيت زى السنه ديه
و طبعا فى الغالب بيبقى يوم تنظيم الدولاب و تطليع اللبس الصيفى
موضوع مؤلم اوى , الحمد لله انه لبس صيفى و شتوى بس والموضوع داه بيحصل مرتين بس فى السنه

يوم الاتنين اجازة قلت حلو يبقى الليله صباحى بقى و اهو الف على مخاليق ربنا من المدونين
قعدت شويه مع الاسرة بعدين ما سدقت جت الساعة 11 سحبت نفسي فى هدوء و دخلت عن الكومبيوتر العزيز , لقيت بنت خالتى حتنام رحت مطفيه النور عشان مضيقاش
يا سلاااااااام جو شاعرى طحن
انا و الكمبيوتر و الضلمه
هاااااااااااااااااه
ديه تنهيده عالماشى
و كل واحد يفسرها زى ما هو عايز
المهم
بلوج يشيلنى و بلوج يحطنى وتعليقات من هنا و من قنا اااصدى من هناك
لقيت الباب اتفتح على مصراعه فجأه ( مش مصراعيه )
ايه داه يا ازميرالدا ؟؟؟؟؟؟ انت لسه فاتحه الكمبيوتر دا الساعه 2
طبعا خالتى قالتها بانفعال شديد
كفايه كده ارحمى عينيكى شويه 3 ساعات و كمان ساعتين بعد الشغل واوشا نايمه
طبعا تصببت عرقا من الخضه والمباغته
يا دى الحظ
لسه بدري الساعه اتنين و ملحقتش اعمل حاجه
ططططططيب انا باقفل اهه و بينى و بينكو انا كنت بدات ادخل مرحله الطراوة و عدم التركيز
واحده صاحيه تماتيه و نص و 9 ساعات فى الشغل و كمبيوتر فلازم اهنج
طبعا قفلت الكمبيوتر و قمت بتثاقل شديد اساسا كنت محتاجه حد يجرنى
اهو بقى استعديت للنوم و انا احس بخيبه امل شديده لأن خططى باظت لهذه الليله
طبعا ماسمعتش الموبايل للفجر و ده اللى اكتشفته لما قمت الساعه سابعه صباحا
لازم يوم الاجازة اصحى بدرى
لله فى لله من غير سبب
ياااه دا الموبايل مش مظبوط عشان الشغل
ظبطه على تمانيه و نص
وطبعا بدات محاولا النوم تانى …. مفيش
و ظهرت رغبه ملحه فى البكاء بسبب عدم القدرة على النوم بالاضافة للصداع القاتل اللى مش عارفه سببه
اتقلب يمين شمال مفيش فايده
جبت السرير من اوله لاخره مفيش
المهم فيه حته فى مخى نورت
الله
دا النهارده اجازه
قمت
و قفلت الموبايل
ففففففففف
يا رب عايزه اناااااااااااااااااااااااام
من هنا لهنا عينى شبكت تانى
طبعا نوم مش نوم
حاسه بدوشه و حاجات فى دماغى بس يتقال عليا نايمه
الحمد لله فضل من ربنا

طبعا قمت و انا مدمرة و عارفة ان ورايا مهمه توضيب الدولاب
و بنفس التثاقل بتاع امبارح
المفروض بخ بقى هو ايه احنا بقينا النهارده
و بالونه
جاءت احدى قريباتنا من زنجبار فجأ ,
ازميرالدا حبيبتى اموا اموا
مالك
شاورت على الدولاب و انا لسه فى مرحله التثاقل
يييييييييااااااااااااااااه ايه الكركبه ديه
اطأت برقبتى من التخاذل
عايز يترتب
و لا يهمك انا حارتبه لك انتى روحى بس و اعملى اللى انت عايزاه
طبعا رقصت من الفرحه و جريت اتشعلقت فى شاشة الكمبيوتر و….
صباح الخير يا ازميرالدا
ديه اوشا بنت خالتى
هااااااااااااااااوم
صباح الخير
كانت الساعه اتناشر ظهرا

مش عارف ايه تكسير العظام ده يمكن عشان لخبطه الجو و لا ايه ؟؟؟

المهم بعد الفطار والبيض المتلون ( خالتى ديه رايقه اوى ربنا يخليها لنا يا رب )و اللذى منه المفروض اروح اوضب الكركبه بتاعه الهدوم بس ...

انا مدمرة
جرجرت نفسي و اترميت على اقرب كرسي و قلت خلاص بقى شويه كده و مسكت الجرايد و حاولت افتح عينى زى ماكون بافتحها بكماشه

يا ربيييييييييى , انا اتحسدت و لا ايييييييييه؟؟

فضلت على الحال ده ساعه و لقيت باقى الاسره هاللين , حيتغدوا معانا شم النسيم بقى و فرصه للتجمع , جت الساعه اتنين و نص و بدأ توضيب السفرة للغداء , طول الوقت عماله افكر فى الخطط اللى كنت ناويه عليها من توضيب هدوم ثم الغداء ثم الشعلقه فى الكمبيوتر

و قعدنا عشان الغدا و
اتفتحت عينيا على اخرها و كأنها ستخرج من محجريهما و
انتقلت ببصرى فجأه للخاله : ايه ده ؟؟؟؟؟؟؟

فسييييييخ ؟؟؟
طبعا كنت حارقص من الفرحه اصلى الشهاده لله باموت فيه
ابتسمت الخاله لفرحتى المفاجأه و الصحصحه اللى ظهرت على غفله : اه و فيه رنجه كمان و بصل و و و
طبعا عينك ما تشوف اللا النور
نزلت عليها حتتك بتتك , ممممممممم

و الله مصلحه شم النسيم ده ( يا ريت تنسوا البوست بتاع المم )

فى عز مانا نازله طحن فى الفسيخايه الغالبانه باضرب بنظرى لقيت الناس سايبين الاكل و بيتفرجوا عليا ,انتقلت ببصرى لكل واحد منهم , الكل مركز معايا , طبعا لميت نفسي و بدأت اكل زى البنى ادمين بالراحه شويه
و بطلت اكل لقيتهم بيتصرفوا على انى خلصت اكل و بدأت عمليه لم الانقاض و مخلفات الحرب

ايييييه؟؟ لسه انا باخد نفسي بس
و اخدت لقمتين بس و بدأت احس بتقل كده و مش قادرة اكمل , يلا الحمد لله كفايه كده بس فضلت فى مكانى شويه

ايه ده ؟؟؟
مش عارفه بدات احس بالتقل تانى اللى كان قبل الاكل و مبقتش قادرة ارفع دماغى من الصداع بالاضافه لبعض الخدر فى جميع انحائى

استغفر الله العظيم دا ايه الاجازه ديه يا ربى

قمت و خدت ايديا فومين بعد عمليه الانقضاض ديه
و تااااااااانى اترميت على نفس الكرسي
وللمره الالف الهدوم المرميه جت على بالى و الكومبيوتر و الشعلقه
و بعدييييييييييييييييييييييييز!!!!!

تشربى شااااااااااااااى؟؟؟؟ ديه اوشا من المطبخ
رفعت راسي بونش و شاورت بالموافقه
يلا يمكن اتظبط بقى و اقوم اشوف اللى ورايا و كانت الساعه فى تمام الخامسه
و جت سته و مفيش اى تحسن
بس زاد احساس كده بالقرف و

هععععععععععععععععععععع
طبعا جريت عالحمام و دلقت رأسي فى التواليت و بدأت فقرة من الترجيع المتواصل
كتل من الفسيخ و الرنجه المطحونه ( طبعا مكانش فيه هضم )
و ألم شنيع فى معدتى او بمعنى اصح اعتصار مع سيل من الدموع
كنت عامله زى القطه الشرقانه
و خلصت الوصله الحمد لله و اترميت على السرير و انا بارتعش من اللى شفته
و الهدوم اللى عايزه توضب و الكومبيوتر مرميين حواليا بيفكورنى بالخطط المتفرتكه

بس اموووووووووت و اعرف السبب فى ده كله ؟؟؟

يكونش برد؟؟؟؟؟؟؟؟

البتنجنان

مش عارفه ليه ربط الجنان بالبتنجان؟؟؟؟

البازنجان قريت مرة انها كلمه فارسيه معناها بيض الجن و طبعا معروف اللى بنعمله مسأعه
و الجنان عندنا معناه ان حد يعمل اعمال غير عقلانيه و هابله و الطبيعى ان الناس تسخر منه و عادى لو يتحدف بالطوب و العيال تمشى وراه و تقول العبيط اهه
مش من ضمن معانيه المرض النفسي

حصل موقف مرة و كنت راكبه ميكروباص بس كنت راجعه عالبيت هنا , كان ممكن احكيه بالطريقه السابقه بس مش حينفع لأنى لما بافتكره بحس بالقرف بجد

ركبت الميكروباص و العربيه كملت عادى
كان قاعد جنبى اتنين رجاله و ورايا رجاله برضه من ضمنهم واحده ست عاديه (الموضوع ده قديم فمش فاكرة اوى تفاصيلها ) بس على ما أتذكر كانت لابسه جيبه سودا و بلوزة لبنى و كانت محجبه بس الحجاب كان موضوع بصورة مهمله شويه و معاها شنطه ايد , يعنى ست عاديه , فى منتصف الاربيعينيات و متوسطه الحجم
حلو ؟؟؟؟؟
المهم اول ما الست ركبت العربيه و كانت اخر حد دخل العربيه , الواد التباع قفل الباب عشان نمشى و ديه راحت صارخه , ايييه ؟؟؟ حاتخنقنى كده , افتح الشباك ده , وبدأت تحاول تفتح الشباك بعنف , ايه عايز تموتنى ؟؟؟ حرام عليك ,,, ليه كده , اوعى
كل كلامها كان صراخ

عايزين تموتونييى؟؟؟؟؟ ليه ؟؟؟؟ و بدأت تقول كله صراخ , انا طبعا مسكنى الرعب وقتها , هى كانت صعبانه عليا فعلا بس انا مش ضامنه ممكن تقوم باى حركه عنيفه و مفاجأه
طبعا ده اتقابل بالسخريه من البعض و ديه اكتر حاجه حرقت دمى
و طبعا ذكرت كلمه بتنجان اكتر من مرة
السواق وقف فى محطه بنزين , راحت هى مصرخه برضه
ايه نزلنى , حاتخنق , و راحت نازله من العربيه لغايه ما يمون
و طلعت ازازه مياه و دالقاها على دماغها
و لما خلص ركبت تانى , و برضه نفس الصراخ
حاموت كده حرام عليك , و بدات تشتم السائق و تتوعده لأنه فعلا كان بيستفزها بالكلام
و بدأت برضه تتمتم بلاستغفار و الاستعاذه و كلام مقدرتش اتبينه بالظبط
واحد من الركاب برضه معجبوش رد فعل السواق و بعض المستفزين فبدأ ينبهه بأنه عيب كده و برضه حاول يهديها ( خلاص يا ستى معلش )
و استمرت فى اهانه السائق و الشتيمه بشكل عام بصراخ
انا حارابيك و اربى اى حد هنا يفتح بقه , حابلغ عنكوا , انت مش عارف انا ممكن اعمل ايه , لدرجه انها قلعت حذائها و بدأت بالتخبيط على الكرسي اللى ورا السواق فيما معناه الوعيد
اللى وراها نزل فاللى جنبى قام و قعد وراها لأنه خاف طبعا هو كمان , و هى جت جنبى , و انا كمان زاد رعبى على الرغم من انى فعلا اشفقت عليها , طبعا استمرت عالحال ده لغايه ما نزلت
السؤال هنا
ليه السخريه من الست ديه ؟؟؟؟؟
هى مالهاش ذنب فى مرضها , و اصلا اى حد ممكن يتعرض لحاجه زى كده
حتى لو مفرقتش , تجاهلها خالص حيبقى ارحم و بناقص التعاطف يعنى

يمنى كانت زميله فى الابتدائى و فى نفس الوقت مامتها صاحبه ماما, يمنى ربنا مبتليها بالتخلف العقلى او البله المغولى , مش عارفه ازاى قبلت فى المدرسه بس اى حاجه ممكن فى مصر

يمنى كانت مصدر سخريه متواصل فى المدرسه من الطلاب و احيانا المدرسين, حاجه غبيه كل ما افتكرها احتقرهم , بجد كنت بابقى متغاظه جدا و باضايق اكتر لانى مش عارفه اخد موقف حاعمل ايه يعنى , كان فهمها بطئ طبعا ده عادى لحالتها المرضيه و طبعا اخدت الابتدائيه و عارفه محدش حيسأل ازاى لأن كل حاجه ممكنه بعدها اهلها قدموا لها فى مدرسه خاصه لمن فى حالتها بيتعلموا فيها عادى بس بما يناسبهم و اخدت اعتقد دبلوم و انهت دراستها

احيانا يمنى بتشوف ماما و دايما تسأل عليا انا و اختى , لسه فاكرانى بجد بافرح انها فاكرانى , اكتشفت ان يمنى بتفهم كل حاجه بس ببطء و تساعد مامتها فى البيت كمان , نفسها تتجوز و ده من حقها زى ما كان من حقها تتعلم حاجه مناسبه ليها و كان من حقها برضه الناس تعاملها بادميه

ربنا كرم البنى ادم بعقله حرمانه منه مش معناه حرمانه من انسانيته