خيبه البنات القويه

من كام سنه كده كان فيه برنامج اسمه فرح كليب , كان تقديم الست ام بقلظ ماما نجوي, البرنامج ده بيجيب اتنين لسه متفائلين و شايفين الحياه بينك و حيتجوزوا , فكل واحد من الاتنين بقي يقعد يتكلم عن الموضوع ده ,و انهي ظروف سعيده حدفتهم على بعض, و الحياه قبلك كانت غامقه و بعد ما شفت خلقتك افتحت, و اي كلام فى الهجايص من اللى بيتقال فى المواقف اللى زى دي, عشان التفاؤل و كده يعنى , و يجيبوا فرحهم كمان , كل ده فل و مفيش اي غراب عليه, اللى استرعى انتباهي بقي , حاجه لطيفه اوي, كذا واحده من البنات ديه كانت فرحانه اوي و متفشخرة و بتقولها بضب مفشوخ
بس انا مش باعرف اطبخ , انا اخري اسخن سلاطه, ده حتى البيض المسلوق مش باعرف اعمله ازاي, هو بقي يتصرف, ههههههه, انا ماليش فى شغل البيت
الا هي ديه حاجه حلوه يعني؟؟؟ تستحق الواحده تبقي سعيده بيها مثلا , طيب بيقولوا ده على سبيل الدلع يعني ؟؟؟ و لا عشان اظهر غقيقه المفروض مقولشش اني باقف فى المطبخ و باقطع بصل و توم؟؟؟؟ و لا باقف على الحوض و هاتك غسيل فى المواعين
لأ و المصيبه اني لقيت الموضوع ده عادي اوييي
ليا واحده زميلتي مكانش ليها فى شغل البيت و لا الطبيخ و لا الحاجات ديه, لما سألتها بتعملي ايه؟؟
قالت ماما بقي , بتعمل لي معاها , اصلي ماليش فى الحاجات ديه
طيب و جوزك ؟؟؟
لأ عادي يعني , مانا كده مرتاحه
الله !!!!
واحده تانيه , كل يوم تفوت على امها تاخد اكلها معاها
يا دي النيله
واحده تالته بس ديه لسه مش متجوزه
بصل !!!!! ايوووووو
لأ انا ماليش فى القصه ديه خااااااالص, لأ هو يتصرف بقي
ده على اعتبار ايه يعني ؟؟؟ حتتجوز راجل و لا حاجه تانيه ؟؟؟
الا ديه مش فاهمه و اساسا مش متخيله ان يوما ما جيكون ليها بيبي بيعمل ايوووووووووووو و لازم حتشطفه ؟ و لا حتجيب امها ان شاء الله مع كل ايووووووووو, و لا ينكن المحروس المنتظر هو اللى يشطفه
لأ و تلاقي امهات فرحانين اوي بخيبه بناتها
ديه مش بتشيل الفله, لما تتجوز بقي تبقي تعمل, لسه صغيره
انا بنتي ماسكه مديرة مركز مش عارف ايه و بتحضر ماجستير فى مش عارف ايه برضه, حاروح اروق لها شقتها و بالمرة اطبخ لها و اجيب العيال من المدرسه, بتتعب
الا بنتها ديه ايه عدم اللاموناده؟؟؟ بغض النظر يعني عن ان المفروض يكون عندها دم و حبه احساس بالمسئوليه, مش الناس تخف عن اهاليها شويه
و لا مودام تانيه , العياذ بالله عيالها بقوا مدمنين
ادمنوا المكرونه , من كتر ما بتعملها , العيال مش قابلين اي اكل تاني , ده اساسا اذا كان عندهم فكرة عن اصناف تانيه غيرها
اعرف بنات كتير فى رينج 23 و 25 سنه , استرعي انتباهي حاجه برضه, باقول كلام كبير النهارده اصلي لسه شايفه منى الشاذلى, البت من دول تقول لك ايه
لأ جواز ايه؟؟؟؟ هو انا باتحمل مسئوليه نفسي عشان اتجوز
الا ديه لما تكون شحطه كده و مش متحمله مسئوليه نفسها , حتتحملها امتي ان شاء الله؟؟؟؟
اما ضبها يقع؟؟؟
و لا واحده و واحد بيحبوا بعض و عايشين الدور
ها يا بنتي حتتجوزوا امتي؟؟؟
و الله هو عايز بس انا لأ
نعم يا ختي؟؟؟ ليه
يا بنتي الجواز ده وجع دماغ و مسئوليه , لسه بدري, احنا حلوين كده
صبرني يا رب عالالشكال اللى باشوفها
طبعا فيه خيبه من نوع تاني , تلاقي العيل بيعيط و لا وقع و الواحده من دول متلقحه فى مكانها و لااااااااا تعرفه , تستني لما لا مؤاخذه الافندي بتاعها يقوم هو و يشوفه , و لا برضه متلقحه و لا مؤاخذه جوزها برضه هو اللى بيشطف العيال
منتهي البرود , العالم ديه مبتحسش؟؟؟؟؟
طيب بغض النظر عن الستات دلهما, ايه موقف دكهما, الرجاله؟؟؟
طبعا فيه عالم مش حيعجبها الكلام ده , تقول لك ما الحياه مشاركه و حقوق المراه و لا ماعرف ايه و كلام من المجعلص اللى بيشرق ده
بس فيه حاجه اسمها فطرة و برضه مسئوليه متقسمه, كل واحد ليه دوره و ممكن التاني يساعده, مش الورق يبقي متلخبط كده
يعنى البت من دول مش حمل مسئوليه و لا عندها فكرة عن البطيخ
ماااااااشي
قلناش حاجه يعني
بس تبقي فرحانه
لييييييييه؟؟؟؟؟
الى اللقاء , ان شاء الله يعني, مع خيبه الرجاله القويه