مكالمات نص الليل 2

فى ليله ليلاء الساعه تلاته فجرا قلقت فرحت الحمام و انا باتطوح, عادى يعنى بتحصل , لما رجعت لسه بحط الكموخه على المخده لقيت الموبايل بيزن و بينور ,طبعا الكتكوت بدأ يلعب اترددت الحقيقه و مرضتش ارد , بابص الاقى 6 ميسد كالز لنفس الرقم يا نهار لسه مطلعش مكالمه فى نص الليل!!!! ده اكيد عميل حجزه له بره و حصلت مشكله او ملحقش الطيارة او اى مصيبه من هذا النوع او قمت و قعدت و بدات اعصر مخى و اصفى ذهنى و اقلب افكارى فكانت النتيجه عصير مالوش طعم و لا لون اى مفيش نتيجه و بدأ الموبايل تانى يا دىلنيله و بعدين ,طبعا مش من اخلاقى ارد على تليفونات بعد 10 بالتوقيت الشتوى الا لو مضطرة و عارفه ان ليا شغل و المفروض اتابعه ,عميل عميل بلا قله ادب فسبته يزن و فى نفس ذات الوقت معرفتش انام تانى من القلق و فضلت اتقلب على جمر النار و اضرب خماس فى اسداس ماهى لو مصيبه من مصايب الشغل يبقى لازم اجهز نفسي لزوبعه عالصبح و اجهز دفاعاتى و مبرراتى للدروب الى حصل كنت حاضعف و ارد بس ابدا لأ ما ممكن تطلع مكالمه مش اللى هى و لا معاكسه
طبعا رحت الشغل مضروبه بالنار
على الصبح وصلت الميسدات لعدد لا بأس بيه حوالى 45 يلا يولع
على تسعه و نص الصبح و انا فى الشغل الرقم طلبنى تانى طبعا رديت بلهفه و قلبى بيدق , تقولش مكالمه غراميه
الو
ايوه , راجل صوته تخين كده مش لطيف
المحمول ده بتاع مين , الراجل شكله بالع اتوبيس
ايوه يا فندم ده موبايلى , مؤدبه اوى, هو حضرتك اللى كنت بتطلب بالليل؟؟؟؟؟
المحمول ده بتاعنا
لأ يا فندم ده رقمى
ايه حتستهبلى عليا.. المحمول ده بتاعنا و مسروق
(يا دى النيله مسروق ايه بس) , لأ و الله انا شاريه الرقم مش واخداه من حد
بصي بقي, المعلم بدأ يتعصب , شارياه مش شارياه ده بتاعنا و حاجيبك
طيب و رقم حضرتك كام؟؟؟ , يمكن طالب الرقم غلط اصلا قلت اساعده
انتى مالك يا حراميه يا بنت ..... انت حتضحكى عليا يا
و رحت قافله بسرعه

مش فاهمه الناس ليه تقل ادبها ما يتنيل يفهم الاول انه مينفعش يجيبنى بالرقم بس يقدر بالسريال بتاع الموبايل هى الناس جرى لها ايه؟؟؟؟؟؟

بلاوى