خلّي عندك صوت

بلدنا ليها باع طويل فى موضوع الانتخابات ده ، كل انتخابات سواء شعب شورى تلاقى البلد كلها طالعة برجالتها بستاتها ببناتها ببابا غنوجها الا المذكورة اللى بتكتب البتاع ده يا اخى و يسبق ذلك بان البطاقة الانتخابية بتاعتى توصل لى لحد عندى معززة مكرمة ديلفرى يعنى

مستنيينك يا ازميرالدا بقى ان شاء الله

هه ان شاء الله

ازميرالدا اوعى متجيش لازم تيجى تحطى صوتك للضكتور

اااكيد طبعا

يا ريت محدش يبقى نيته كويسة و يقول دا البلد ديه يا خى عندها وعى انتخابى و عارفين قيمة الصوت اللى بيتحط ، فى الحقيقة البلد كلها بتروح تحط صوتها للمرشح اللى من عندنا و لو مفيش واحد من عندنا مش حتلاقى دبانة رايحة تحط صوتها ، و ده ليه ؟؟ لان ده المرشح ابن بلدنا اللى حيخدمها ( خدمات شخصية يا شوباب من شغل و حج و واسطة و غيره ما هو مفيش غير كده أو موت يا حمار بقى) اومال ايه ، فالموضوع كله كله بيبقى عامل زى الصراعات القبلية ، مرشحنا الضكتور هو اللى حيكسب مش بتاع البلد التانية ، لو بتاع البلد التانية هو اللى فاز مش حيعبرنا، زى ما يكون الموضوع واقف على اصوات بلد المرشح و بس مش اصوات الددايرة كلها ، ده غير المشاحنات و الخناقات اللى ممكن توصل بين العيال فى المدارس من البلدين و العمال اللى فى نفس المصنع ، افتكر فى انتخابات تمانية و تسعين نتيجة تصرفات بعض البلطجية ( المصيبة ان المرشح بتاعنا راجل محترم و ملوش دعوة بموضوع البلطجة ده ) اللى العصبية واخداهم حصلت مشاحنات مع الجانب التانى،و بعينى اللى حياكلها الدود شايفاهم بالسنج و المطاوى و الجنازير ، نتيجة لده الامن المركزى شرف لبلدنا و كانت ليلة يا عمدة ، العيال يحدفوهم بالطوب و يجروا و بعدين يجروا مقطورة و يحطوها ادامهم و يجروا و قنابل مسيلة للدموع و حظر تجول و محدش يقف فى البلكونات – بس انا كنت باتفرج من الشيش – و المدارس اللى تتقفل على الناخبين ده غير واحد مات و التانى حصلت له عاهة ، كنت دايما واخده موقف من الموضوع ده و شايفاه لعبة و ضحك عالدقون، زيد زي عبيد ، لو عبيد مستقل و فاز حيروح الحزب ففكل الاحوال صوتى رايح للحزب ده، و من ناحية تانية اساسا اساسا انا لا اعرف ده و لا ده مش بنشوف وشهم الا ايام الانتخابات فعلى اي اساس بقى اختار ، معلش مش حاختار واحد لمجرد انه من نفس البلد و حتى ماعرفش ايه برنامجه فكنت شايفة الموضوع مش جايب همه زائد البهدلة اللى بتحصل ، فشكرا يعنى

اى ست لما ربنا بينفخ فى صورتها و بتحمل بتبتدى مرحلة من التفكير منعدمة الانانية شويه و هى مستقبل ابنك او بنتك ، من ضمن الحجات اللى بجد بدات افكر فيها – ممكن يتبص للحتة ديه على انها منتهى العتة او مخ تعبان بس يلا – مين ممكن يحكم ابنى او بنتى ؟؟؟ اذا كنا اهه عايشين و بنعافر و تقريبا مفيش حاجة عدلة ، اللى جاى ده حيعيش ازاى ؟؟ ممكن الموضوع يتبص له على انه مبالغة ، بس هو هرم ، لو اللى فوق مظبوط اللى تحته حيبقى مظبوط او العكس، ممكن ده اللى خلانى اغير نظرتى لموضوع الانتخابات ده ، ممكن الموضوع يبقى عامل زى ما تكون بتحرك حجر كبير بعود كبريت ، حيتكسر لو لوحده لكن لو معاه مليون ممكن تحركه ، مش عايزه احس فى وقت من الاوقات ان انا كنت جزء و لو بسيط فى انى ضيعت فرصة ابنى او بنتى فى انه يعيش حياة احسن او مختلفة ، مش بيسمع تفس الكلام و بنفس الطريقة لبقية عمره و مفش حاجة بتحصل، ممكن زى ما بيتقال انه مفيش فايدة بس على الاقل عرفت انى عملت اللى عليا و بعدين ياااااا عااااااالم ما يمكن واحد من التمانين مليون تكون نيته كويسة حبتين و ربنا يكرمنا على ايده يعنى

حاول تشارك

فيديو الحملة

المجموعة عالفيس بوك

بونى بونى

على غير العادة كنت فايقة و مروقة القنانى ، قررت اروح اشقر على خالتى و كان يوم ما يعلم بيه الا ربنا ، يقطن مع خالتى فى الوقت الحالى حفيدها التافه البالغ من العمر خمستاشر سنة و ده لأن امه و ابوه مسافرين برة فترة ، غالبا طفشانين منه ، اللى بافكر فيه كل ما اشوف المحروس روككا و ده عقبال عند السامعين النيك نيم بتاعه او بالبلدى كده دلعه مع ان اسمه مصطفى ، من قلة الاسامى !!!! اللى بافكر فيه ان ايام ما كنا فى سنه اننا مكناش ببهذا القدر الكثيف من الهيافة.

وصلت بالسلامة و استقبلتنى خالتى بحفاوة كالعادة

ازيك يا أزميرالدا ؟؟ جوزك كويس معاكى ؟؟

مرضتش اسيح لجوزى ، الواحده مالهاش الا جوزها برضك يعنى

الحمد لله كويس

و ميلت عليا خالتى بصوت نسائى واطى حبتشين

الا مفيش حاجة فى السكة ؟؟ ( مكنش فيه لسه )

استغفر الله العظيم ، لأ مفيش

تشم ، ديه حركة كده بتعملها الستات لما تحب تتنقور او يصعب عليها حد ، ده علاء ، ده يبقى جارها ، مراته لسه جايبه توأم

ايه الحظ ده ؟؟ على طول كده ؟؟ لأ و توأم كمان

يلا معلش كله بأوانه

وبعد ما اديتنى شيوية نصايح انى اخلى بالى من جوزى و مزعلهوش و مش عارف ايه شرف البيه من أوضته

ايه ده ؟؟ انتى هنا ؟؟ ازيك ؟ الواد ده من يوم ما بدأ يكبر عايز يعمل فيها راجل و لا ايه ، ناقصاه اصله

و هو حاطط ايديه الاتنين فى جيوبه و واقف مقتب و نص البنطلون مدلدل عالارض و و مفرفت من كتر الدوسان عليه ، ايه منظر الشحاتين ده ، ده غير شعره الكمبوشة اللى عامل زى راس العبد بالظبط ، و الله يبقى فلة فى تنضيف السقف ده ، لا و كومة الفتل و جلد الحنفية اللى مالى ايده، العيال ديه مش بتستحمى و لا ايه ؟؟

اهلا يا خويا ازيك؟؟

تيته ، لينا حتيجى كمان ساعة عشان تاخد بونى بونى ، انا نازل شوية و راجع على طول

ميلت على خالتى اذ فجأة

ايه ده يا خالتى ده القط بتاعها ؟؟

خالتى بصت باشمئزاز مع عوجة بق تدل عالقرف ، مش ليا كل ده ، بس من روككا او بونى بونى او الاثنين معا

ده الهامستر يا جاهلة ، راس العبد هى اللى بتتكلم ، و راح رازع الباب وراه

يعنى برضه القط بتاعها !!!!!!!؟؟؟ حد يرسينى

خالتى كانت لسه حتقوم عشان تضايفنى بس مسكت فيها

و النبببببببببببببببببببببى مانتى قايمة ، انا حاقوم ادعبس بنفسى ، طابخة ايه النهاردة؟؟ و جرى عالمطبخ و بدات الدعبسة فى التلاجة ، اممممممم عصير جاتوه جيلى مربى بلح ، حاجرب كله ،فى عز التركيز و راسى مدفوسة فى التلاجة ، حسيت بحاجة فرو جنب رجلى ، قلت يمكن خالتى سايبه شبشبها يدفى التلاجة ، بعد شويه الفرو بقى جنب رجلى التانية ، يا دى المصيبة السودا !! ضربت بعينى الاقى فار

و هى صرخة واحده طويله تلتها عدة صرخات و صوات و كام تنطيطه لحد ما عرفت الملم اعصابى و جريييييييييييي على بره و عشان اكون دقيقة فوق الكنبة و وشى مزنهر و ركبى عماله تلق مع تهتهه و صباع على المطبخ

فففففففففف

فيه ايه ؟؟؟؟؟؟؟ انطقى

فار فار فى المطبخ ، انا عايزة اروح ، روحونى و النبى

يا بنتى اهمدى بس استنى ، حاكلم علاء هو هنا النهاردة ، حاخليه يجى يموته

لا بلاش عيلاء بلاش عيلاء ، عشان الاحراج

راحت خالتى هابه فيا مره واحدة ، و ده وقته اهمدى

المهم عيلاء وصل و شافنى و انا متشعلقة على الكنبة ، كان موقف مش عاجبنى بالمرة، واحد كان متقدم لى و رفضته، ايه الاحراج ده

متخافيش بس اهدى و دخل ، يدوب مفيش خمس دقايق و لقيته خارج بيتكلم فى الموبايل ، خمنت انها مدامته

معلش يا طنط هو كان ميت اصلا ، أزميرالدا تقريبا داست عليه لما كانت خايفة ، انا مضطر امشى ، بيقولوا العيلين تعبانين ، حابعت ابو احمد – ده البواب – يشيله ، معلش

و راح نازل بسرعة ، أثناء ما قال كلمة العيلين عيانين و بالرغم من ان الموقف مش ناقص تماما الا ان خالتى ابت انها تفوته و بصت لى بصة ذات معنى من فوق النضاره، بعد ما علاء مشى بقى

ايييييييييييييييييييه ؟؟؟ بتبصى لى كده لييييييييييييييه ؟؟؟ انا مش أرارة و ده قضاء و قدران يعنى ، يومين انفلونزا

قعدت و هديت و انا بانهج من المجهود الجبار اللى بذلته فى الصوات و التنطيط و التهتهه ، و راحت جابت لى العصير بنفسها عشان اهدى اعصابى المنهارة

بعد ما اكلت المكرونه و الجاتوه و حليت بالعصير و الجلى ، المحروس شرف ، المذكور فى اول البوست ، روككا

اييييييييييييسكت مش كان فيه فار و عيلاء موته

ايه القرف ده !!

مش فاهمه قرف لان كان فيه فار و لا لانه موته !! عيال غريبة

مفيش دقيقتين و شرفت ست لينا و لا ليهم و روككا عرفنا على بعضشينا

أزميرالدا قريبتى ، أهلا و سهلا

لينا صاحبتى ، هااااى ، وكانت هاااى ممطوطه شويه و مخنوفه حبة

المهم زى ما روككا هو النسخة البشرية من " راس العبد " فلينا هى النسخة البشرية من " منشة جدى الله يرحمه " الا ان المنشة كان شعرها ناعم و كانت صالبة عودها شوية ، لينا ديه تحسها مخلعة من بعضها كده و مقفعة

مش فاهمة ايه الموضه المهببة بتاعة" الكيورلى "اللى طالعين فيها ديه ، الله يرحم اعلان ويلا فورم اما كانت الست فى اوله متضايقة ان شعرها زى السوستة ، دلوقتى خلاص هما سبعتاشر شعراية و انكشيهم ، و اى حد يعلق يتبص له من فوق لتحت بقرف

ده كيورلى يا ايجنورانت

لينا شرفت عشان زى ما قالت تاخد بونى بونى ، حقها يعنى يا اخوانا ، دخل روككا يدور على بونى بونى و رجع تانى ، واطه على جدته

سمعتها بتقول له ، دور كويس يمكن تحت ال و راحت قاطمة و باصة لى و مبرقة

الفار اللى شفتيه كان شكله ايه ؟؟

الواد اتفزع مش عارفه ليه

ايه ؟؟؟ و البت واقفة مش فاهمة حاجة

امممممممممممم ، كان عجيب خليط ما بين فار المعامل الابيض و فار بلدى و ديله كان مقطوش، بس مش عارفة حاساه مختلف عن بقية الفران اللى شفتهم قبل كده

اعققد لو كنت قلت له ابوك و امك كانوا فى الماتش فى السودان مكنش حيبص لى البصة ديه

الواد قعد يرتعش و وشه احمر و شويه يبص للينا و شويه يبص لينا

هو فيه ايه يا تنت ؟؟؟ ده انا مش لينا

و بعدين انا لا مؤاخذة مش فاهمة أيييييي حاجة ، اقعد و لا أروح ، و لا استنى لما هما يطردونى

المهم الواد قال للينا تعالى ثانية بره و خرج من الشقة ، بعد شويه سمعت كلام ان روككا ده " ايديوت " و ان هى " تراستيد هيم " و ان ديه " لاست تايم " حتشوف وشه و احتمال وش اللى خلفوه فيها و كل ده بزعيق و عياط

و دخل روككا و هو بيبص لى شذرا

هوااااااااااااا ايه الموضوع بالظبط ؟؟؟

الموضوع ان ده مكنش فااااااااااااااار ، كان هامستر ، هامستر

طيب المفروض اقول له ايه ده دلوقتى ؟؟؟ و هى تربى القرف ده ليه ؟؟؟

انتى مااااااااااااالك

اه ده بيعلى صوته عليا ، ماشى يا معلم

اخدت الشاليموه اللى كنت باشرب بيه العصير و مررته مرتين على لسانى اشفط باقى العصير

بص خد ده اعمل له بيه تنفس صناعى ، ممكن يكون ليه عايش و قلبه بس اللى وقف و لا اقولك خد لك سلك عريان و كهربه بيه ، اعمل له صدمة كهربائية و انعش له قلبه

عماله اسأل من صباحية ربنا ده القط بتاعها ؟؟؟ ايه ده محدش معبرنى ، و بعدين ايه القرف ده فعلا ؟؟؟ الواحد يربى جوزين فراخ و لا ارانب افيد ، عالم فاضية

الواد هاتك يا برطمة بالانجليزى و باين شتيمه و لا ايه و راح داخل أوضته و هابد الباب وراه و خالتى قاعدة ساكتة ، حسيت ان كفاية كده عليهم و ابقى اجى وقت تانى أعوض فيها الزيارة ديه

طيييييب يا خالتى استأذن انا بقى عشان مش اتأخر على ربيعى حبيبى

الله يكون فى عونه ، ده راس العبد من جوة أوضته

انا برضه الكبيرة و مش حارد على راس عبد زيك

حكم 2

بيقولك يا عم الحاج اذا كان ده وش القفص 

(هشام طلعت اخد اعدام فى سوزان و كان مخرج ابوها من تهمة مخدرات و اخوها من تهمة قتل  - ممدوح سماعين اخد سبع سنين فى العبارة و هربان - هانى سرور اخد تلات سنين فى موضوع اكياس الدم و بيدوروا عليه لسه - شوبير لسه قضيته شغاله و ان شاء الله يشرف مع اخواته ) 

فما بالك بقى بقعر القفص .. أكيد معطن

* ده غير البراعم الصغار امثال نائب دشنا اللى اقتحم القسم و البلطجية دول*

اضغط ذلك اللينك كمان

حكم

بيقولك يا اخى ده ربنا مقلكش فى القران ازاى تصلى بس قال لك ازاى توزع الورث و تحافظ على مال اليتيم و تدى له حقه

و اللى معرفش ياخد حقه فى الدنيا حياخده فى الاخرة

انه التدين الجديد

هو البنى ادم الفريد من نوعه اللى قابلته و لو حد كان حكى لى عنه كنت قلت ده بيبالغ، احمد شاب عادى جدا ، التغيير بدأ من ساعة ما القنوات امثال الناس و الرحمة و الحكمة و اكيد فيه قناة جديدة بيعملوها فى الوقت الحالى بدأت، المهم ، أحمد فى انتظار الشغل لسه بما انه متخرج السنة ديه ، احمد بيقضى الاربعة و عشرين ساعة فى السرير ، اممممممم عشان بلاش مبالغة تلاتة و عشرين ساعة ، ما هو برضه فيه صلاة و أكل و حمام ، أحمد مش بيعانى من أى علة صحية و الحمد لله ، ده حتى على فترات متباعدة ممكن يمارس نشاط مختلف غير قعدة السرير ، أنه مثلا يروح كورس كمبيوطر أو انجليزى ، ده كمان ساعات بيروح الجيم ، أحمد عنده أصحاب بس مش غاوى يخرج و لا يقف معاهم. النشاط الوحيد اللى أحمد مواظب عليه هو الفرجة على الشيخ محمد حسان و يعقوب و غيرهما ، و ده على مدار اليوم الا لو فيه ماتش و لا حاجة و ساعتها يا عينى يعانى من تمزق نفسى رهيب بين انه يشوف شيوخه و ان يشوف الكورة.

أحمد ما شاء الله بيصلى الفجر حاضر كل يوم و ده طبعا لأنه بيطبق و ينام الساعة سبعة الصبح. زمان من كام سنة كان بيصلى فى الجامع كل الفروض بش تقريبا مل بقى و لا ايه و لا اكتفى بالثواب اللى بياخده من الفرجة عالقنوات الدينية، موش عارفة !!! من كام سنة كده كانوا بيصحوه قبل العصر بربع ساعة

يا بنى قوم الضهر حيفوتك ؟؟؟ حد يعمل كده !!!

و يصحى أحمد جرى عشان يلحق الضهر و بعديه العصر عشان يرجع يكمل نوم ، لما فى مرة اتسحبت من لسانى و سألته

الا هو مش المفروض الواحد ميأخرش الصلاة كده لاخر وقت ؟؟؟؟

كان رده : الله يا اخى !!! من صلى البردين ( الفجر و العصر ) دخل الجنة ، و ده حديث شريف

اللهم قوى ايمانك

اعتقد ان اى حد تانى غير احمد مش حيستحمل الوضع ده ، لان الحياة مليانة حجات غير الفرجة عالتلفزيون و التلفزيون نفسه مليان بلاوى

أحمد عدا موضوع ارتباطه بالقنوات الدينية و السرير فهو شاب عادى جدا ، بيبقى كاره نفسه لما امه تطلب منه حاجة يعملها كشراء لوازم للبيت او تصليح حاجة بايظة

أحمد ، عايزين طلبات للبيت تجبها لنا

طيب انشاء الله ، و ديه طبعا مش بتتقال كده بحسن نيه بس بتتقال بمنتهى العفرتة و القرف ، ما هو برضه اكتفى بالثواب اللى حياخده من الفرجة على قناة الناس

دايما بيدخل فى جدال مع اخواته لما حد يبدى اعتراضه انه ارحمنا شوية ، فيكون رده

انتوا اكيد راكبكوا الشيطان ، اسمعوا الناس ديه بتقول ايه ، ربنا يهديكوا

يا سيدى عارفينهم ارحمنا مش معقول الوقت كله عالناس ديه، روح غير ، اقرا كتب و لا اقعد عالنت من غير ما تعمل الشات بتاع كل يوم ده

يا جماعة المرء يحشر مع من احب، قصده الشيوخ يعنى، انا خايف عليكوا و الله من الكلام ده ، مش كفاية الكفرة اللى بتقروا لهم، دول علمااااااااااااااء ،و كلام بيستفذ اللى حواليه لدرجة تخرج اللى ادامه عن شعوره و ممكن يغلط

انا باكرههم عشان خاطرك يا اخى، دول عالم متخلفة ، مش عايشين الواقع اللى احنا فيه ده ، دول فى زمن تانى و بلد تانية ، انت بتعاملهم على انهم الهه، يا بنى فوق بقى، الدنيا مش كده ، مش اخر حدودها السرير و الناس ديه

استغفر الله العظيم ، و الله انا خايف عليكوا ، بلاش الكلام ده

و يديها وصلة تمجيد للشيوخ بتوعه على اعتبار انهم هما اللى حياخدونا من ايدينا و يدخلونا الجنة مش حتى رحمة ربنا هى اللى حتوصلنا للجنة

ارحمنى بقى ،يا اخى روح اتعلم لك حاجة جديده ، يا اخى اخرج اتعامل مع الناس و احتك بيهم بدل ما انت بتتفرج عليهم ، فوق بقى بدل ما تاخد على دماغك اما تشتغل ، الدنيا مش زى ما نت فاهم ،اتنحرر شويه كده، و فكر ، الشيوخ دول عملوا اشباه او " اشباح " متدينين زيك ، لا بيشتغلوا و لا حتى بيفكروا ، عشان مينفعش تفكر ، خد اللى باقوله بس عشان ده كلام الرسول و كلام ربنا، اسهل كلمه عشان تخوف اللى ادامك و ميعرفش يرد

كان فيه برنامج دينى بس بالانجليزيه شغال و أحمد مشغله

أحمد دير احنا مش فاهمين حاجة و لا انت فاهم حاجة

استغفر الله العظيم ، ده مجلس علم و الملايكة حوالينا دلوقت ، استشعر السكون اللى نازل ، ربنا يهديك

يعنى المفروض اقعد حماره ادام برنامج بلغة غير لغتى مش فاهمة حاجة و استشعر الملائكة، طب ازااااااااااى !!!

أحمد ، اصحى يلا عشان الغدا، ماهو الاستاذ نايم بعد الفجر

انا صايم

حلو اوى صيام التطوع ده ، بس مش اشكال اى نقص فى الحسنات حتعوضه الفرجة على قناة الناس

أحمد ساعات بيدير عالجزيرة او العربية عشان يشوف الاخبار ، أمنية أحمد انه يروح العراق او فلسطين او اى حتة فيها " مسلمين " و حرب عشان يستشهد ، نصيحتى ليه انه يتفرج على افلام فاندام و ستيفيتن سيجال عشان يعرف ازاى يستخدم الاسلحة و اساليب القتال الحديثة

من الواضح ان اسهل وسيلة لاخذ الحسنات و الثواب هو الفرجة عالقنوات الدينية ، زى بالظبط الايميلز اللى بتحلفك تبعتها و الا مش عارف حيحصل لك ايه و تلاقى خمسين واحد باعته

حاجة سهلة و بسيطة و انت قاعد مكانك و اهو ثواب ببلاش كيديه

البوز المصرى الأصيل

ماظنش ان فيه أى اتنين فى أى حتة و فى أى وقت اختلفوا على ان المرأة المصرية المعاصرة و اللى قبل كده قد تفوقت فى موضوع البوز ده ، الواحدة مننا تضرب البوز و بعيد عنك ، يا ختييييييييييي ، مش محتاجة تزعق و لا تلطم، ليه تأثير فعال الا لو الراجل هو كمان فهم اللعبة و صدر لها بوزه ساعتها بقى تبتدى لعبة سيب و انا سيب و مين حيعيط الاول

بعد ما ربيع قال هيهيهيهييي و اتمهزأ بيا ، اللى كنت شايلاه كان فاضل له تكة و يدلدق ،بصت له شذرا - من وراه طبعا - و حواجبى شغالين سبعات تمانيات من التأثر و شفايفى بدأت ترعش و عينيا توسع و تضيق و جرى على أوضة لنوم و انا بأهرى و انكت فى نفسى .

بقى كده !! بيتريأ عليا و انا مستحملة فى نفسى و ساكتة ، ماشى ماشى يا ربيع ، فكرت أعيط بس قلت لأ لا ينكن ابدا لازمن ابقى قوية ، و جرى تانى عليه مصطحبة معى البوز الاصلى

ها حتتغدى ؟؟

اه يا ريت انا جعان

طيب ، بابص الاقى البنطلون مرمى على الارض ، اشيله !! ، اطنشه !!، و استمر الصراع ده حبة ،فى الاخر قلت حاعمل بأصلى و حاخليه مرمى زى الكلب كده عالارض

و لقيت ربيع ورايا عالمطبخ ، ها يا أزأوزة هاتى السلطة عشان اعملها

لأ انا حاعملها ، و انا باشد الطبق

الله !! ليه هاتى ، و هو بيشده ناحيته

كده مش عايزاك تساعدنى فى حاجة ، انا حاعمل كل حاجة، و رحت واخداه تانى

فيه ايه يا أزميرالدا ؟؟

مفيش

طيب هاتى هاتى، لقيته مصر قلت مصلحة يلا خلى يعملها

طول الوقت كان صمت تام منى ، و العياط حازقنى ، حاموت و اعيط بس كرامتى كانت مقرطة حبتين

و ايه الاخبار تانى ؟؟ ده ربيع بيتعامل عادى يعنى

مفيش ، وش خشب فى خشب

و اكلت سريعا و قمت لميت الدنيا و جرى على اوضة النوم بدون اى مقدمات و ده مش العادى اعزائى

و اندفست فى السرير و الافكار عمالة تجرى ورا بعض فى راسي ، مخى اتدهس

ماشي انا السبب اللى اخدته عليا ، المفروض الراجل من دول يتعامل بتناكة عشان يعرف قيمة الواحد مننا، انا اللى طيبة و قلبى كبنن و مش باحب ازعله ، المهم افكار مالهاش اى دعوة ببعض ، اى كلام يعكنن و خلاص، اممممم طيب هو حيجى يصالحنى ؟؟ اممم ما هو مش عارف انى زعلانة ، بس انا اوضحت انى زعلانة ، قطع افكارى مجى ربيع

ها يا كوكو ؟انتى حتنامى

اممم ارد و لا لأ ؟؟

نفسسسس عميق عشان اعرف ارد : ايوه

مالك يا أزميرالدا ؟؟ فيه ايه ؟؟

مفيش حاجة ؟؟؟ ماسكة نفسى ان عينيا تدمع

يا بنتى اللى ربى خير من اللى اشترى ، ده على اعتبار انى معزة حضرته

لو سمحت سبنى دلوقتى ، طبعا باقول الكلمة ديه كده و خلاص لا عايزاه يسبنى و لا نيلة

لا ما انا لازم اعرف ، و هو بيشد الكوفرتة اللى مكلبش فيها

مفيش حاجة ، صواميل عينى فكت ، و بدأت ادمع و اشن و ابربر، ضعيفة ادامه

هو كمان بدأ يتوتر و يلح انه لازم اقول فيه ايه

بجد سيبنى دلوقتى لو سمحت مش دلوقتى ، بس من جوايا طبعا خليك و النبى جنبى متسبنيش لاحزانى ، اه يا انى

ماشي يا أزميرالدا و راح قايم عالاوضة التانية

انا تفزعت و فطيت، ايه ماشى !! ، ماشى ايه ، بالسهولة ديه كده!! ده ما صدق ده و لا ايه !! !!!

و بدأت انهنه و اعيط بصوت عشان يسمعنى و اؤنب له ضميره ، و ابلع ريقى بصوت مسموع قال يعنى فىه غصة ، لما لقيت مفيش فايدة ، قلت اقوم ابص عليه و اعمل نفسي رايحة اشرب و انا بانهنه برضه ، مانا مينفعش اقعد اقهر فى نفسي لوحدى كده،لقيت قاعد عالكمبيوتر مما زاد فى النهنهه ، و جرى عالاوضة و اتدفست فى السرير تانى ، و بدات الافكار المهببه بس بجاانب الافكار المهببة كان فىه افكار تانية بمبيبة ، من نوعية ربيع بيحبنى و بيعاملنى كويس مش عصبى و لا مخه صغير مش خنيق مش تقليدى يعنى اذكروا محاسن ازواجكوا و ده كان سبب تانى يخلينى اعيط اكتر ، يا دى المصيبة ما صدقت بقى لي فتره معيتطش ، و ان كل ديه حجات هايفة و و و و و شوية قلبى يسود و اقعد افتكر كل المواقف البايخة اللى حصلت بينا و انى مش باتكلم و ساكتة عشان الدنيا تمشى و بتاع

الحمد لله الخطة نجحت و جه ورايا تانى ، خخخخخخخخ

فيه ايه بقى

و الله العظيم تلاتة هو نفسه صعب عليا كنت عايزة اوطى على ايده ابوسها و استرضيه ، معلش متزعلش نفسك عشانى ،انا وحشة انت لأه، بس مينفعش انا امرأة مصرية برضه و الكلام ده مش فى قاموس تعاملتنا ،

ممكن تقولى ايه اللى مزعلك؟؟

نهنهت مرتين كده عشان اسلك زورى

ربيع ، من يوم ما اتجوزنا طلبت منك حاجة ؟؟

اممممممم غير انى اعمل السلاطة و انشر الغسيل و المه و اوضب العشا و اعمل العصير و اعمل لك شاى و اسقى الزرع ، امم ماظنش طلبتى حاجة تانية

ايه ده ماله حافظ و راصص كده !!!!

احممم بغض النظر عن ده كله و ديه كلها اشياء تافهة و صغيرة

لأ الحقيقة مفيش حاجة

طيب لو سمحت عايزاك تتحمل مسئولية البيت معايا شوية ، تقدر تقولى لمبة الحمام و الطرقة ديه مين حيركبها ، انا لسانى دلدل يا اخى ، ديه حاجتنا يعنى نجيب حد من بره يقضى لنا حاجتنا و لا نستنا لما نعيش على اضواء الشموع

طيب و هو انا فضيت يا ازميرالدا مانتى شايفة

امم و بدات اتهتهه ، ما هووووو مش حتاخد عشر دقايق

ايه تانى طيب ؟؟

، رميك هدومك ، انا مش فاضية الملم وراك ، فيها ايه لما تعلق هدومك

ماشي ديه كلها حجات بسيطة و ايه تانى

هو ماله كده مسالم ؟؟؟ معترضش على الى حاجة !!

ازاى تعزم طارق و مراته من غير ما تقولى ؟؟؟ مش المفروض كنت تقولى الاول !!

مش قصدى و الله انا عارف انك مش حتمانعى

و انا مش حامانع بس لازم تقولى عشان ارتب نفسى و بعدين فرضا فيه خطط تانية ، لازم تدى لى برستيجى ادام نفسى ، ما هو يا اخوانا جوزك على ما تعوديه ، مش حابقى بدايات ملطشة يعنى

طيب انا اسف ايه تانى ؟؟

يا دى ام الادب ، ايه الراجل المحترم ده يا خواتى!!! حاجة تفرسسسسسسسسسسس

شنيت شنتيتن و كملت

ازاى تخلينى اخر من يعلم بخططك لا و اعرفها من صحابك كمان ، خليت شكلى ملغوص خالص ، انا مراتك و فيه مستقبل مشترك زى مشترك الكهربا بالظبط ، كل فياشنا بقت فى نفس المشترك

و الله ما قصدت ، انا مش باخبى عليكى حاجة ديه مجرد دردشة ، بطلى الصراصير اللى فى دماغك ديه بقى

يا لهوى صراصير !!! ده عايز يهاجم عشان يدافع لألألأ لازم افضل محافظة على وضع الهجوم

و بدأت اجيب من القديم و الجديد ، ماسورة و اتفتحت ، اكتشفت ان مش العمايل الهابلة اللى مضيقانى بس فيه حجات اكبر و لاننا اتربينا على ان يا بنتى حافظى على بيتك و طنشى و متخربيش على نفسك و عديها و لايميها فانا كنت باكتم فى نفسى لحد ما البوز كبر و دخل الجامعة، مش فاهمة ليه احنا الستات غاويين نعيش دور الشهيدات و نفضل نكتم و نكتم و فى الاخر يتقال ان الست المصرية نكدية ، عايزين نحس اننا العاقلات المحافظات على بيوتنا ؟؟؟ نفضل نطنش و نكبر دمغتنا و مش بننبه الراجل ان الموقف الفلانى ضايقنى و بعد كام سنة ابتدى اشتكى لما خلاص هو يكون اتعود ، ايه الجديد ما كنتى ساكتة ؟؟؟

ليه ماقولش عللى مضايقنى اول باول و اخلص على الاقل عشان ابقى عملت اللى عليا و نفسيتى متبوظش و لو هو بعد كده مقدرش او حاول يفهم يبقى ديه مشكلته و اعتقد يستاهل البوز اللى حياقبله فى الرايحة و الجاية او على الاقل انا كمان ابين ان ليا عادات المفروض انها تحترم ، مش فاهمة ليه دايما واخدين الجانب السلبى ، او المستقبل دايما لافعال اللى ادامى و بعد كده المفروض انى اظبط نفسى على الافعال او الطباع ديه، بيتهيألى ان احنا السبب برضه

ها يا أزميرالدا ايه تانى مزعلك ؟؟؟

طيب انا دلوقتى ادافع و لا اهاجم و لا هو عايزايه بالظبط

اممممممم نديها نهنهه

مفيش حاجة خلاص

طبعا من المتوقع ان الايام التالية انها انها تشهد تغيير فى الحجات اللى مضيقانى بس و لاااااااا حياة لمن يهاتى ، اللى حصل انى كل ما اشوف هدومه عالارض ، ارقع بالصوت

لم هدووووووومااااااااااعاااااااااااك

فردة هنا و فردة هنا

لو أيتها واحدة من المقاطيع المتجوزات كانت قالت لى انها اتخنقت مع جوزها بسبب انه بيقلع فردة شراب فى أوضة الجلوس و فردة شراب فى أوضة النوم , كنت بمنتهى الاشمئزاز حاعمل لها مسح شامل بنظرة قرف مع عوجة ربع الشفة الشمال و أقولها
ما تبطلوا هيافة بقى ، الله يكسفكوا ، قلبتوا الرجالة علينا و دايرين تشنيع اننا مخنا صغير و بنتدأر فى الهايفة
بس اللي شاف غير اللي سمع و التجربة خير دليل و القطنة مش بتكدب ، الله يمسيها بالخير أبلتى نضيفة ، طلع ان البنية مننا بتستحمل بلاوى بس بتدكن و عشان صورتها متدقلجش فى عيون البشر و تتهم الاتهام الشهير بالهيافة
و تبدأ الحكاية المنيلة لما لمبة الطرقة ضربت ، يعنى هى جت على لمبة الطرقة ، ما كله مضروب ، المهم قلت لسى ربيع و كلى تفاؤل و دلع و رقة و انا بأجرى عليه زي سعاد حسى زمان
بيعو بيعو بيعو، لمبة الطرقة اتحرقت
ربيع كان فى الوضع الازلى اللى متغيرش من ساعة ما اتجوزنا ، مركز فى الكمبوطر بتاعه
نعم !! ايه يا أزميرالدا ؟؟ اظاهر اتخض و لا ايه كالعاده
تخاضيت عن الطريقة ال .. مش و لابد
غير لمبة الطرقة, و كان كلى تفاؤل وقتها
فات يوم
ربيييييييييييييييييييييييييييييع ، كنت فى المطبخ عالحوض ، تقريبا كالعادة برضه و هو فى وضعه الازلى من ساعة ما دخلنا النت
مش حتغير لمبة الطرقة ؟؟
حاضر ، مش فيه واحدة تانية ؟؟
الحوار كان داير و كل واحد فى مكانه ، انا بامرش الحلل و هوعالكمبوطره
بعد ما قال البق ده ، توقف المرش و بدأ هرش الدماغ ، سبت الحوض و نط عالاوضة ، و وقفت له عالباب
نععم !!!! انت حتستنى لما التانية تبوظ كمان ؟؟
رد بمنتهى القرف و اخيرا بص لى
حاضر يا أزميرالدا حاضر
موتى و سمى و ناري الحجات اللى تبوظ و متتصلحش ، المهم دارت الايام و عدت الايام و لمبة الطرقة التانية اتحرقت و معاها لمبة الحمام

و انا صابرة و ساكتة ، مانا مش معقول كل شويه زن زن زن ، هى كفاية مره واحده كل يوم عشان الراجل ميزهأش
فى الرايحة و الجاية كنت بابص عاللمض المحروقة بمنتهى الاسى و شوية و حاقف تحت كل واحدة دقيقة حداد
فى تلك الاثناء كانت بتحصل حجات كتيييييييييييير هبللااااااااااااااااااه بس بعيد عن السامعين ، بتفور الدم
مش عارفة هما الرجالة فاهمنا غلط و لا احنا اللى فاهمين غلط
سى الاستاذ يدخل من الباب و متفهمش اييييييييييييييييييييييه اللى بينطور جزمته و شرابه ، ده غير اللبس ، موزع لبسه عالشقة
أول ما يدخل من الباب ، القميص و لا التي شيرت فى الليفنج و معاها فردة شوراب ، بعدين يجى المطبخ يشرب بق ميه ، و يجى رايح على اوضة النوم ، رامى البنطلون فى الارض و فردة الشراب التانية
انا حاسة انه خمنى الجدع ده ، خدعنى ايام الخطوبة ، مكنتش فاكراه كده، ماحنا ملحقناش ، يدوب اربع شهور خطوبة و كلفتنى
المهم ادور انا الف و الملم الهدوم المنطورة و انا بالعن و اسب المجتمع الذكورى اللى خلانى الملم شرابات على اخر الزمن
ده غير قفص الغسيل ، غاوى يحط الهدوم فوقيه
ربيييييييييييييييييييييييييييييييييع
اعتقد سمعته بيشتم و لا ايه بس بلاش سوء الظن
نعم !!!!! طالعة غصب عنه من تحت الضرس
و جري عليه و انا باهري و انكت فى نفسي و على باب الاوضة و حاطة ايدى فى وسطى
على فكرة ، صندوق الغسيل معلهوش قفل ، ممكن تحط الهدوم جواه
، حاضر يا أزميرالدا حاضر ، أمممممم هو انا مملة للدرجة ديه ؟؟؟
ده غير المهاتيه و نبحة القلب
يا حبيبى ، يا ضينايا أبوس ايدك
فيه ايه يا أزميرالدا ؟؟
قلت مييييييييييييت مره متحطش معلقة الشاى اللي بتقلب بيها سكر عالرخامة، انت قاصد تحطها ؟؟ ههه ؟؟
فيه ايه بس يا أزميرالدا؟؟ بمنتهى الهدوء الشديد
يا دي المصيبة السودا عالحنية اللى جايبانى لورا
النمل ، النممممممل
طبعا فيه ناس كتير متفائلين فاكرين ان الموضوع خلص
احب اطمنهم انه لأ ، الموضوع تطور لوضع الاطباق الوسخة بعد الاكل عالرخامة ، و من تانى

ربيييييييييييييييييييييييييييييييييييع ، تعالى
بامسك نفسى ،و مش عايزه اتهور ،
شايف !! برضه ايدى فى وسطى و صباع موجه زي الصاروخ عالرخامة اللى مليانة نمل مع اهتزازات متتالية للرجل الشمال أدت لشد عضلى
يا نهار أسود ؟؟؟ ده هو مش أنا ، طيب معلش و الله حاخد بالى بعدين
استغفر الله العظيم يا رب، مضطرة ابلع لسانى ، الراجل اعتذر ، يعنى اعمل ايه طيب
كل ده بقى و انا عماله اخزن ، و اخزن ، لحد ما نفسيتى ورمت فى اليوم المهبب ده
قيس على ده حجات هايفة كتير ، ايشى دش بايظ ، ايشى تابلوهات عايزه تتعلق ، ايشى لبان سماره عايزاه و مطنشه ، ايشى دريم بارك عايزه اروحها و مش راضى، نفسي اتمرجح يا ناس، تشعبت تشعبت، ده غير الحجات اللى من نوعية
فييييييييييييييين الشبشب بتاعى ؟؟؟ أحيانا بتجى له فرصه يزعق
ماعرفش مش بألبسه
طيب دورى عليه
يا رب يا رب ، انا كنت باخلى ماما و لا أختى يدوروا عالتايهة ، جه اليوم اللى يتقال لى دورى عالشبشب ، انا اتبهدلت أوى يا جدعان
و أدور و أور و شوية شوية حابسبس للشبشب ، أفوجأ ان سى الاستاذ ناسيه تحت السفرة
ماسكة نفسى أفرقع فيه ، و شي جاب أحمر بس أجبرته يرجع لونه الطبيعى
هاه لقيته ؟!
انا واحده باحب اقلب فى التلفزيون براحتى لحد أما اجيب حاجة عدلة بس فى الاخر باقفله يعنى، و ده نادر أصلا حيث اننا مش بنفتح التلفزيون و كان قلته أحسن الصراحة
ربيع بيكره الحركة ديه ، مش فاهمة ايه اللى بيضايقه ، فاتحين التلفزيون يبقي نشوف حاجة عدلة
ده يبطل قراية و بوش قرفان و مخنوق
بطلى تديير بقى ، هاتى أى حاجة
الله !!! ايه اى حاجة ديه ، و انا مستمرة فى التقليب برضه
هاتى يا أزميرالدا الريموت ، هاتى و يروح هابشه منى
بس ، سيبي القناة ديه و تكون جايبة مثلا النشرة الجوية
ايه الاستبداد ده بقى ، الله !!!!
و يستمر النداء الشهير من امام الحوض
ربيييييييييييييييييييييييييييييييييع
اطفى لمبة الاوضة اللى انت سايبها ديه ، و جرى عليه
يا حبيبى هى الارض ناقصة حرارة ، الدلتا حتغرق و عيلتى هناك حرام عليك و بعدين حرام عليك الطاقة المهدرة ديه ،يووووووه
اشوفه ماشي فى الطرقة بدقن مليانة صابون رايح يرد عالتلفون و الميه نازلة خرارة
ربييييييييييييييييييييييييييييييييييييع
اقفل الحنفية و برضه جرى عليه

يا ابنى يا حبيبى ، الحرب الجاية حرب الميه ، دول عايزين يقللوا حصتنا ، ارحمنى بقى
ايام الخطوبة عمرى ما فكرت فى التفاصيل الصغيره او المشاكل الصغيره ديه ، وقتها كان تركيزنا عالحجات الكبيره و لو حد كان قاللى الحجات ديه كنت حاضحك عليه ، ايه يعنى ، كلها حجات بسيطه
بس لما الحجات الهايفة تكبر بتعمل حاجة أكلكع منها ، و ممكن الناس تتهور على بعض، انا حاسة انى بقيت عاملة زى أبلة الناظرة ، أأأأ قصدى ماما ، انا نفسى زهقت من نفسى ، انا مش عارفنى ، مانا لو طنشت الشقة حتتبهدل و حتتحول لخرابة لا تصلح للاستخدام الادمى
فى العادى باحاول اطنش و اخزن ، ده غير الصراصير اللي ماليه دماغى ، و الشيطان بقى يلعب لعبته و هاتك يا
وساويس ، بابقى زى البالونة المنفوخة يجى دبوس أهبل و يعمل بممممم و ده اللى حصل اليوم ده
حسيت انه بيستهزأ و مش مستعنى بيا ، و انه بيستهيفنى و انه شايفنى عبيطة و نظرته اتغيرت ناحيتى ، مش بأقول لكوا الشيطان ده وحش جداا موت و دماغى زبالة طحن
و خلاص الشيطان دخل جوووووووووووون و بدأت الخناقة

كسوف مش خوف

لما بتكون مش حاطط ربنا فى بالك بيبقى سهل أوى انك تعمل اى حاجة , الموضوع بيبقى ممتع أوى و بتقضى وقت لطيف و انت بتعمل الغلط ، طبعا وقتها مش بتفكر بقى ده صح و لا غلط و حتى لو عارف انه غلط فعادى بقى مقضيها

أما لو كان فيه مسافة أقرب شوية من اللى فوق بيبقى الموضوع مش لطيف بالمرة ، عايز تعمل كل حاجة و تجارى الجو ، بتحاول تعمل انك مش واخد بالك من ربنا و تعيش اللحظة و تنبسط و تهيص عشان كمان متعكننش عاللى حواليك ،بس المشكلة انك طول الوقت بتحس انه فيه خازوق مش مريحك و انك كمان مش انت ، اعتقد بيبقى كسوف من ربنا اكتر منه خوف

مش كل مفر وض يتقال له يا مفروض

المفروض انه كان يوم زي اى يوم عادى, يوم شبه اللى قبليه , مفيش أى جديد يعنى, المهم ركبت المترو فى ميعادى عشان المفروض يوصل فى ميعاده و أروح مشوارى فى ميعادى , ده المفروض يعنى , بس مش كل مفروض بيبقى مفروض
المهم دخلت عربية المترو بسلامة الله , مش بأدق بقى عربية ستات عربية مش ستات , عادى يعنى, بس ديه كانت ستات
المهم بعيد عن السامعين , المحطة اللى بعديه حصل هجوم ضارى , ستات ستات ستات , اية كمية الستات اللى فيكى ديه يا مصر !! و اتحشرنا حشرة سودا , دلوقتى بس عرفت شعور السردينة
احدى الانسات اللى واقفين, بمنتهى السهوكة , مش عارفه بقى هى سهوكة و لا فطسنة من الحر
ايه ده يا ساتر هما مش شايفين العربية مليانه ازاى , اية الزحمة ديه, أوييففف
انا من ناحيتى مش عارفة ليه مكنتش متضيقة , لحد هذه اللحظة , مستغربة انا لييييييه كنت عادى كده
و كمل المترو طرييقه و بعدين سبحان الله وقف , فى الهو كده, طبعا القرد بدأ يلعب , انا مش خبره فى موضوع المتروهات ده و بعدين بقى فى اول اليوم كده، ربنا يستر على اخره, و بدأت اسأل النساوين اللى حواليا
هو ده العادى بتاعه؟؟
لا خااالص مش ديما
الله اكبر ، بعد مرحلة القرد جت مرحلة السراسير , انا واحده اعترف ان دماغى مليانة افكار سودا سودا يعنى , و مفيش اسهل من طلوعها فى الاوقات العاديه ’ تخيل بقى فى الاوقات المنيلة بستين نيلة
سيناريو ان المترو يتخطف و ندخل فى موال سبيد بقي و الافلام ديه بس دول ولاد ستين كلب حيبيعونا، مالناش دية , تطلع اوشاعة ان المترو متفيرس و يرشونا زى السراسير , هجوم ارهابى من جماعة الشيخ جورج, مترو تانى ضل طريقة , الطريق يتطربق من فوقينا, بدات الهمهمات بقى بتاعة الستات من قرف و دعا و خوف و تهوية
واحدة ست مزنوقة فى ضهر اللى ادامها و رافعه ايدها و بتهوى بايدها برضه , ما هو مفيش مجال لاى حركة تانية
ليه حق يعتشل ؟؟؟ من الحر تبعا الاجهزة بتعتشل
الانسه المسهوكة المشلة و هى بتهوى : ايه ده بيعاملونا كدع ليه ؟؟؟ احنا بنى ادمين ، ايه ده!!

ربنا جبر المترو و مشي بعد شويه
المحطة اللى بعدها حصل نفس الهجوم اللى حصل فى اللى فاتت
هجججوم تانى و تزنيق تزنيق تزنيق
يا لهوى اية ده , مش خايفين من انفلونزا الخنزير دول
هو فيه ايه النهارده ؟؟
كل اللى جه فى بالى البت المسهوكة , مانتى لو كنتى حمدتى ربنا عللى انتي فيه !!! ناس غاوية تكفر بالنعمة
اصل المترو اللي قبليه كان عطلان فالناس اتكركبوا
ااااااااااه
و تعالت صيحات الاستهجان انه الله يخرب بيوتهم
المهم سيدة المفروض انها محترمة ببناتها الاتنين الصغننين كانوا واقفين من الاول خالص و انسة برضه المفروض انها محترمة و هى داخلة من الزق تقريبا دهست عيلة من العيلتين
ايييييه؟؟؟ انتوا بهايم مش شايفين العيال الصغيرة, انتى اوعي كده حاسبى
و الانسة عماله تتوغل و تتزنق و بتزعق
الله مانا عمالة اقول وسعوا دخلونى محدش بيوسع و جابت الحق على الستات المايصين اللى مش عايزين يوسعوا
فكان ردى فى نفسي طبعا انه , حيسوعوا ازااااااى و اساسا مفيش مكان
و تقريبا شنطتها شبكت فى ايد الست و لا ايه فكان فيه شبه عنف فى الموضوع , التسليك كان جامد حبتين و البنات الصغننين عمالين يصوتوا يصوتوا و ا مهم هاتك يا ضرب على وشوشهم
اكتمى يا بت ، اكتمى يا حماره , اكتمى , و مع كل اكتمى قلم هديه , الضرب كان كومبو
و راحت الست لافة عالانسة, جتكوا القرف تعليم اية و نيلة ايه , جتكوا ستين نيلة عليكوا و عللى رباكوا
و البنت بقي مسكتتش
بلاش سفالة و قلة ادب
البنت المسهوكة الفطسانة اللي كانت لازقة فيا
يوه بقى ايه ده دول مش ستات دول متوحشين , ده عربية الرجالة ارحم,و وقفت تهوى يا حرام , و النبى ديه لو شالوا الصوت و حد شافها و هى بتتكلم حيقول ديه بتطلع فى الروح
و الست نازلة كملت وصلة الردح بالفاظ تحمل معى ان اللى ربوكى دول عالم لا مؤاخذة مش و لا بد و كده يعنى و الانسة راحت رادة بنفس الكلام مزودة بانتى و اللى معاكى
فى كل الحر و الزنقة و وجع القلب ده ، كان فيه ابتسامة غبية على وشى طول الوقت , ده غير انى عارفه انى حاتأخر على ميعادى
زماااان كان موضوع التأخير ده بيعملى أزعرينة, دلوقتى خلاص بقى الواحد كبر , عامل الخبرة مهم فى الحجات ديه , لان حرقة دمك بتقل كل ما بتفهم و تتأقلم عالوضع
كنت دايما باروح فى معادى و قبل معادى كمان , المرة ديه اتأخرت قهريا بس مكنتش متضايقة و لاااااا فرق معايا و ده ليه , لأنى عارفة انى لما أوصل محدش حيقولى أتأخرتى ليه ؟؟؟ او حيلومنى على انى اتأخرت, محدش حيبص للموضوع على انه حاجة مهمة يعنى تستحق
و ديه احدى المميزات اللى بناخدها من العيشة فى مصر و اللى كتير مننا مش حاسس بالنعمة ديه
و حصل اللى توقعته, وصلت متأخره
صباح الخير
صباح الخير و خلاص
اكيد اليوم مش حيمر من غير عكننة , ابتسامة بلهاء و لامبالاة طول اليوم , اكيد فيه نهاية ماسوية
باحط التذكرة فى المكنة فى امان الله بمنتهى السذاجة يعنى
الاقى واحده ست المفروض انها محترمه من شكلها , مش صغيرة و من الواضح انها بتشتغل شغل محترمة و ناططه ادام المكنة و بتعدى , يوه معلش خد تذكرتى انا عدى بيها
طبع انا بلمت و بمنتهى السذاجة
حاضر
احط البتاعة مفيش مش شغالة , الله يخرب بييييييييتك
وشى احمر زيادة على ازنهراره من الحر و ودانى دخنت
قلت لشاب ابن حلال كده بيشتغل هناك فتح لى البتاعة بس انا مش عارفة المفروض انه يفتح لى البتاعة و يعدينى و لا ده العادى و لا ايه بالظبط
روحت باحكى لجوزى العزيز
هيهيهيههييييييييييي , ضحكت عليكى
متقلش ضحكت عليكى
هيهههييييييييييي
بسسسسسسسسس و عينك ما تشوف الا النور و دية كانت البداية

تاريخ مصر ... الجديد

بمناسبة العيد القومى لفرنسا الشقيقة ، متعرفش ازاى الكلام جرجر بعضه و سحبنا على العيد القومى لمصر، طلب مننا مسيو عادل ان كل واحد يكتب نبذة عن العيد القومى لمصر و ده بالفرنصاوي طبعا يعني , ما هو بعد ما شاب , قالك أجدد من تانى أنا ورايا ايييييه !

فى الاول هشام سأل هو العيد القومى لمصر ده انهى واحد؟؟؟

فمسيو عادل تنح و رد انه 23 يوليو عيد الثورة

انبرت رشا و قالت لأ يا جماعة ده 6 أكتوبر

راح جورج بمنهتى الهدوء تقريبا من الحر و لا هو طبعه كده قال : العيد القومى لمصر هو 26 يوليو 1956 و هو عيد الجلاء .فى هذه المواقف مش باحب اتهور و اتكلم . انا قلت - فى سري طبعا - انه 23 يوليو بس لما لقيت فيه لغط كده شكيت الحقيقة فى نفسي . ما هو مفيش حاجة مضمونة اليومين دول

فكريستين معجبهاش الكلام فراحت قايلة يا جماعة 6 اكتوبر

معانا كمان نيفين , بنوته لطيفة كده فى تالتة جامعة , يا حرام لقيتها تايهة كده و مش فاهمة ايه الموضوع و راحت سأله ببراءة

طيب هو 6 اكتوبر ده عيد القاهرة بس و لا المحافظات كمان ؟؟؟

فى العادى لو انا واخده عليها حاشتمها و اقول لها غورى من وشي الله يكسفك يا شيخة , مانا مكنتش لسة سمعت اللى قالوه بعد كده عشان اتخض من كلمتها ديه بس لسانى فلت برصه ميش فايدة

ألا انتى مدرستيش تاريخ خالص ؟؟؟ و حتى لو مدرستيش تاريخ ديه معلومات عامة

,أنا مش برم أوى و لا حاجه برضه بس مينفعش الواحد يبقي ميح تيح كده

يا جماعة انا مالييش فى التاريخ خااالص , مش باحبه, هى مسهوكة حبتشين فتخيل قالتها ازاى بقى

المهم المسيو عادل حسم الموقف و قال

هو 23 يوليو و محدش يفتى , بره السفارت بتاخده اجازه

و ادانا مهلة كل واحد يكتب اللى هو عايزه , هو الحقيقة ده اللي حصل كل واحد كتب عن 23 يوليو اللى هو عايزه, ديه حرية الابداع, بدع بدع يا عم الحاج , ما هو أصل فيه ناس بتطلع البدع فى شحته

أولا بقى رشا : قالت اية أمورة بابا ؟؟

قالت لك ان الشعب فى اليوم ده , خرج فى الشوراع صباحا - و الله شعب جرئ ما الليل ستار- و عمل مظاهرة بيطالب أن الملك يسيب الحكم

الراجل المسيو سمع البق ده و اتفتح فى الضحك و كان بيترجرج , يا لهوىىى عالمنظر و بعدين اظاهر خاف البنت تزعل فقالها طيب كملى

و بعدين راجل شجاع اللي هو عبناصر جه و قادهم و بعدين بقى رئيس الجمهورية و هو اللى حرر مصر و قضى عالفساد و نشر العدل

الراجل يا حرام وشه زنهر , فقام قال بصي يا رشا الشعب مخرجش و لا حاجة و مش هو اللي قام بالثورة

فرشرش ردت بمنهى البراءة

و الله فى الفيلم عملوا كده , مش عارفه انا فى الحقيقة فيلم ايه بقي و لا مين

و جااااااااااء الدور على هشام قال ايه هيشو بقي

ان فى 23 يوليو 1953 هو اليوم اللى الاحتلال الانجليزى خرج فيه من مصر

مسيو عادل قاله محصلش , انتوا بتجيبوا الكلام ده منين , اللي بعده

- نوفا بقي قالت لك انه فى يوم 23 يونيو 1954 خرج الشعب المصرى- العالم ديه فاهمة الشعب المصرى غلط أوى -

المهم انه اتنيل خرج فى مظاهرة برضه بيطالب ان الملك الفاسد يمشى و كان بيغنى النشيد الوطنى - ده الشعب مش الملك، كانت المفروض تكمل انه كان بقيادة حكيم و سعد الصغير و دينا كانت بتحيي المظاهرة و ان النشيد الوطنى ساعتها كان , و النبى لانكيد العزال

المسيو انفجر للمرة التانية مستحملش الراجل اللي بيحصل له

أنا حاسس انك بتكلمينى على بوركينا فاسو , هونولولو, طيب و المظاهرة ديه كانت فين

نوفل رمت القنبلة بقى

كانوا فى صلاح سالم

و عهد الله قالتها

و الراجل من تانى رجرجة رجرجة من الضحك

فين يعنى بالظبط ؟؟

أممممم عند المنصة كده , طريق الاوتوستراد

لا داعى للكلك

الحمد لله الجواز وضع نهايه سعيده لذلك السؤال الذي طلما راود و ارق الكثيرات

ها ايه اخبار العرسان ؟؟

ليبدأ كاللو من نوع ثاني , لنفس الكثيرات ايضا,

ها مفيش جديد ؟؟ و للذين لا يعلمون ما هو هذا الجديد اقول انه البيبيز

و طبعا ارد بكل اسي , نفس الاسي لاجابة السؤال الاول

لا للاسف لسه

منى هانم صاحبتى أم العريف : يا بنتي لسه بدريييييييي , انت متجوزه من امتي؟؟

من تلات شهور

بببببببببس

اه بس , مكنتش لسه بدأت أتضايق من الموضوع لأنه الزن مكنش كتير فقلتها عادى يعنى زي باقى البشر , لا باشمئزاز و لا قرف و لا زهق
و بلهجة مطمئنة نسائية ممطوطة ،لا يا ازميرالدا متقلقيش خااااالص,
لسه بدري يا بنتي , انا كمان اتأخرت شويه بس حملت بعد 3 شهور على طول - يا بنت اللذين اتأخرتي ايه بس- و هند حملت بعد 8 شهور و ولاء بعد سنة و مى بعد سنة و نص ، فعادى جدا التأخير

الله يهدك أأأ الله يطمنك

و اللي تقعد تدينى فى نصايح و اللي تقولي لو عايزه ولد ابدأى كلي من دلوقتي كذا و كذا و كيت و لو عايز بنت كلى مش عارفة حمص باين و لا لبان دكر

و يمر وقت و نفس السؤال , بس من أشخاص تانيين خااااااااااالص, ها مفيش حاجه فى السكة؟؟ ديه مها الحشرية

و عهد الله لسه , حدة الزهق بدأت تلوح و تيجى فى الأفق

اممممم , طيب فيه مشكله و لا حاجة!!؟؟ حتعمل لى فيها الست كريمة

الرحمه يا رب , يعنى هو لو فيه مشكله لا قدر الله حاقول بمنتهى السذاجة

اه الحقيقه فيه مشكله, و برضه يكون الرد , بس اوعي تقلقى يا ازميرالدا , القلق نفسه ممكن ياخر الحمل

حاضر يا ستي حاتلج اعصابى و ده على اعتبار ان انا اصلا اثريت بمكنونات صدري و قلت اني قلقانه- والمصحف ما قلت حاجه

و يا سلام بقى لو لبست بلوزه واسعة , يا خرابببببببى, تلاقى السؤال فاطط بس بمنتهى البهجة

انتى حامل ؟؟

لأ , مع عوجة بق لطيفة , ياااااه وحشتنى الحركة ديه

هه معلش , ان شاء الله ربنا حيكرمك , متقلقيش و متحطيش فى بالك بس

السؤال فى الواقع كان بيقتصر على الستات و البنات , الرجاله شكلهم بيتكسف و لا ايه

حتى جه اليوم اللي اكتشفت انه مش كسوف و لا نيله بس بيبقوا مكبرين دماغهم

لما عميل ظريف ابن حلال قلقان عليا و خايف على مصلحتى سألنى نفس السؤال القمئ

ها مفيش بيبي و لا حاجه ؟؟؟ لأ و يقوم مديني رقم دكتور مراته اللي كانت عندها مشكله و حلها لها

و لما طلبت اجازه فمديري تطوع بنفس السؤال مع ابتسامة حنونة و حركة هوائية بايده على بطنه مكونا كورة افتراضية

لا الحقيقة مفيش , بي ده مديري بقي لا ينفع اعوج له بقي و لا نيله

ده غير سبحان الله المواساة من نوعية

يا شيخة عيشوا لكوا يومين, انتوا لسه صغيرين و نامييييييييييييي على اد ما تقدري و اخرجي على اد ما تقدري, بعد كده مفيش الكلام ده

أمل صاحبتى بقي جابت لى من الأخر و حكت لى على موال التلقيح الصناعى اللى عملته , بس ديه بعد تلات سنين من من المعاناه مع مصاصى الدماء بتوع النسا و التوليد

يا بنتى كل شهر كل شهر اروح له و اكع اد كده لحد ما قرفت و اللي يديني دوا ينيل الدنيا زياده , لحد ما زهقنا و توصلنا لدكتور ابن حلال قال لنا ان الحل لمشكلتنا هو التلقيح الصناعى , المستشفى مليانه , ايه ده محدش بيحمل طبيعى اليومين دول, المهم بس متقلقيش

الله يخرب بيوتكوا

ده غير بقى الستات الكبار و نظرة الشك و الريبة , هو مفيش حاجة لسه؟؟

مش فاهمه ليس الناس بيبقوا حاملين هم الناس التانيين

لا انا و اسم النبى حارسه و صاينه جوزى بنفكر فى الموضوع و عايشين عادى جدا

اه عايزين نخلف بس مش حنكئب روحنا يعنى عشان الخلفة

و بعدين بالذمة ديه اجواء الواحد يكون ملهوف عالخلفة فيها

أزمه زفت عالمية و كساد, اتش 1 ان 1 , عشان الخنازير ميزعلوش , انفلونزا كوكى كاك خلصت من الدنيا كلها الا عندنا , طاعون على حدودنا مع ليبيا ...كوكتيل مش مشجع بالمرة

مش معنى كده انى باشجع قولة - انه نجيب اطفال ليه نعذبهم فى الدنيا ديه و بعدين لما منجبش عيال الحال حيتعدل يعنى و أساسا أساسا مش باين له عدلة , كل حى بياخد نصيبه , بس هى جت كده من عند ربى , بلا هم , اهم يجوا يسلونا , موضوع انهم يتعذبوا بقى و لا يعانوا , ديه مشكلتهم مش مشكلة اللى خلفوهم, احنا حنحل لهم مشاكلهم قبل ما يجوا كمان

اكل و شرب و هوا ملوث, يا جماعه احنا مش جيل السمنه البلدى و الخمشتاشر بيضا اللي بيتظلتوا على الفطار , احنا الفاكهه و الخضار اللي المفروض بناكلهم دول كاوتش , النتيجه المفروض تكون ايه اشاء الله !!

لحد ما جه يوم ما استحملتش بقى الزن , كانت أيمان زميلتى اللي كل ما تشوف خلقتى ها مفيش اخبار مفيش اخبار و ديه بقى برضه من انصار مفيش اخبار , طيب متقلقيش

رحت هابه فيها بقى مبدهاش و كانت كبش الفداء لكل الشخصيات السابقة

انتى كل ما تشوفى خلقتى تسألينى , انتوا مش قلتوا المفروض مافكرش فى الموضوع ده عشان القلق وحش, ايه ده ؟؟

لا انا اشتكيت و لا الراجل اشتكى و لو فيه مشكله مش حاروح اجري على كل واحده و اقولها , مش لقينا الواو فين.

الرحمه يعنى مش كده, فيه تسالى كتييييييير غيرى

بلاوي افتراضيه

ياما الدنيا بتحدف علينا مصايب و بلاوى بشريه و الواحد اديه عايش , بقاوح مره , يطنش مره و هكذا , العجله دايره , لكن البلاوي البشريه ديه تبقي افتراضيه كمان , لأ ده يبقي كتير اوي بقي

انا مكنتش راضيه ارد لان فيه حجات خساره الواحد يضيع فيها وقته و يوجع صوابعه , و منها الرد على الفراغ اللي اسمه جابري , الشتيمه ربيع متكفل بيها, ايوه يا جابري انت فراااااغ, فرااااغ, حتي مش هوا , هه فاهمني فرراغ

ا نا كنت ساكته و مليش دعوه بالحوار ده , لكن يوصل انه يتدخل فى حياتنا الزوجيه , لأ بقي

سكت على موضوع كفر ربيع , كافر !! ربيع كافر , استغفر الله , وصلت لاتهام الناس بالباطل كده ,على اي اساس اتهمته بالكفر, ربيع الشريف العفيف الطاهر, وصلت لحد كده!!

انا فى الاول مكنش مصدقه و افتكرتك بتهزر , متصورتش ابدا ان ديه تكون اخرتها مع واحد وافق انك تبقي صاحبه

انا باحمد ربنا انك مجتش كتب كتابنا لما ربيع عزمك و لا كنت شوهت الصورة الجميله اللي كنت راسماها لليوم ده , باحمد ربنا لان وجودك كان حيبقي نشاز وسط سيمفونيه ناعمه

و بعدين حوت ايه ده يا ابو جلامبو , و النبي فوق من اللي بتتعاطاه اليومين دول و يا ريت تكتفي بشم التلوث

سبحان الله نفس الاسم بس شتان الشخصيتين, لو كانت الاسامي تباع و تشتري كانوا سموا خرا بن خرا, الهي تجوع جوع الأمله فى راس الاقرع يا بعيد

سبب البوست ده هو كلامك عن مي

مكنتش فاكره ان فجرك تعدي الحدود , اعترف اني اتهزيت و انهارت اول ما قريت اللي انت كاتبه , كنت السبب فى اني حاسيب البيت, بس العقل و الحكمه كانت ليهم اليد العليا , و مسكت نفسي لحد رجوع ربيع اللي كان للاسف قرأ البوست قبلي و كان سبب فى عكننة مزاجه لدرجة انه مرضاش ياكل المحش اللي انا عاملاه و للصدفه كان بيعاني من الام القولون العصبي

واجهت ربيع و انا فاتحه الشاشه ادامه على البوست المريع اللي انت كاتبه

و كان رد فعله زي ما توقعت , الحمد لله ظهر الحق

ربيع انكر اي علاقه بالمدعوه مي, فى الاول مصدقتش بسبب العصبيه اللي هو فيها, و نتيجة لاني بنت و شكاكه, فضلت اضغط عليه لحد ما جاب رغيف عيش و حلف بالنعمه انه ميعرفش مين ديه

ربيع مش محتاج انه يكدب عليا , لانه حكي لي عن كل البنات اللي عرفهم فبل الجواز, و حكي لي عن حجات افظع من اللي انت قايله فى بوستك الاهبل ده, فليه يكدب دلوقتي ؟؟؟

انا باحمد ربنا انك كتبت البوست ده بالذات عارف ليه يا فراغ؟؟

عشان كان بمثانة بالونة اختبار لثقتي فى جوزي و اول ازمه تعصف بحياتنا الزوجية , مرت بسلام

و بعدين نيش ايه يا بو ضلفة انت ؟؟ مين قالك اني كنت مصممه عالنيش , ده اكبر دليل على تدليسك و افتراءك, اللي كنت مصره عليه كان الكتشن ماشين , و ده لا غني عنه لاي بيت فى مصر , ربيع كان شايف انه مالوش لازمه بس انا بغباء اصريت عليه و هو مركون و عارضاه للبيع و ديه برضه اثبتت بعد نظره و تدبيره للامور

فيما يخص موضوع فورد بقي , فربيع ينأي بنفسه عن مثل هذه المهاترات , فورد ايه و جينرال موتورز ايه! !!

ربيع مالوش اي علاقه بمنظمات غربيه و انا مش حادخل بيتي دولار حرام

حتي الدولار كل يوم فى النازل

بيتنا قائم على الثقه المتبادله و العقل

و امثالك مش حيأثروا فى مسيرتنا الزوجيه

الارهابية المنحلة الشريرة

كان الوضع الأفتراضي وقتها ان بعد الابتدائي المختلط فيه فصل فى الاعدادي للبنات عن الولاد و ان البنات تتحجب فى المدرسه , كان ده السلوك الطبيعي التسلسلي للأمور-فى ذلك الوقت من العمر 11 سنه -كان دماغي لحد ما جزمه

لما جيت ادخل الاعداديه , مكنش فيه حيره و لا نيله فى موضوع الحجاب ده و ده لييييييييه !! عشان فيه حاجه اسمها سلوك القطيع, عادي يعني البسه فى المدرسه و خلاص , و بره اعمل اللي انا عايزاه , وده كان فى اولي اعدادي, الموضوع مكنش عامل لي ازمة و لا حاجه

المهم استمريت كده شويه, اولي دروس الحياة فى الاذدواجية ,لحد ما فى سنة تانية مش عارفه كان فيه كلام كتير كده عن المدارس التي بتفرض زي عالبنات , سواء يلبسوه او يقلعوه و صدر قرار ان مفيش حجاب يتفرض عالبنات,اهو ماشي الواحد يتصرف بطبيعته بقي و تجرأت و رحت المدرسه من غيره , وقعدت فتره على كده انا و ساره صاحبتي

خلال هذى الفتره كان السؤال المعتاد من المحيطين

انتي مسلمة ؟؟

ايوه

طيب مش محجبه ليه ؟؟؟

كده مش دلوقتي , اتمة اتمة يعني

- و تعرضنا لفتره لحاجه عرفت معناها بعديز و هو الارهاب الفكري , و خصوصا من مدرسي الدين , يا لهوييييييييي- و ده كان بيبقي فى حضرة الفصل كله , فالكلام موجه لمييييييييييين!!

من نوعية انتي لو عندك جوهرة حتخبيها عن الناس مش حتوريها لحد و موضوع المصاصه ده برضه كان موجود وقتها -انه البنت المحجبه كل الناس بتبص عليها و انه الحجاب ده حمايه ليكي ده غير العذاب اللي مستنينا, كانت المدرسه لطيظه اوي الحقيقه , كانت ساره مشكاسه و كل شويه ترد عليها باي كلام من نوعية انه ديه حريه شخصية و ان فرض بس مش عايزه دلوقتي او اما ربنا يهدينا

انا بقي الحقيقة من انصار انتخه للدماغ اريح للجميع ,مش باحب الجدال و اللوك لوك الكتير و مكنتش بأرد , الكلام لو ممنوش فايده يبقي قلته احسن , مش حاقعد اتكلم و اناقش حد مش بيسمع غير نفسه ده غير ان تلات اربع الكلام - بشكل عام - اللي بيتقال و بيتسمع ملوش اي لازمه بالمرة, فانا مش حاتحجب لمجرد ان مدرسة الدين عايزاني اتحجب او ان كل اللي حواليا محجبات ,مش حاتحجب عشان ده وضع افتراضي او لان شكلي احلي بالحجاب

و استمر الضغط , مش من المدرسه بس , من خارجها كمان , من الأخوات المحجبات , اللطيف ان ابويا و امي متعرضوش للموضوع بالرفض او التأييد , ماشيين بنظام انتي حره

لحد ما جه وقت و اتحجبت فى المدرسه بس و ده عشان اخلص من الزن , قرفت الصراحه فلجات لتكبير الدماغ

بدات قريبات ليا فى نفس عمري حجابهم يستمر لما بعد مواعيد المدرسه و النتيجه كانت النصيحه من البعض على الجانب الاخر

انه اوعي تتحجبي زيهم انتي لسه صغيره

و برضه مفرقش معايا النصيحه

من الاخر لا اهتميت باللي عايزيني اتحجب و لا باللي مش عايزيني اتحجب و استمر الوضع حتي الجامعه , بالدعوه للحجاب حتي من ناس ماشيين فى الشارع بيوزعوا شرايط و كتب صغيره, اسهل حاجه لكسب الحسنات و ده قبل موضوع الايميلز لانه كان فى مرحلة متأخره , ايميل لطيف مش حتخسر حاجه لو بعته و اهي حسنات ببلاش كيديه

المهم جت سنةالألفين و اتحجبت فى تانية كلية , بدون لوك لوك كتير فى الموضوع مع حد, مني لنفسي كده, لا بضغط من حد و لا حصلت لي صدمه خلتني اخاف و اتحجب و لا لآن فيه شابه من عمري ماتت فجأة فانا خفت و لا بسبب شريط ترهيبي من شيخ مخنوق من عيشته, بمنتهي الرضا و الرغبة فعلا اني البس الحجاب و بعد برضه التفكير , مش جنونه و طلعت يعني

رحت الكلية و محدش كان عارف, و انهالت الاحضان و البوسات
مبرررروووووووووووووووووك
مبروووك
مبرووووووووووك
الله يبارك فيكوا يا اخوانا , مش عارفه هو فيه ايه , كنت شارده و رجعت لحظيرة الايمان مثلا !!!, مانا زي مانا , اللي فرق اللبس
على الجانب الاخر , كان فيه ردود افعال من نوعية
ايه اللي عملتيه فى نفسك ده !! انتي لسه صغيره , شكلك وحش
و برضه مش فاهمه فيه ايه خير اللهم اجعله خير
للدرجة ديه حتة القماش بتغير البوني ادمين!!!
من سنة الالفين حتي هذة اللحظه , فيه تعليقات كتير بتيجي علي لبسي و حجابي
فلنفترض ان فيه جانب أ
الجانب ده شايف انه : و انتي فاكره اللي انتي لابساه ده حجاب , البنطلونات و الجيبات ديه مينفعش معاها حجاب و ايه المكياج ده
النقاب هو اللي فرض و لو مش نقاب يبقي اسدال حتي , ادي لوووووووووو, و انا فى نظر الجانب ده المنحله الشريره
طبعا الواحد بيقابل النوعيه ديه كتييييييييييير , بس الحقيقه مش بيقول الكلام ده بس بيعمل تصرفات توضح هو انهي جانب

من كام شهر دخلت محل بتاع اجهزة كمبيوتر و سماعات و كاميرات, كنت عايزه كاميرا , المهم دخلت , و سالت عاللي انا عايزاه
الاخ اللي كان واقف من غير ما يبص ناحيتي اساسا, رد على سوالي بطريقة غوري بقي
بس انا طول عمري نيتي كويسه مع الناس فمرضتش احط فى دماغي و برانويا و بتاع
و برضه استفسرت منه على الحاجات اللي عايزاها و كل مره مبصش فى الجهه اللي انا فيها خاااااالص من اساسه

كل اللي كنت عايزه اعمله ساعتها اني اهفه بالقلم , و اقوله و الله لو اخدت بالك حتلاقي اني مش عريانه لا سمح الله و لا حاجه و لا لابسه حاجه حتغريك و لا حتجرح شعور اللي خلفوك و يا ريت تتكلم اتكلم زي ما باكلمك كده , مش زي ما تكون بتهش دبان
أكم من واقف زي ديه الواحد بيتعامل زي الدبانه

الجانب ب
و ده من نوعية
ايه القرف اللي على راسك ده, اقلعيه خالص , انتوا اللي مسوئين سمعة مصر و الاسلام , ده تخلف , محدش كان بيلبس البتاع ده خالص , انتوا عايزين البلد - مش فاهمه مين انتوا - تبقي زي ايران, انتوا اللي مأخرين البلد, الناس بره بتخاف منكوا, و انا فى نظر ذلك الجانب , الارهابيه الشريره برضه
و الله انا مسألتش اذا كنت بتصلي و لا لأ و لو لقيتك مش بتصلي خلاص انت حر انا مالليييييي , واحد لذيذ يقولي الدين النصيحه و الامر بالمعروف, اقوله , طيب انا مين عشان اعمل كده و انصح الناس عمال على بطال, انا ليا ذنوبى و غلطات اكيد , حيبقي ايه شكلي ادام نفسي و انا عماله انصح الناس و من جوايا عارفه ان انا مش الملاك البرئ
برضه مسألتش انت بتصوم و لا لأ و لا بتشرب و لا لأ و لا حتي ابديت رايي فى لبس سعادتك , فليه بقي , هي ديه الحريه الشخصيه ان شاء الله ,اعمل اللي انا عايزه بس احجر على غير , لو فتحت بقي و سالت اللي حيتقال لي
ديه حريه شخصية , محدش بيسالك بره انتي بتعملي ايه
يا سبحان الله !!!
مش فاهمه ليه كل واحد بينصب نفسه وصي على غيره, كلنا بقينا اوصيا على بعض ,

البيه اللي مطول دقنه و مش بيعمل حاجه فى حياته غير السواك اللي ماسكه و قناة الرحمه و النور اللي بيشوفها عامل وصي على مخاليق ربنا الضالين و هاتك يا هدايه و كتب و شرايط , ده غير الاسلوب المجليط , على اساس اننا موصلناش لسه للدرجه الايمانيه الكافيه
و الاخ ابو تفكير متحرر شايف ان ده تخلف و رجوع لورا و عادي لو برضه تعامل بمنتهي الجليطه ,على اساس انه انتي مش فاهمه و مغيبه و مضحوك عليكي و انى باشارك فى منظومة التخلف و ان السبيل للتقدم هو البكيني
ما كل واحد يعمل اللي هو عايزه مدام مش بيضر حد , و حتي لو بيضر نفسه خلاص حيتحمل مسئولية تصرفه, محدش حيتحاسب مكان حد و لا عن حد
هذا و بالله التوفيق

تطورات التصورات فى الجواز عند البنات

اعتقد ان اغلبية البنات بيبقي ليها تصورات عن موضوع الجواز , فى الغالب التصورات ديه بتبقي منحرفه حبيت يا ورديه اوي او سودا اوي برضه, و ده على حسب البني ادمه مننا اذا كانت بتلبس نضاره الحياه البمبي بمبي و ديه فى الغالب بعد الجواز بتلبس خازوق معتبر , او اذا كانت بتلبس نضاره شبه قرن الخروب و ديه بتبقي مهيأه نفسيا لاي صدمات
انا بقي و اعوذ بالله من كلمة بقي , مكنش عندي اي تصورات من اي نوع , كنت باحاول ارسم صوره واقعيه , احتياطي يعني مش عايزين خوازيق , بس معرفتش و ده لييييييييييييه ؟؟؟ عشان مكنتش عارفه مين سعيد الحظ اللي حيقع فى شر اعماله , حتي مكنتش عارفه ارسم صوره للبني ادم ده , اممممممم شايفه انه مينفعش , مينفعش مثلا اقول عايزاه كريم بنسبة تسعين فى الميه , الموضوع مش بالمسطره و القلم
ايام الفضا بتاع الثانويه كانوا يا عيني لابسين النضاره البمبي , عايزه مش عارف ايه و ايه و ايه بمنتهي الهيام ,فى عز ايام فيلم تايتنك ,و دول اتخزوقوا اتتخزوقوا يعني
حتي زوجي العزيز مره سالني ايام الخطوبه ايام الخروج و العربده, اييييييييييييييه كانت ايام
كنت باضرب الميلك شيك شوكلاطه و انفخ و اعمل بقاليل و منسجمه,
و هو بيبص لي , بصة الناس المخطوبين ,
مش خايفه من الجواز يا ازميرالدا؟؟
اذ فجاة توقفت عن البقلله و بصت له بفزع
يا دي المصيبه هو ايه اللي حيحصل بعد الجواز ؟؟ انت ناوي على ايه !!
لا عادي يعني , قصدي المسئوليه و البيت
يا عم خضتني و مسكت الشاليموه تاني و رجعت ضهري و اتجعصت
و بمنتهي الثقه , اصغر مني و كانوا خيبه لا بيعرفوا يشيلوا مسئوليه و لا نيله و عايشين عادي يعني , هو انا اول واحده !!
اليويمن دول بقي بادور فى دفاتري القديمه و اكلم صاحبتي
ساره , كانت اتفرجت على افريكانوا كل المرات اللي اتعرض فيها فى اى حته و ده عشان تشوف سي احمد السقا , مش عارفه استحملت مني زكي ازاي كل ده !! , كانت معجبه معجبه بفزع برضه بالنحنوح مصطفي قمر, وقتها يا جماعه مكنش فيه تامر حسني و لا حماقي , بتتمني تتجوز واحد شبهه , رومانسيه بهطل و كل ما تشوف مشهد رومانسي تيجي و شويه و هى بتتشحتف, شفتي يا بنتي امبارح حبيبي دائما ؟؟ يا خرابي, شفتى اما كانوا عالبحر , نفسي اتجوز واحد كده
و كنت انا العضوه الغتيته دائما , بمنتهي الاستخفاف يا بنتي انتي بتصدقي الكلام ده , ده تمثيل, لو كانت استنت شويه بعد طلاق نور و بوسي , اكيد كانت حتغير رايها
طبعا كانت تبص لي بقرف من فوق لتحت , اصلك واحده معدومه المشاعر
يا بنتي هما يقعدوا يحبوا فى بعض شويه كده و بعدين بالجزم
زي ما اكون تنبات لها باللي حيحصل لها , يا لهوييييييييييي, كللمتها من فتره , طبعا التون مختلف تماما
ايه يا بنتي مالك ؟؟
انا عند ماما اليومين دول, الشحتفة المره ديه مختلفه عن ايام حبيبي دائما , مش بيتحمل المسئوليه خالص, و اهلوا هما اللي بيصرفوا علينا و طبعا ده مديهم الحق يتدخلوا فى خصوصيتنا
يا دي الخيبه ؟؟ ليه يا بنتي دانتوا كنتوا بتحبوا بعض و كنتي مبسوطه
ايوه و كنا مقضينها خروجات و تنطيط و حب , مكنتش حاطه فى دماغي موضوع انه مسئول ولا اهله بيصرفوا عليه , كان كل اللي هاممني الخروج و الهدايا
دينا : انا نفسي فى واحد يحبني و ميشفش غيري , يجيب لي الفطار لحد السرير , و اصحي الصبح الاقي ورده تحت المخدا , ديه كانت مجنونه كاظم بقي و حاطه صوره مع صور عيلتها

جت زارتني من كام يوم هي و اطفالها

ها يا ازميرالدا, عامله ايه فى الجواز ؟؟
كويس حتي الان , ماهو محدش عارف ايه اللي حيحصل مستقبلا
بعد شويه من الكششان مني و الكلبشه فى امهم تم التعود عالمكان من الطفلين , حطيناهم فى الارض عشان نعرف نتساير على رواقه و عيني عليهم طبعا , العفش جديد و مش عايزه امهم تزعل مني , العيال اندمجوا فى اللعب اللي امتد لشد الشعر و العض
يا ولد انت سيب اختك , يا لهوي كان مستخبي لي فين ده , و راحت مصوته , اوعي باقولك و راحت شايله البت اللي بتتشحتف على دراعها
معلش يا ازميرالدا اسفه , شفتي اللي جرا لي يا اختي , اااااااااه , فين ايام زمان , زمان ده من خمس سنين يا اخوانا ,كنت انزل اتمشي و لا اروح الجيم وقت ما نا عايزه و لا نروح اسكندريه

هو دلوقتي انتي بتعملي ايه يا دينا ؟؟

مش شايفاني ,بارضع

قصدي فى الحياه

مفيش , لا عارفه نخرج و لا نروح فى حته, العيال مقيدنا

امممم

و انتي ؟؟ نظام اسئلة جس النبض ديه ,

بمنتهي الشفافيه والبراءه مني

عادي من البيت للشغل و العكس

البت زي ما تكون اتكهربت

ايه !!! بس!!

ساعات كده الواحد بيمر بلحظات ميبقاش عارف يعمل فيها رد فعل

امممم , طيب ايه !!

نصيحه يا ازميرالدا , اخرجي و اتفسحي , بعد كده مفيش الكلام , و راحت مصوته تاني

يا ابنييييييي , حتخرب الموبايل, استغفر الله العظيم و بعدين بقييييييي , ده موبايلي مش موبايلها
سيبك من قعدة البيت ديه , بكره تندمي , اتفسحوا و اخرجوا على اد ما تقدروا

ما هي متعرفش لما تصحي من الساعه 6 و شغل لحد 5 , منظرنا مبيبقاش جايب على بني ادمين خالص , بيبقي قالب على اشباح

باقولك ايه يا دينا ,انتي يا بنتي مش كنتي مبسوطه و فرحانه ؟؟ يا بابا الموبايل , دانا مش هي و رحت واخده مخبياه

ده كان فى الاول , كنا بنخرج , و كنا نقعد نرغي و يحب فيا , و المفاجات بتاعته, ده غير الهديا اللي كانت بتجي لي عمال على بطال و ده ايام الخطوبه و شهرين من الجواز , بعد كده خلاص, يا عيني عالحلو لما تبهدله الايام و بدات تبرطم بكلام مش باين زي كان يوم اغبر و كنت هابله و استعجلت و انا اللي استاهل

استغفر الله العظيم , يعني انا بادردش مع البنات و اتسلي عليهم , اكئبهم , طيب ايه اللي حصل ؟؟؟ مانا برضه المفروض اتودك و اعرف يا بنتي مبيشلش كباية المياه من مكانها , مبيحبش الاكل البايت, لازم اطبخ له كل يوم , مش بيساعدني و لا حاسس بيا , معتبر ده العادي , يا بنتي ده يجي من الشغل يرمي هدومه و اقعد الملم وراه بقي , ده غير العيال , انا تعبت يا ازميرالدا
الا انتي لم يدر بخلدك تماما مثلا ان ايام السهوكه و الهدايا اللي مالهاش وقت ديه حتخلص ؟؟
النحنوحه معجبهاش كلامي اظاهر , عوجت لي ربع شفه مع بصة ممزوجه بالقرف
و انا حافكر فى الكلام ده و احنا مخطوبين ليه اصلا !!! طيب و انتي عامله ايه ؟؟ جوزك متغيرش

لا عادي يعني

ايه ده لسه بيقولك كلام حب ؟؟

و هو كان بيقوله ايام الخطوبه عشان يقوله دلوقتي ,على فكره انا متغيرتش , تفتكري حيكون رد فعلي ايه لو قعد يسب لي - عيونه مش الدين طبعا- اي نعم الواحده مننا بتبقي عايزه كلمه كده كلمه كده بس مش لدرجة السهوكه

انتي لسه زي مانتي ؟؟, البت بتقولها باتامه غريبه ,

مش احسن ماخد على دماغي بعد الجواز و بعدين اعققد يعني ان الموضوع مش موضوع تغير و لا نيله
مفيش رد فعل لانها مشغوله بتكريع النوننه. اومال ايه ؟؟
قلت اديها خمسه فلفسه و فزلكه بقي , اممممم طبيعة العلاقه اتغيرت فاكيد لازم تتغيروا انتوا كمان, بمعني , دلوقتي انتوا عايشين مع بعض فمش حتخرجوا عشان تتقابلوا فى كافيه ,المهم موضوع الطبيخ كل يوم و انه مش بيساعد فده مش عشان هو اتغير بس عشان ده مرتبط بالجواز مش بالخطوبه , يا امي ده لو قام من مكانه وقتها عشان يحط الكوبايه كنتي حتفطي من مكانك تاخديها منه, هما مش بيتغيروا بس بيبقوا على طبيعتهم خلاص, و بعدين موضوع االهدايا ده , خلي عندك دم فيه , اما يبقي ياكلكوا ابقي دوري عالهدايا
ولاء بقي يا عيني كان عندها طول الوقت امل تتجوز الشاب الروش اللي يفسحها و يغديها بره عمال على بطال و نظام هئ و مئ , اي نعم الراجل ماثرش لحد اول كام شهر جواز , بعدها اتدهس فى شغله بقي , من تسعه الصبح لحد تمانيه,و احيانا الجمعات كمان
ديه بقي بعيد عن السامعين العفريته بتاعتها بقت دائمة الظهور من يوم ما اتجوزت وعلى طول شايطه
مبشوفوش خاااااااااالص , يجي من الشغل ياكل و يستلم الكمبيوطر بعدها يخش ينام , , انا زهقت مفيش اي كلام بيننا خالص, مبسمعش صوته الا عشان يتكرع, ايه ده ليه كده ؟؟ كل حاجه شغل شغل شغل
و الله عندك حق , بس اعتقد شغل لمدةاحداشر ساعه كفيله انها تخلص بطاريه اي بني ادم
زي ما فيه بنات نفسياتهم تعبت من احداث ما بعد الجواز , فيه تانيات تاقلموا عالوضع و عادي بقي و ضربوها طبنجه
مي بقي بدات تشرب سجاير من بعد سنه من الجواز , مش عارفه ايه الناس اللي بتسجر من الجواز ديه
بصي هو الاول بس بتبقي المواضيع لطيفه بعدها خلاص بقي , الناس بتمل , كل واحد فى شغله طول النهار بعدها نروح نتغدي , هو عالكمبيوتر او بيتفرج على كوره و انا مع البنت او يخرج يقابل صحابه و انا كمان اخرج , اروح لاهلي او اتقابل مع صحباتي , فى الاول اتخنقت من قلة كلامه و العيشه الممله اللي عايشنها بعدها قلت خلاص بقي لا يخنق عليا و لا اخنق عليه و كل واحد يعمل اللي عايزه
الحقيقه الحاله ديه المتني كثيرا كثيرا
و انتي بسلامتك مبسوطه كده ؟؟ايه القرف ده!
مش موضوع مبسوطه و لا لأ , موضوع ان ده العادي بتاع كل الناس , خلاص بقي ادينا عايشين

الدرس المستفاد مما سبق انه ربنا يستر

شهر عسل مبصوص فيه

بعد ما ربنا هدانا و استقرنا اننا موش حنعمل فرح و اننا حنسافر , قررت و شمرت عشان اجهز لرحلة العمر, ما هو بر ضه مينفعش باب النجار يكون مخلع , و بدات الم العروض من هنا و من هنا عشان اوصل لافضل سعر ,منه اوفر لجوز المستقبل و تبقي جميله و منه ابين له قدراتي , هو كمان ما صدق , شال الموضوع من دماغه و فضاه لتجهيزات الجواز البهيج

طبعا بدات اجهز للموضوع قبلها باربع شهور , ما هو محدش ضامن حاجه و لا حد اليومين دول,

و حجزت التذاكر على مصر للقطران مع التاكد ان زمايلي بتوع الطيران مظبطني فى السعر و مكان الكرسي ,زميله ليهم بقي و لازم اتكرم و اقرفهم, لازم الكرسي يبقي جنب الشباك , اللي فيه داء الميكروبازات مش بيبطله

و من ناحيتي ظبطت الفنادق بعد الدخول عالنت تلات الاف مره وعشان اقارن و اختار و بعدها ابعت اللينكات لسي ربيع

ها يا كوكو ؟؟ده و لا ده

الاتنين كويسين

استفغر الله العظيم , طيب انهي واحد

ظبطي انتي بقي انا ورايا حجات تانيه , انا سايب لك الموضوع ظبطيه انتي, ده بيثبتني اظاهر

مانا برضه عايزه اشركه فى الموضوع , فرضا الفندق معجبوش اتذل بقي طول العمر اني بهدلته فى شهر العسل

هسهس التجهيز انتقل برضه للتذاكر , كل شويه اتاكد ان كله تمام و ان الحجوزات متظبطه و متستفه متعتعتش , عارفه انا حركات النداله بتاعة شركة الطيران الوطنيه بتاعتنا

ما تسافروا ماليزيا يا ازميرالدا .. اقتراح ساره

اشمعني ؟؟

بيقولوا حلوه
و هى تايلاند اللي بنت كلب , اهي كلها مجاهل اسيا ّّّّّ!!
هند : ايه داااااااااااااااااه مسافرين تايلاند !!
البت ديه قراره
قل اعوذ برب الفلق .. اربعه اربعه من كل جنيه مبعبعه .. خمسه خمسه من كل عفريته ملامسه
لاااااا ما هووووووووو احنا موش عاملين فرح اساسا , ده بدال الفرح يعني

يا رب سلم

من يجي سنتين كده , اكتشف اللي حواليا ان نجمي خفيف و اني باتاثر بسرعه , فكان كتير يتم التحذير انه اكتمي تماما مش كل حاجه تتقال , و انا صدقت الحقيقه, مش عارفه تاثرا بكلامهم و لا حسيت اني فعلا نجمي خفيف , مش فاهمه ايه النجم المسلوع ده
قولوا لهم اننا عرسان و كده و يظبطونا, عايزه اتفشخر ادام ربيع بقي , العشم كان قاتلني اوي
قبل ما كنت باقول موضوع السفر ده , كنت بابتدي انه مش حنعمل فرح و لا فيه فستان و لا اي مظهر من مظاهر البهجه المعتاده, تخيل الاقر يبقي على فشوش, و الفشوش يمشي و الاقر يقعد فى القعر
اثناء هذه الفتره طبعا لا فيه جرايد تتابع و لا نيله , الواحد بيبقي فى ملكوت تاني بيفصل ت ما ما , و لازلت فاصله و عهد الله
قاعده فى امان ربنا ادعبس و استف الرحلات بقي و حنروح فين و فين, الاقي فاكس بعيد عن السامعين
السفارات تحذر رعاياها من السفر لتايلاند عشان القلاقل , الهي يتقللوا قادر يا كريم, يعني من الاخر منسفرش حد تايلاند, و الشعب معزل فى المطار و الدنيا واقفه
بسسسسسسسسسسسسس و البس يا معلم
اهههههههههه يا امماااااا
الحق يا ربيع تايلاند فيها قلاقل و عايزين يشيلوا رئيس الوزراااااااعععععععععععععع
ما يشيلوه
يا بني شهر العسل
خلاص
ايييييييييييه ؟؟ خلاص ايه ؟؟
شوفي حاجه تانيه , اهو ده عيبه بقي , هما فيه عملا كده فاكرين المواضيع بالساهل
و اشتغلت على ماليزيا و بدات من اول و جديد, و طلع عيني و عين االلي خلفوني عشان اهندذ الرحله و تم الحجز الحمد لله
بارغي مع نرمين كده و باحكي عن الحجز
فاااااااكره الايجينت زيد اف تي ؟؟؟
يااااااااه اه دول قفلوا خلاص
لا اشتغلوا تاني كلميهم و حيدوكي اسعار ارخص
عينيا نورت و اضيقت , هيههيييييييييي , اممممممممممم ,فرصه اعمل مصلحه على كوكو و اهو اجربهم فى نفسي
و كلمت هاني المسئول فى الايجينت مخفي الذكر , الجدع ما صدق , لقيته ناطط تاني يوم عندي فى المكتب بذاتية نفسه
لا لا لا يا عروستنا , متقلقيش خاااااالص
بجد يا هاني ؟؟ يا لهوي عالفرحه القاتله الساذجه المعجونه بعبط
اه طبعا و بدا يعمل اتصالاته , لا شوفوا مش عارف ايه , لا عايز ارخص , تمام كده
خلاص يا عروستنا كله تمام
ويشووووووووووو , الحمد لله , خلاص بقي كده حاجه عدت
داخله فى امان الله الصبح
شرين : ازميرالداااااااااا الحقي مصر للطيران لغت حجزك
ايييييييععععععيييييييييه؟؟ ليه
معرفش مع ان كله تمام, ساعات بيعملوها انتي عارفه, هي ديه حركات النداله سالفة الذكر
طب رجعيه بسرعه
رجعته بس السعر زاد
كاااااهااااااااام ؟؟
خمسومية جنيه
انا حاعيط يا خوانا, مش حاعرف اعمل المصلحه و لا اييييييييييه؟؟
ربيع , السعر زاد خمسومية جنيه
طيب مش مشكله , خلاص, و ده بعد شويه صمت
و استرديت عفيتي واخدت نفسي تاني ,
ماشي يا شرين مش مشكله , بس و النبي و النبي خلي بالك من الحجوزات
يا بنتي انا كل شويه اشوفه و الله و متابعاه
يا سلام بقي لو الحركه ديه اتعملت مع عميل , اصلكوا مهملين , مش شايفين شغلكوا , وظيطه بقي
و استقرت الامور تاني
يا رب يا رب , حابقي كويسه و اصفي نيتي و اشتغل بذمه و ضمير , مشي لي اموري يا رب
بقيت ادخل الشركة كل يوم و انا متوقعه بونيه
ها مفيش مصايب تاني؟؟
لا مفيش
نازحه على مكتبي فى يوم و كلى عشم ان كله تمام
ازميرالدااااااااااااااااا ,بيجي عليا وقت باكره اسمي , مصر للطيران شالوا العوده خالص
اييييييعهههه ؟؟؟ فيه ايه يا ناس ؟؟ جري ايه؟؟ انا ليه كده !! يعني ايه ؟؟
شالوا الطياره خاااااالص من اليوم ده, اليوم ده مفيش رجوع من ماليزيا

و بعدين ؟؟

حجزت اليوم اللي قبليه
يعني حنقلل الرحله يوم ؟ طيب مش مشكله
من الواضح نيتي لسه مش و لابد

فى يوم تالي ما يعلم بيه الا ربنا, بس كان هاني بقي , ماحنا بقي فيه بزبس بينا
ازميرالدا, عندي خبر مش كويس
مفيش اي حاجه من ناحيتي خالص
كل الحجوزات اللي عندنا اتلغت, اللينك وقع فى لندن
كان نفسي ارمي كل الشتيمه اللي مش و لا بد فى خلقته
ايه اللي دخل لندن فى الموضوع ؟؟, قعد يحكي لي فيلم كده مفهمتش منه حاجه
يعني اييييييييه؟؟ حجزي ضاع ؟؟ و الراجل اللي مسافر كمان كام يوم ده ,!!, عميل حظه العاثر وقعه معاهم
بصي احنا بنحاول نرجع كل حاجه , متقلقيش
مقلقش ؟؟ لا بقي اللي بيحصل ده مش عادي, للدرجه ديه كلي شوائب !!
اتصرف , انا اعتمدت عليك فى الموضوع ده
حاضر و الله متقلقيش
و كلمت ربيع و حكيت له, كان رده مفجع الصراحه
متتعمليش مع الناس ديه تاني , ااااااااااااااه ابتدينا بقي يتدخل فى شغلي
و بمنتهي الاحباط
حاضر , ما الراجل ليه حق برضه
بيت ام القلق و القلاقل, كان لازم الشعب التايلاندي يتهور فى الوقت ده
و فضلت يا حضرات اسبوع على اعصابي, كل شويه اكلمه , بمعدل سبع مكالمات فى اليوم , عشاني و عشان الراجل الغلبان اللي حجزته له معاهم, ها مفيش اخبار
لسه و الله , مفيش رد بس متقلقيش
باكره الكلمه ديه
, بعدين قلت لا بقي اتصرف من ايجينت تاني و رجعت مذلوله و حجزت مع حبايبي اللي بقي لي سنين باتعامل معاهم , الماسوي فى الموضوع ان السعر زاد ميتين جنيه, يا رب خلاص مش حاعمل مصلحه على ربيع
و اخيرا المنيل كلمني
خلاص يا ازميرالدا رجعنا لك الحجز
احمدك يارب , لينك لندن مش حيقع تاني ؟؟؟
و ربنا سترها معايا و كله اتظبط و ده برضه بعد ما مصر للطيران لغوا حجزى للمره التانيه و رجعناه بسلامة الله

اعتقد نيتي بدات تصفي و الامور حتسلك , جه عليا وقت كنت حاضعف و اعمل فرح اسهل من وجع القلب ده بس تماسكت و وقفت فى وجه مصر للقطران و قلاقل بتوع تايلاند